Nan̈ino ma Anaro Tsy Man̈eky Ampidiran̈a Lio?

Hevitry diso anan̈anolo

Tsy Marin̈y: Vavolombelon̈o Jehovah tsy mandeha dokotera.

Marin̈y: Zahay na zanakanay koa fa marary, zahay mandeha dokotera. Zahay koa tsy maintsy didian̈a, zahay mitady dokotera mahay ndreky man̈eky tsy hampiditry lio aminay. Zahay mankasitraka fandrosoan̈a amy resaka fitahan̈a aretin̈y. Aminandra izioty koa, efa maro olo marary tsy mety ampidiran̈a lio, nata iro tsy Vavolombelon̈o Jehovah, fotony hitandro fa maro karazan̈a aretin̈y mifindra baka amy lionolo.

Tsy Marin̈y: Vavolombelon̈o Jehovah koa fa marary, ivavahan̈a fo efa janga edy.

Marin̈y: Zahay tsy man̈ano fahagagan̈a hitahan̈a olo.

Tsy Marin̈y: Tsy vitanolo fitahan̈a tsy ampiasan̈a lio io, fotony lafo loatra.

Marin̈y: Maro olo didian̈a tsy ampidiran̈a lio.a

Tsy Marin̈y: Isaka taon̈o, maro Vavolombelon̈o Jehovah ndreky zanakandro maty, fotony tsy nety nampidiran̈a lio.

Marin̈y: Tsy marin̈y zen̈y, fotony maro Vavolombelon̈o Jehovah didian̈a fo na atao didy farany sarotro, kanefa iro tsy maty abyb. Ny raha ten̈a hita fo, olo tsy ampidiran̈a lio ten̈a malaky janga, toizay olo ampidiran̈a lio.c Tsisy olo mahavita mivolan̈a fa olo araiky koa ampidiran̈a lio, izy tsy hofoaty zen̈y.

Ino mahavy Vavolombelon̈o Jehovah tsy mampiditry lio?

Tsy raha baka amy fahasalaman̈a fo mahavy iro tsy mety mampiditry lio, fa baka amy raha inoandro amy Baiboly ao koa. Baiboly (Testamenta Taloha ndreky Testamenta Vaovao) mivolan̈a fa tsy mahazo mihina lio. (Genesisy 9:4; Levitikosy 17:10; Deoteronomia 12:23; Asan’ny Apostoly 15:28, 29) Amy Zan̈ahary, lio io fahin̈ana. (Levitikosy 17:14) Ke zahay tsy man̈eky ampidiran̈a lio, fotony zahay man̈araka volan̈a Zan̈ahary mila fady lio io. Ke zahay man̈aja izy, fotony izy nan̈amia fahin̈ana io.

Niova hevitry

Taloha tan̈y, naro olo nieritreritry fa olo araiky koa tsy man̈eky ampidiran̈a lio, mira mamono ten̈a fo. Kanefa niova raha zen̈y izioty. Ohatra, tamy 2004, karaha ty koran̈iny gazety araiky momba zen̈y: “Nanjary mahazatra olo maro man̈araka fomba fitahan̈a tsisy fampidiran̈a lio, karaha fatao amy Vavolombelon̈o Jehovah.”d Karaha ty koran̈iny gazety Heart, Lung and Circulation, niboaka tamy 2010: ‘Tsy Vavolombelon̈o Jehovah zaraiky fo tsy han̈eky ampidiran̈a lio, fa olo jiaby koa.’

Erantany, mandeha andrivony dokotera efa tsy mampiditry lio aminolo marary tahany. Efa maro koa man̈ano zen̈y amy tany mahantra. Maro koa olo tsy Vavolombelon̈o Jehovah, mifidy tsy ampidiran̈a lio.