Mianara Raha Baka amy Faminanian̈any Baiboly

1. Ino han̈ampy atsika ho tia mianatra faminanian̈a amy Baiboly?

“FARANDRAHA tiako mianatra faminanian̈a amy Baiboly”, ho rahalahy tanora araiky kahian̈a Ben. Anao koa ma mba karaha zen̈y? Sa hitanao sarotro mianatra faminanian̈a aby io? Mety hampakamo anao foeky hianatra iro io. Kanefa mety hiova eritreritrinao zen̈y lera hainao tsarabe nan̈ino Jehovah nampanoratra iro io an̈aty Volan̈anany ao.

2. Ino raha hidinihintsika amy lahatsoratra ty?

² Ho hitantsika amy lahatsoratra ty nan̈ino atsika tôkony hianatra faminanian̈a aby io avio karakory atao mianatra iro io. Handiniky faminanian̈a aroe amy bokiny Daniela ao koa atsika baka ahitantsika nan̈ino fahaizan̈a iro io afaka man̈ampy atsika rango zioty.

NAN̈INO ATSIKA TÔKONY HIANATRA FAMINANIAN̈A?

3. Ino raha mila ataontsika baka hazava amintsika faminanian̈a amy Baiboly?

³ Izikoa tiantsika hazava amintsika faminanian̈a amy Baiboly, atsika mila mangataka fan̈ampian̈a. Diniha baka ohatra ty: Anao mandeha amy toeran̈a araiky mbala tsiary nandihananao, fa namanao dia araiky aminao ndraiky efa mahay tsara toeran̈a io. Hainy tsarabe aia anaro zioty ndreky mandeha aia sampan̈andalan̈a tsiaraikiaraiky. Misaora ravoravo anao koa fa namanao io nan̈eky iaraka aminao. Jehovah mira naman̈a araiky von̈ono han̈ampy. Hainy tsarabe raha hiboaka aminy amaray. Ke izikoa tiantsika hahay tsara iro faminanian̈a amy Baiboly ao, atsika mila manetry ten̈a ke man̈eky fan̈ampian̈a baka amy Jehovah.​—Dan. 2:28; 2 Pet. 1:19, 20.

4. Nan̈ino ma Jehovah nampanoratra faminanian̈a aby io amy Volan̈anany ao? (Jeremia 29:11) (Zahava koa sary.)

⁴ Jehovah mira raimandreny tsara fan̈ahy ke man̈iry zanany hanan̈a hoavy tsara. (Vakia Jeremia 29:11.) Fa tsy mampitovy izy amy raimandreny fo, Jehovah mahavita man̈ambara amintsika amy fomba marin̈y tsara raha mbala hiboaka aminy amaray. Nirahiny nisoratin̈y amy Volan̈anany ao faminanian̈a aby io amy zen̈y atsika afaka mahay tsialohaloha raha maventy mbala hiboaka. (Isaia 46:10) Iro faminanian̈a aby io kado feno fitiavan̈a baka amy Babantsika andan̈itry an̈y. Fa ino raha han̈ampy anao hatoky fa ho tanteraka ankitin̈y faminanian̈a koran̈iny Baiboly?

5. Ino raha ianarany tanora baka amy Max?

⁵ Matetiky iro tanora aby io mifanojy aminolo tsy ten̈a man̈aja Baiboly na tsy man̈aja Baiboly foeky a lekolindro an̈y. Raha volan̈inolo aby io ndreky ataondro mety hahavy tanora araiky Vavolombelon̈o Jehovah hisalasala amy raha inoany. Zahava baka raha nandalo tamy Rahalahy Max. Karaha ty hoizy: “Tamy zaho mbala nandeha lekoly, zaho nisalasala asa fivavahan̈a marin̈y ankitin̈y nampianariny raimandreniko zaho io, avio asa ten̈a baka amy Zan̈ahary ankitin̈y Baiboly.” Ino raha nataony raimandreniny Max? Ho Max: “Iro kalma fo ndray haiko fa iro niasaloha.” Naboakandro izy baka tamy Baiboly tao valiny fan̈ontanian̈anany. Ndray zen̈y, Max koa mba nan̈ano raha. Izy foeky, hoizy, nianatra faminanian̈a tamy Baiboly avio nikoran̈iny tamy tanora hafa koa raha nianarany. Ino vokanizen̈y? Karaha ty ho Max: “Tafara zaho nanjary resy lahatra fa baka amy Zan̈ahary ankitin̈y Baiboly.”

6. Ino raha tôkony hataonao izikoa anao misalasala?

⁶ Anao koa ma karaha Max, ke misalasala asa ten̈a marin̈y ankitin̈y raha an̈aty Baiboly ao? Aza men̈atra izikoa zen̈y. Fa ndray zen̈y, anao mila man̈ano raha malaky. Fisalasalan̈a io baka mira raha araiky rofesin̈y. Izikoa izio tsy jirijiren̈a mety handrobaka tsihelihely raha araiky ten̈a valera. Akory basy atao man̈adoso fisalasalan̈a mety handrobaka finoan̈anao? Man̈ontania ten̈a karaha ty: ‘Inoako ma raha koran̈iny Baiboly momba ny amaray?’ Izikoa anao mbala misalasala, anao mila mianatra faminanian̈any Baiboly efa tanteraka. Akory mety han̈anaovanao zen̈y?

AKORY ATAO MIANATRA FAMINANIAN̈A AMY BAIBOLY?

7. Ino raha nan̈ampy Daniela hahay faminanian̈a? (Daniela 12:10) (Zahava koa sary.)

⁷ Karakory atao mianatra faminanian̈a? Daniela nan̈ambela modely tsara amy zen̈y. Tsara antony nahavy izy nianatra faminanian̈a; izy tihahay fahamarin̈ana. Nanetry ten̈a koa Daniela. Hainy fa Jehovah han̈ampy izy hahazo tsara dikany faminanian̈a aby io izikoa izy mifandray marikitry aminany fo sady man̈araka volan̈anany. (Dan. 2:27, 28; vakia Daniela 12:10.) Naboakany fa izy nanetry ten̈a ke nitavandra fan̈ampian̈a tamy Jehovah. (Dan. 2:18) Daniela koa nan̈ano fikarohan̈a. Nitadiaviny tamy Soratra Masin̈y efa nisy tamy fotoan̈a zen̈y valiny fan̈ontanian̈anany. (Jer. 25:11, 12; Dan. 9:2) Akory mety hangalanao tahaka Daniela?

8. Ino mahavy olo sasany mianatra faminanian̈a amy Baiboly? Fa ino raha tôkony hataontsika?

⁸ Diniha nan̈ino anao mianatra faminanian̈a. Izio ma anao ten̈a tihahay fahamarin̈ana? Izikoa zen̈y, Jehovah han̈ampy anao. (Jaona 4:23, 24; 14:16, 17) Fa akory ndraiky olo sasany? Ino mety mahavy iro mianatra faminanian̈a? Olo sasany mety tihitsakaraka porofo ivolan̈ana fa tsy baka amy Zan̈ahary Baiboly. Iro baka mieritreritry fa izikoa Baiboly io tsy baka amy Zan̈ahary, dikanizen̈y iro tompiny fo afaka manapakevitry momba ny tsara ndreky ratsy. Fa atsika ndraiky tsy tôkony han̈ano karaha zen̈y. Mila tsara antony mahavy atsika mianatra. Fa mbala misy toetry araiky hafa maventy koa ilaintsika baka hazava tsarabe amintsika faminanian̈a amy Baiboly.

9. Ino toetry han̈ampy atsika hahay faminanian̈a amy Baiboly? Hazavà.

⁹ Mifen̈a hanetry ten̈a. Jehovah mampan̈anten̈a han̈ampy olo manetry ten̈a. (Jak. 4:6) Zen̈y mahavy atsika mila mivavaka aminany baka han̈ampy atsika hahay dikany faminanian̈a amy Baiboly. Jehovah koa mampiasa panompo atokisan̈a han̈amia atsika hanin̈y arapan̈ahy amy fotoan̈a mety. Ke izikoa atsika manetry ten̈a atsika han̈eky fan̈ampian̈a baka amy panompo io. (Lioka 12:42) Jehovah Zan̈ahariny filaminan̈a. Ke dikanizen̈y, tsy maintsy panompo io zaraiky fo ampiasainy han̈ampy atsika hahay tsarabe fahamarin̈ana an̈aty Volan̈anany ao.​—1 Kor. 14 :33; Efes. 4:4-6.

10. Ino raha ianaranao baka aminy Esther?

¹⁰ Man̈anaova fikarohan̈a. Faminanian̈a araiky mahalian̈a anao antsendriky ianara voanalohany. Zen̈y raha nataony Ranabavy Esther. Nahalian̈a izy faminanian̈a mikoran̈a momba faviany Mesia. Karaha ty hoizy: “Tamy zaho 15 taon̈o, zaho nitsakaraka porofo ahitan̈a fa faminanian̈a aby io nisoratin̈y talohany naviany Jesosy tambony tany teto.” Nandresy lahatra izy raha nivakiny taminy Horonambokiny Ranomasin̈y Maty. “Sasany tamindro horonamboky aby io”, hoizy, “efa voasoratra talohany naviany Kristy, ke dikanizen̈y tsy maintsy baka amy Zan̈ahary fo faminanian̈a an̈atindro io.” Nivolan̈a karaha ty koa Esther: “Tsy maintsy nimpodimpody nivakiko iro io zay vo azoko tsarabe.” Ravoravo izy nan̈ano raha jiaby zen̈y. Izikoa izy efa baka nianatra tsarabe faminanian̈a maromaro tamy Baiboly tao, karaha ty hoizy: “Hitako tsarabe eky zioty fa marin̈y ankitin̈y Baiboly!”

11. Ino mahatsara atsika resy lahatra fa marin̈y Baiboly?

¹¹ Izikoa hitantsika akory nampatanteraka faminanian̈a sasany amy Volan̈a Zan̈ahary, atsika loso matoky Jehovah tsarabe ndreky taridalan̈a jiaby amezany atsika. Iro faminanian̈a amy Baiboly ao koa man̈amia atsika fan̈antinan̈a tsara momba ny amaray. Ke lera atsika mianatra iro io, atsika loso manan̈a fan̈antinan̈a fo ndray miatriky problemo. Atsika iziô handiniky faminanian̈a aroe nisoratiny Daniela sady efa tanteraka aminy andra zioty. Hahay han̈ano fanapahankevitry tsara atsika izikoa mazava tsara amintsika iro io.

INO VOKANY FAHAIZANAO RAHA MOMBA VITY VY MIARO TANIMANGA?

12. Manondro ino ma vity “vy miaro tanimanga mbala len̈y” io? (Daniela 2:41-43)

¹² Vakia Daniela 2:41-43. Tamy nofiny Panjaka Nebokadnezara nazavainy Daniela in̈y, vitiny sarivongana hitany panjaka io “vy miaro tanimanga mbala len̈y.” Faminanian̈a io izikoa ampiran̈iny amy faminanian̈a hafa amy bokiny Daniela ndreky Apokalypsy ao, ho hitantsika fa vity io manondro firenena farany matanjaka aminy andra zioty, tsy azovy fa Firenena Matanjaka Angiley-Amerikain. Karaha ty nivolan̈iny Daniela momba firenena matanjaka io: “Hisy tapany amy fanjakan̈a io hatanjaka, fa tapany ndraiky halemy.” Nan̈ino ma tapanizio halemy? Baka amy raha ataony ankamarozany vahoaka mahavy zen̈y. Iro baka tanimanga mbala len̈y io, ke misakan̈a fanjakan̈a io tsy hatanjaka karaha vy.b

13. Ino aby fahamarin̈ana maventy ianarantsika baka amy faminanian̈a io?

¹³ Maro fahamarin̈ana maventy ianarantsika baka amy raha nivolan̈iny Daniela momba sarivongana in̈y, intsaka eky momba vitinizio. Voanalohany, naboakany Firenena Matanjaka Angiley-Amerikain io fa izy matanjaka aminy ankitin̈y. Izy, ohatra, an̈isany nandresy taminy Ady Lehibe I ndreky II. Fa firenena io fo nahainalemy sady mbala hahaihalemy fo fotony vahoakanany miady amindro samby iro ndreky amy fanjakan̈a. Faharoe, izio firenena matanjaka farany alohany Fanjakan̈any Zan̈ahary han̈afoan̈a fanjakan̈anolombelon̈o jiaby. Ke nata misy firenena hafa ndraikindraiky miady amy Firenena Matanjaka Angiley-Amerikain io, iro tsy hahavita hangala pilasinany. Akory ahaizantsika zen̈y? Fotony “vato” manondro Fanjakan̈any Zan̈ahary io hanorotoro vitiny sarivongana io, na Firenena Matanjaka Angiley-Amerikain.​—Dan. 2:34, 35, 44, 45.

14. Nan̈ino fahaizan̈a faminanian̈a momba vity vy miaro tanimanga io han̈ampy atsika hahay hanapakevitry?

¹⁴ Mino ma anao fa marin̈y faminanian̈any Daniela momba vity vy miaro tanimanga io? Izikoa zen̈y, ho hita amy fomba fiain̈ananao raha zen̈y. Anao tsy ho rikian̈a hamory vola ndreky fanan̈ana fotony hainao fa tsy ho ela donia ratsy ty ho ravan̈a. (Lioka 12:16-21; 1 Jaona 2:15-17) Fahaizanao dikany faminanian̈a io koa han̈ampy anao hahita fa ten̈a raha maventy asa fitorian̈a ndreky fampianaran̈a. (Mat. 6:33; 28:18-20) Atsika tio baka nandiniky faminanian̈a io, ke anao mety man̈ontany ten̈a karaha ty: ‘Hita amy fanapahankevitry ataoko ma fa zaho resy lahatra fa efa tsy ela Fanjakan̈any Zan̈ahary han̈afoan̈a fanjakan̈anolombelon̈o jiaby?’

INO VOKANY FAHAIZANAO PANJAKANY AVARATRA NDREKY ATSIMO?

15. Azovy “panjakany avaratra” ndreky “panjakany atsimo” amy zioty? (Daniela 11:40)

¹⁵ Vakia Daniela 11:40. Daniela toko faha-​11 mikoran̈a momba panjaka aroe, na fitondrampanjakan̈a aroe, mifan̈oesa. Izikoa anao mizaha faminanian̈a hafa amy Baiboly ao, ho hitanao fa “panjakany avaratra” io manondro Russie ndreky firenena miaraka aminany, fa “panjakany atsimo” ndraiky manondro Firenena Matanjaka Angiley-Amerikain.c

16. Ino raha sarotro tojy panompony Jehovah amy faritry hanjakany “panjakany avaratra”?

¹⁶ “Panjakany avaratra” io man̈enjiky mare panompony Jehovah miain̈y amy faritry hanjakany. Sasany amindro popohin̈y ndreky gadrain̈y nohony finoan̈andro. Fa zen̈y tsy mampavozo iro rahalahintsika aby io, fa mahaimankafatatra finoan̈andro fo. Haindro baka fa fan̈injehan̈a vahoakany Jehovah io man̈atanteraka faminanian̈a amy bokiny Daniela.d (Dan. 11:41) Fahaizantsika raha zen̈y mety han̈ampy atsika hankafatatra fan̈antinan̈antsika fo ndreky tsy hivadiky amy Jehovah.

17. Ino raha sarotro tojy panompony Jehovah amy faritry hanjakany “panjakany atsimo”?

¹⁷ “Panjakany atsimo” io koa taloha nan̈enjiky mare vahoakany Jehovah. Taminy Ady Lehibe I ndreky II, ohatra, maro tamindro rahalahintsika aby io nalefa prizon fotony tsy nan̈eky handeha hiady. Nisy tsaiky sasany koa niroasin̈y ta lekoly fotony tsy nety nanangantsain̈y. Fa tato ato ndraiky, nisy raha hafa koa nitsapa tsy fivadihan̈any panompony Jehovah miain̈y amy faritry hanjakany “panjakany atsimo.” Ohatra, lera fotoan̈any fifidianan̈a in̈y Kristianin̈y araiky mety hitady hanohan̈a antoko politiky na kandidà araiky. Marin̈y ndraiky fa izy tsy handeha hifidy, kanefa izy mety hieritreritry fa misy antoko politiky araiky tsaratsara tozay araiky. Zen̈y mahavy atsika mila mitandrin̈y tsy hilan̈y amy politiky foeky, tsy amy raha ataontsika fo fa firaka an̈aty jerintsika ndreky fontsika an̈y koa.​—Jaona 15:18, 19; 18:36.

18. Tôkony hampavozo atsika ma adiny “panjakany avaratra” ndreky “panjakany atsimo”? (Zahava koa sary.)

¹⁸ Mety hiasaloha mare iro olo tsy mino faminanian̈a aby amy Baiboly ao izikoa fa mahita “panjakany atsimo” “mifanoto” amy “panjakany avaratra.” (Dan. 11:40, l.p.a.) Iro panjaka aroe io baka samby manan̈a bomby nikleaira mahavita mamono raha jiaby manampahin̈ana ambony tany eto. Haintsika ndraiky fa tsisy andra Jehovah han̈ambela raha karaha zen̈y hiboaka. (Isaia 45:18) Ke atsika tsy vaky asaloha ndray mifankalain̈y “panjakany avaratra” ndreky “panjakany atsimo.” Ndray raha zen̈y aby mahaimankafatatra finoan̈antsika fo. Izio baka man̈ambara amintsika fa efa marikitry farany donia ty.

AZA VOLY MANDINIKY FAMINANIAN̈A

19. Ino raha tsy mila adin̈antsika momba faminanian̈a amy Baiboly?

¹⁹ Tsy haintsika akory hampatanteraka faminanian̈a sasany koran̈iny Baiboly. Ndray paminan̈y Daniela koa tsy ten̈a nahay dikany raha jiaby nisoratiny. (Dan. 12:8, 9) Fa nata tsy haintsika tsarabe fomba hampatanteraka faminanian̈a araiky, zen̈y tsy midika fa izio tsy ho tanteraka. Atsika afaka matoky fa karaha nataony Jehovah taminy andra taloha tan̈y, tsy maintsy mbala hambarany atsika fo koa amy fotoan̈a mety lan̈iany raha mila haintsika.​—Amosa 3:7.

20. Ino aby faminanian̈a ho tanteraka tsy ho ela, avio atsika tsy tôkony ho voly han̈ano ino?

²⁰ Ho hisy filazan̈a momba “fiadan̈ana ndreky filaminan̈a.” (1 Tes. 5:3) Afaranizen̈y, iro fanjakan̈a aby io hanafiky ndreky handravan̈a fivavahan̈a diso. (Apok. 17:16, 17) Iro baka io hanafiky vahoakany Zan̈ahary. (Ezek. 38:18, 19) Ke ady Aramagedona amy zay hamaran̈a raha jiaby zen̈y. (Apok. 16:14, 16) Atsika afaka matoky tsarabe fa hiboaka tsy ho ela raha aby zen̈y. Fa mandrapavianizen̈y fo, irarian̈a atsika tsy voly han̈aboaka fa atsika mankasitraka Babantsika be fitiavan̈a andan̈itry an̈y, ke handiniky iro faminanian̈a amy Baiboly avio han̈ampy olo han̈ano ambaka zen̈y koa.