Efa Manjaka Fanjakan̈any Zan̈ahary!

1. Ino raha azontsika antoko, baka io nan̈ino?

KIVY ma anao izikoa fa mandiniky raha misy amy donia ty? Amy zioty baka, olo tran̈o araiky efa tsy fankatia karaha taloha eky. Mahaikafiry ndreky mahaitia ten̈a fo koa olo. Maro olo efa tsy matoky manampahifan̈a eky. Kanefa, baka amy raha mandalo aby zen̈y edy mahavy atsika han̈anten̈a fa mbo ho tsara fo fiain̈ana aminy amaray an̈y. Nan̈ino ma? Fotony iro io man̈atanteraka raha koran̈iny Baiboly momba “andra farany.” (2 Tim. 3:1-5) Ke resy lahatra lan̈iany olo manan̈a fô tsara fa tanteraka marin̈y faminanian̈a io. Raha mandalo aby io koa man̈aporofo fa efa manjaka andan̈itry ankitin̈y i Kristy Jesosy, Panjakany Fanjakan̈any Zan̈ahary. Fa faminanian̈a io zisty araiky fo amy faminanian̈a marobe momba Fanjakan̈any Zan̈ahary. Ho fatatra mare finoan̈antsika izikoa atsika mandiniky faminanian̈a hafa tanteraka tan̈atiny taon̈o tafarafara tato.

2. Ino raha hidinihintsika ato, baka io nan̈ino? (Hazavà sary amy fôn̈ony gazety ty.)

² Handiniky raha aby ty atsika ato: 1) Faminanian̈a araiky han̈ampy atsika hahay ombian̈a ma Fanjakan̈any Zan̈ahary io nanomboko nanjaka. 2) Faminanian̈a han̈ampy atsika hahay ombian̈a Jesosy nanjary Panjakany Fanjakan̈any Zan̈ahary. 3) Faminanian̈a han̈ampy atsika hahay akory hampa ripaka fahavalony Fanjakan̈any Zan̈ahary. Ho hitantsika ato fa mifameno aby iro faminanian̈a aby io, karaha ataony tapatapaka sary atambatambatra ke man̈amia sary araiky feno tsarabe in̈y. Zen̈y amy zay ahaizantsika, efa farifary aia amy fandaharampotoan̈any Jehovah misy atsika iziô.

OMBIAN̈A MA FANJAKAN̈ANY ZAN̈AHARY NANOMBOKO NANJAKA?

3. Izikoa faminanian̈a amy Daniela 7:13, 14 zahavan̈a, ino toky hanan̈antsika momba Panjakany Fanjakan̈any Zan̈ahary?

³ Man̈amia toky atsika faminanian̈a amy Daniela 7:13, 14 ao, fa Kristy Jesosy Panjakany Fanjakan̈any Zan̈ahary, ary tsisy olo mahay mitondra mandilatra izy. Ho ravoravo olo baka amy firenena jiaby ‘hanompo izy.’ Tsisy olo hafa eky hisolo plasinany. Ombian̈a izy hanomboko hitondra? Koran̈iny faminanian̈a hafa amy bokiny Daniela fa lera tapitry fepotoan̈a fito. Ombian̈a ma zen̈y? Pôsibla ho haintsika ma ombian̈a Jesosy nanjary Panjaka?

4. Hazavà amy karakory Daniela 4:10-17 io man̈ampy atsika hahay taon̈o nampa Panjaka i Kritsy. (Zahava koa lamariky amy pazy ambany.)

⁴ Vakia Daniela 4:10-17. “Fepotoan̈a fito” io mahadin̈y 2 520 taon̈o. Tamy 607 T.K. izio nikomansy, iro Babylonianin̈y aby io koa fa nan̈adoso panjaka farany tamy sezy fiandrianan̈any Jehovah ta Jerosalema. Taminy 1914 izio tapitry; Jehovah taminio nanendry Jesosy hanjary Panjakany Fanjakan̈any Zan̈ahary.b Jesosy zaraiky fo ‘manan̈a zò aradalàn̈a hahazo zen̈y.’​—Ezek. 21:25-27.

5. Ino iziô hatsaran̈a azontsika baka amy faminanian̈a momba “fepotoan̈a fito” io?

⁵ Nan̈ino mahatsara atsika faminanian̈a io? Fahaizantsika raha momba “fepotoan̈a fito” io man̈amia toky atsika fa Jehovah tsy maintsy han̈atanteraka fampan̈antinan̈anany, amy fotoan̈a mety. Jehovah efa nifidy fotoan̈a han̈anaovany i Jesosy ho Panjaka, ke izikoa fa navy fotoan̈a io, nataony Panjaka ankitin̈y Jesosy. Zen̈y ahaizantsika fa mbala ho tanteraka koa faminanian̈a hafa jiaby koran̈iny Baiboly, izikoa fa avy fotoan̈a nifidiny Jehovah. Ke andrany Jehovah io ‘tsy ho tara’ foeky!​—Hab. 2:3.

AKORY AHAIZANTSIKA FA KRISTY EFA NANJARY PANJAKANY FANJAKAN̈ANY ZAN̈AHARY?

6. a) Ino aby raha mandalo ambony tany eto ke ahaizan̈a fa efa manjaka andan̈itry an̈y i Kristy? b) Nan̈ino raha koran̈iny Apokalypsy 6:2-8 ao mankamarin̈y iro porofo aby io?

⁶ Izikoa fa ho tapitry fanompoan̈any Jesosy tambony tany teto, nikoran̈iny tamy pan̈aradia izy raha sasany handalo amy donia ty, misy ahaizandro ombian̈a izy hanomboko hanjaka andan̈itry an̈y. An̈isany raha nikoran̈iny iziô lagera, mosary, ndreky hôrohôrontany. Nivolan̈a koa izy fa ho ‘hisy valan̈aretin̈y amy tany isankarazany.’ Araiky amy zen̈y valan̈aretin̈y COVID-19 nandalo vo tsy ela in̈y. Iro raha aby io an̈isany raha volan̈iny Baiboly fa “famantaran̈a” fan̈atrehany Kristy. (Mat. 24:3, 7; Lioka 21:7, 10, 11) Mandilatra 60 taon̈o tafarany nifatesany Jesosy ndreky nimpodianany tandan̈itry tan̈y, nan̈amia toky apostoly Jaona izy fa ho hisy ankitin̈y iro raha aby io. (Vakia Apokalypsy 6:2-8.) Tanteraka aby raha jiaby zen̈y, Jesosy koa fa nahazo fahifan̈a taminy 1914.

7. Nan̈ino ma donia ty nahaitsy nanjary fo rango Jesosy nanjary Panjaka?

⁷ Nan̈ino ma donia ty nahaitsy nanjary fo, Jesosy koa fa nanjary Panjaka? Koran̈iny Apokalypsy 6:2 antony araiky maventy mahavy zen̈y. Volan̈iny ao fa niaraka Jesosy nanjary Panjaka, izy nirahin̈y han̈ano lagera. Hiady aminjovy ma izy? Hiady amy Devoly miaraka amy demoninany aby io. Tantarainy Apokalypsy toko 12 fa resy Satana, ke natsipy tambony tany tatỳ izy ndreky iro demoninany aby io. Meloko angôvo jiaby i Satana ke komansy tamy zen̈y izy nan̈ampatra helokonany tamy zanakolombelon̈o. Zen̈y mahavy ‘antambo marobe ambony tany.’​—Apok. 12:7-12.

8. Nan̈ino ma mahatsara atsika mahita fahatantirahany faminanian̈a mikasiky Fanjakan̈any Zan̈ahary io?

⁸ Nan̈ino mahatsara atsika faminanian̈a aby io? Amy zioty, efa miova mare toetrinolo. Hitantsika baka amy zen̈y fa efa nanjary Panjaka ankitin̈y i Jesosy. Ke tsy tokony ho meloko atsika izikoa fa mahita olo tia ten̈a ndreky tsy fankatia, fotony raha aby zen̈y man̈atanteraka faminanian̈any Baiboly. Efa mitondra ankitin̈y Fanjakan̈a io! (Sal. 37:1) Ampoizin̈y koa fa hahaiho ratsy fo fiain̈ana, arakarakany mamparikitry Aramagedona. (Mar. 13:8; 2 Tim. 3:13) Mankasitraka Jehovah atsika fotony Babantsika be fitiavan̈a andan̈itry an̈y man̈ampy atsika, ke haintsika dikany mahavy raha ratsy erantany.

HAN̈ANO AKORY HIAFARANY FAHAVALONY ZAN̈AHARY?

9. Koa zahan̈a Daniela 2:28, 31-35, azovy firenena matanjaka farany, avio ombian̈a izio nanomboko nisy?

⁹ Vakia Daniela 2:28, 31-35. Tanteraka avahizo koa faminanian̈a io. Nôfiny Nebokadnezara mikoran̈a raha handalo ‘amy tapany farany aminy andra farany’, tsy ela tafarany Kristy nanomboko nanjaka. An̈isany fahavalony Jesosy ambony tany eto firenena matanjaka farany, koran̈iny Baiboly. Izio ampitovisin̈y amy ‘vity vy miaro tanimanga.’ Efa mitondra firenena matanjaka io, amy zioty. Taminy Ady Lehibe I izio nifôron̈o, firenena matanjaka Angiley-Amerikain koa fa niaraka niasa marikitry. Izikoa dinihin̈y nôfiny Nebokadnezara, misy raha aroe farany hely mampiavaka izio izikoa ampiran̈iny amy firenena matanjaka hafa talohandro.

10. a) Akory ahitan̈a fa tanteraka amy firenena matanjaka Angiley-Amerikain faminanian̈a nambarany Daniela? b) Ino raha tôkotro tandremantsika? (Zahava “Mitandrema Anao amy Tanimanga Io!”)

¹⁰ Voanalohany, firenena matanjaka Angiley-Amerikain io tsy miran̈a amy firenena hafa natanjaka talohanany, fotony izio tsy ampiran̈iny amy metaly fatatra karaha ataony volamena ndreky volafotsy, fa amy vy miaro tanimanga. Tanimanga io mifan̈itsy amy ‘taranakanolombelon̈o’, na olo aminy ankapobeny. (Dan. 2:43, lpa.) Hita tsarabe zioty, fa hevitrindro ndreky toetsain̈indro io misy vokany be, ohatra lera misy fifidianan̈a, na filaharan̈a atao hitakian̈a zonolombelon̈o na zòny piasa, avio lera misy lagrevo. Ke manjary sarotro amy firenena matanjaka io man̈atanteraka programony asanany.

11. Nan̈ino ma atsika mahairesy lahatra fo fa miain̈y aminy andra farany atsika?

¹¹ Faharoe, Angiley-Amerikain firenena matanjaka farany koran̈iny Baiboly, fotony izio ampitovisin̈y amy vitiny sarivongana maventy be in̈y. Tsisy fitondrasan̈a hafa eky hisoatra izio. Ndray zen̈y, handeha hifoan̈any Fanjakan̈any Zan̈ahary iro fitondrasan̈anolombelon̈o jiaby ambony tany, lera Aramagedona.c​—Apok. 16:13, 14, 16; 19:19, 20.

12. Ino koa porofo hafa koran̈iny faminanian̈any Daniela ke ten̈a mankahery sady man̈amia toky atsika?

¹² Nan̈ino mahatsara atsika faminanian̈a io? Misy porofo hafa koa amy faminanian̈any Daniela mankamarin̈y fa miain̈y amy fotoan̈any farany atsika iziô. Mandilatra 2 500 taon̈o lôso zay, Daniela nan̈ambara fa fan̈araka Babylony, ho hisy firenena farany matanjaka efatra hitondra, ary raha ataondro io ho hisy vokany mare amy vahoakany Zan̈ahary. Nivolan̈a foeky izy fa Firenena Matanjaka Angiley-Amerikain farany amindro io. Man̈amia toky atsika sady mankahery atsika raha zen̈y fa tsy ho ela Fanjakan̈any Zan̈ahary han̈adoso fanjakan̈anolombelon̈o jiaby sady hitondra tany jiaby.​—Dan. 2:44.

13. Mifan̈itsy aminjovy ma “panjaka fahavalo” ndreky “panjaka folo” koran̈iny Apokalypsy 17:9-12 ao, baka io akory nampatanteraka faminanian̈a io?

¹³ Vakia Apokalypsy 17:9-12. Maro raha robaka vokatrany Ady Lehibe I. Ndray zen̈y, nisy faminanian̈a hafa momba andra farany tanteraka. Iro pitondra aby amy donia ty tihan̈ano raha hisiany fiadanan̈a erantany. Ke tamy Zanvie 1920, iro namôron̈o Fikambanampirenena (SDN), baka io tafara taminy Oktobra 1945 izio nisoloan̈a Firenena Mikamban̈a (ONU). “Panjaka fahavalo” ikahiany Baiboly izio. Fa izio fo tsy firenena matanjaka, fotony mbala miankiny amy fitondrasan̈a jiaby erantany angôvonany ndreky fahifan̈anany. “Panjaka folo” ikahiany Baiboly iro fitondrasan̈a aby io.

14-15. a) Ino raha ambarany Apokalypsy 17:3-5 momba “Babylony Be”? b) Han̈ano akory olo manohan̈a fivavahan̈a diso?

¹⁴ Vakia Apokalypsy 17:3-5. Nisy fahitan̈a baka amy Zan̈ahary nazony apostoly Jaona momba man̈angy makorely araiky. “Babylony Be” ikahian̈a izio. Izio mifan̈itsy amy fivavahan̈a diso jiaby erantany. Akory nampatanteraka faminanian̈a io? Efa ela iro fivavahan̈a diso aby io niaraka niasa marikitry tamindro pitondra olombelon̈o aby io ndreky nanohan̈a iro. Teteky iô, hataony Jehovah an̈atiny fôndro pitondra aby io ‘han̈atanteraka hevitrinany.’ Ino vokatranizen̈y? Hivadiky amy fivavahan̈a diso iro fitondrasan̈a aby io, “panjaka folo” zen̈y, ke hiravan̈indro an̈y foeky fivavahan̈a aby io.​—Apok. 17:1, 2, 16, 17.

¹⁵ Akory hahaizantsika fa ho ravan̈a tsy ho ela Babylony Be? Amaliantsika zen̈y, alô atsika himpody hely amy tantarany Babylony taloha tan̈y. Niaro tanàna io Ten̈aranony Eofrata. Ampiran̈iny bokiny Apokalypsy amy “rano” miaro Babylony Be koa iro olo mandeha antapitrisany manohan̈a izy. (Apok. 17:15) Koran̈iny ao koa fa ho ‘ritry’ rano io. (Apok. 16:12) Ino ma dikanizen̈y? Hihen̈y mare olo hanohan̈a fivavahan̈a diso kanefa taloha tsy karaha zen̈y. Tanteraka amy zioty faminanian̈a io, fotony maro mare olo miala amy fivavahan̈a diso avio iro mitady tany hafa mahavaha problemondro.

16. Nan̈ino mahatsara atsika mahay dikany faminanian̈a momba fiforaon̈any Firenena Mikamban̈a ndreky fandravan̈ana Babylony Be?

¹⁶ Nan̈ino mahatsara atsika faminanian̈a io? Efa hitantsika tiô fa efa nifôron̈o Firenena Mikamban̈a, avio mahaimihen̈y olo manohan̈a fivavahan̈a diso. Zen̈y man̈aporofo fa efa ten̈a andra farany misy atsika izioty. Fa ndray mihen̈y mare olo manohan̈a Babylony Be, tsy zen̈y raha handravan̈a fitambarany fivavahan̈a diso jiaby erantany io. Efa hitantsika, fa hataony Jehovah an̈atiny fôny “panjaka folo” raha zen̈y, ke iro ‘han̈atanteraka hevitrinany.’ Tsy azovy “panjaka folo” io fa iro fitondrasan̈a manohan̈a Firenena Mikamban̈a aby io. Ho tampoko fandravan̈ana fivavahan̈a diso, ke ho taitry mare donia ty.d (Apok. 18:8-10) Hampialamboetry donia ty mare raha zen̈y, ke mety ho sarotro mare fiain̈ana. Ndray zen̈y, ho ravoravo vahoakany Jehovah. Misy antony aroe farany hely mahavy zen̈y. Voanalohany, ho ravan̈a mandrakizay eky Fivavahan̈a diso, fahavalony Zan̈ahary efa nisy rango elabe io. Faharoe, efa marikitry fotoan̈a han̈avaotany Zan̈ahary atsika amy fampijalian̈a ataony donia ty!​—Lioka 21:28.

ANAO MATOKISA FA JEHOVAH TSY MAINTSY HIARO VAHOAKANANY!

17-18. a) Ino raha mila ataontsika izikoa tiantsika ho fatatra finoan̈antsika? b) Ino raha hikoran̈intsika amy lahatsoratra man̈araka?

¹⁷ Daniela efa nan̈ambara fa ‘hitombo mare ny ten̈a fahaizan̈a.’ Ary zen̈y ankitin̈y raha nisy! Nanjary nahainazava amintsika fo iro faminanian̈a aby momba andra misy atsika. (Dan. 12:4, 9, 10) Tanteraka antsipiriany iro faminanian̈a aby io, ke manjary mitombo mare fan̈ajantsika Jehovah ndreky Volan̈anany. (Isaia 46:10; 55:11) Ankafatara fo finoan̈anao, ke mazotoa mianatra Soratra Masin̈y, avio ampia olo hihavan̈a tsara amy Jehovah. Izy hiaro lan̈iany olo matoky izy ankitin̈y, ke ‘hampiadaniny fo’ iro.​—Isaia 26:3.

¹⁸ Hifantoko amy faminanian̈a momba fiangonan̈a kristianin̈y amy fotoan̈any farany ndraiky atsika amy lahatsoratra man̈araka. Ho hitantsika baka amy faminanian̈a aby io fa miain̈y aminy andra farany atsika iziô. Hahita porofo hafa koa atsika, fa efa Panjaka andan̈itry an̈y i Jesosy, ke izy iziô mitariky pan̈aradia izy tsy mivadiky.