Fanjakan̈any Zan̈ahary​—Nan̈ino ma Izio Raha Maventy Tamy Jesosy?

Karaha hitantsika tamy lahatsoratra taloha in̈y, Jesosy nifantoko tamy fitorian̈a ndreky fan̈ambaran̈a vaovao tsara momba Fanjakan̈any Zan̈ahary. (Lioka 8:1) Izy tsy nijijy tamban̈a foeky, fa loso izy nandeha anjatony kilometara, nitety erany taniny Israely, nampianatra olo momba Fanjakan̈any Zan̈ahary. Fanompoan̈a nataony Jesosy io avoatantara amy Filazantsara efatra amy Baiboly ao. Ary mandilatrany injato mimpody ao koran̈a momba Fanjakan̈any Zan̈ahary io. Ankamaraozany zen̈y hita amy raha nivolan̈iny Jesosy. Fa mbala mety tsendriky raha jiaby nikoran̈iny momba Fanjakan̈any Zan̈ahary aby zen̈y, fa mety mbala tapatapany fo.​—Jaona 21:25.

Nan̈ino ma Fanjakan̈any Zan̈ahary io ten̈a nisy dikany mare tamy Jesosy, taminizy tambony tany tatỳ? Efa hainy Jesosy fa izy nifidiny Zan̈ahary hitondra Fanjakan̈a io. (Isaia 9:6; Lioka 22:28-30) Kanefa tsy tamy fahifan̈a na voninahitry ho azony zen̈y raha ten̈a nifantohany. (Matio 11:29; Marka 10:17, 18) Tsy nohony tombontsoa ho azony zen̈y nahavy izy nikoran̈a mare momba Fanjakan̈a io. Fa antony voanalohany nahavy Fanjakan̈aa io ten̈a nisy dikany taminany, fotony hainy raha handeha hataonizio niny Babany andan̈itry an̈y, ndreky nindro pan̈aradia izy tsy mivadiky aby io. Samby tiany mare baka iro io.

RAHA HANDEHA HATAONY FANJAKAN̈A IO NINY BABANY JESOSY

Tiany Jesosy mare Babany andan̈itry an̈y io. (Ohabolana 8:30; Jaona 14:31) Tiany mare koa iro toetriny Babany maro tsara aby io, sasany amy zen̈y fitiavan̈a, fahaizany mahinakinaka, fan̈anaovany rariny. (Deoteronomia 32:4; Isaia 49:15; 1 Jaona 4:8) Hay tsarabe koa fa, farandraha halany Jesosy mare maharen̈y vandy aparitaka momba Babany. Ohatra ziô vandy mikoran̈a fa, tsy jireny Zan̈ahary zen̈y jaly mavoa olombelon̈o, ndreky tiany Zan̈ahary zen̈y mahita atsika mijaly. Zen̈y antony araiky mahavy Jesosy nazoto mare nan̈ambara “vaovao tsarany Fanjakan̈a io.” (Matio 4:23; 6:9, 10) Hainy baka fa andra araiky an̈y Fanjakan̈a io han̈ano raha tsy hankaratsianolo Babany io eky. Amy karakory?

Jehovah hampiasa Fanjakan̈anany io han̈anaovan̈a fan̈ovoan̈a maventy. Ke raha zen̈y hitondra hatsaran̈a aminolombelon̈o ambony tany. “Izy hamafa ranomaso” amy masonolombelon̈o tsy mivadiky. Hadosony Jehovah raha aby mahavy iro io mitomoan̈y, ke “fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy.” (Apokalypsy 21:3, 4) Hampiasa Fanjakan̈anany io Zan̈ahary han̈afoan̈ana raha jiaby mampijaly olombelon̈o.b

Ke tsy mahagaga eky izikoa nazoto mare Jesosy nikoran̈a momba Fanjakan̈a io taminolo! Hainy fa ho hita baka amizio fa Babany io matanjaka mare sady ten̈a mahinakinaka. (Jakoba 5:11) Hainy Jesosy koa fa Fanjakan̈a io hitondra hatsaran̈a aminolombelon̈o tsy mivadiky. Tiany mare baka iro.

RAHA HANDEHA HATAONY FANJAKAN̈A IO NINOLOMBELON̈O TSY MIVADIKY

Ela be talohany naviany tambony tany tatỳ, Jesosy niain̈y niaraka Babany tandan̈itry tan̈y. Izy nampiasainy Zan̈ahary hiasa raha jiaby. Tao ziô lan̈itry maharikian̈a sady feno lakintan̈a ndreky vahindan̈itry, baka io koa tany tsarabe misy atsika ty, miaraka amy biby jiaby. (Kolosianina 1:15, 16) Fa ‘ten̈a tiany’ Jesosy mare koa olombelon̈o.​—Ohabolana 8:31.

Hita tamy fanompoan̈a nataony Jesosy fa izy ten̈a tia olombelon̈o. Rango tamboanalohany efa nambarany fa nahavy izy navy tambony tany tatỳ, handeha “han̈ambara vaovao tsara” aminolo mila fan̈ampian̈a. (Lioka 4:18) Fa izy tsy raha vitany nivolan̈a fa han̈ampy olo fo fa, nan̈ano raha koa izy han̈aboahan̈a fa tiany ankitin̈y olo. Izikoa, ohatra, fa nisy olo maro navy hitandren̈y izy, “nahinakinaka iro” Jesosy, “ke nampahivan̈a lan̈iany olo narary.” (Matio 14:14) Nisy lelahy araiky zay nijaly mare taminy aretin̈y navoa izy. Izy nivolan̈a tamy Jesosy fa izy mino fa Jesosy afaka mampajanga izy izikoa tiany. Nahinakinaka lelahy io Jesosy ke nivolan̈a: “Tiako ke! Irarian̈a anao hadio.” (Lioka 5:12, 13) Naty Lazarosy anadahiny Maria, kamaradiny Jesosy. Ke izikoa fa hitany Jesosy i Maria nitomoan̈y anadahiny io, “nalahelo mare” Jesosy, ke ‘latsaka foeky ranomasonany.’ (Jaona 11:32-36) Ke izy nan̈ano fahagagan̈a. Nimpody nivilominy ndraiky Lazarosy, nata efa naty efatra andra!​—Jaona 11:38-44.

Hainy Jesosy fa raha nataony aby zen̈y mety tsy hahadin̈y ela. Hainy baka fa tsy niany tsy amaray, olo aby nisitran̈iny aby io mbala mety harary fo, avio iro nivilominy aby in̈y mbala hofoaty fo koa. Fa hainy Jesosy koa fa Fanjakan̈any Zan̈ahary mbala handeha han̈afoan̈a problemo aby io mandrakizay. Zen̈y nahavy izy nazoto mare nan̈ambara “vaovao tsara momba Fanjakan̈a io”, fa tsy basiny nan̈ano fahagagan̈a fo. (Matio 9:35) Fahagagan̈a nataony Jesosy aby in̈y man̈aboaka raha mbala handeha hataony Fanjakan̈any Zan̈ahary io tsy ho ela, erantany. Ty ziô fampan̈antinan̈a sasany volan̈iny Baiboly fa ho tanteraka amy zen̈y:

• Fa tsy ho hisy eky aretin̈y.

  “Amy zen̈y, olo gila hahita, olo maren̈iny haharen̈y. Olo malemy vity hahavita han̈aniky bongo mira serfa in̈y, baka io olo moa hihira mare.” Tsy basinizen̈y fa, “tsisy aminolo mipetraka ao hivolan̈a: ‘Zaho zen̈y marary ay.’”​—Isaia 33:24; 35:5, 6.

• 

  Tsisy eky fahafatesan̈a.

  “Olo marin̈y handova tany ty, ke hipetraka iô tsisy farany.”​—Salamo 37:29.

  “Fahafatesan̈a hifoan̈any tsy ho hisy eky. Jehovah Tompo Farany An̈abo koa hamafa ranomaso amy saoranolo jiaby.”​—Isaia 25:8.

• Ho velon̈o ndraiky iro olo efa naty aby in̈y.

  ‘Iro jiaby ampasan̈a an̈y haharen̈y feonany, ke iro hiboaka.’​—Jaona 5:28, 29.

  Olo maty “mbala hivilomin̈y.”​—Asan’ny Apostoly 24:15.

• 

  Olo jiaby hanan̈a tran̈o ndreky asa.

  “Olo han̈amboatra tran̈o ke hipetraka ao, baka io iro hitsabo rezain ke hihina vokatra amy zen̈y. Olo tsy han̈amboatra tran̈o hipitrahanolo hafa zen̈y, baka io koa iro tsy hitsabo raha hohaninolo hafa. ... Olo nifidiko han̈erampô aminy asany tan̈andro.”​—Isaia 65:21, 22.

• 

  Fa tsisy eky ady.

  “Izy mampijanon̈o ady amy tany jiaby.”​—Salamo 46:9.

  “Firenena aby io tsy hampanonga sabatra hamangoan̈a naman̈a eky, baka io iro tsy hianatra hiady eky.”​—Isaia 2:4.

• 

  Ho treka hanin̈y.

  “Tany hamokatra. Zan̈ahary, ia, Zan̈aharintsika hitahy atsika.”​—Salamo 67:6.

  “Hahavokatra be tany; ho maro be vokatra, na firaka antampony bongo an̈y.”​—Salamo 72:16.

• Fa tsisy eky olo masikiny.

  “Fa olo masikiny ndraiky tsy ho adin̈a foeky.” ​—Salamo 9:18.

  “Izy hamonjy masikiny mitarain̈y ndreky mijaly tsisy pamonjy; hahinakinaka olo ambany ndreky olo masikiny izy, baka io hamonjy ain̈indro.”​—Salamo 72:12, 13.

Izikoa anao fa baka nandiniky raha aby handeha ataony Fanjakan̈any Zan̈ahary io, asa hitanao nan̈ino Fanjakan̈a io ten̈a nisy dikany mare tamy Jesosy? Taminizy tambony tany tatỳ, izy nazoto mare nikoran̈a taminolo jiaby nitandren̈y izy momba Fanjakan̈any io, fotony hainy fa izio handeha han̈afoan̈a raha manahiran̈a jiaby misy aminy andrantsika izioty.

Tianao ma raha aby hampan̈antinainy Baiboly fa handeha ataony Fanjakan̈any Zan̈ahary? Izikoa zen̈y, akory mety hahaizanao raha maro mikasiky Fanjakan̈a io? Baka io, ino raha mety hataonao baka anao hahazo hatsaran̈a amy raha handeha hataonizio? Mamaly fan̈ontanian̈a aby zen̈y amy lahatsoratra farany.