8 MIFEN̈A BAKA ANARO HO MODELY TSARA

KARAKORY MA ZEN̈Y?

Raimandreny tokony han̈araka raha ampianarindro zanakandro. Ohatra, izikoa misy olo mitady anaro, ke anaro mivolan̈a amy zanakanaro: “Izikoa misy olo avy iô, volàn̈a zahay tsy ato.” Akory mety fahitany zanakanaro anaro? Tsy hanjary havandy koa iro afara an̈y?

“Misy fivolan̈ana zay karaha ty: ‘Raha volan̈iko fo areha, fa tsy raha ataoko.’ Tsy marin̈y amy tsaiky raha zen̈y. Tsaiky baka tia man̈araka raha jiaby ren̈indro ndreky hitandro ataonolo. Ndray iro koa mahita anao man̈ano raha nivolan̈anao iro in̈y, anao fa volan̈indro edy.”—Davida.

TOROHEVITRINY BAIBOLY: “Anao mitory aminolo ‘aza mangalatra io’, tsy mangalatra marin̈y ma anao?”—Romanina 2:21.

NAN̈INO RAHA ZEN̈Y TEN̈A ILAIN̈A?

Amy tsaiky ndreky tanora, raha koran̈iny raimandrenindro ten̈a malaka amindro tozay raha koran̈inolo miramira taon̈o amindro. Ke anaro tokony han̈ambara iro lalan̈a tokony himboandro. Zen̈y aviany anaro mila man̈ano raha volan̈inaro amindro.

“Izikoa misy raha ampodinao injato amindro, kanefa anao indraiky fo tsy nan̈araka zin̈y, in̈y tsy mety hadin̈andro. Iro raha mizaha raha ataontsika fo, ndray izio sambarantsika tsy jirendro.”—Nicole.

TOROHEVITRINY BAIBOLY: “Fahendrena baka an̈abo an̈y ndraiky ... tsy mihatsaravelatsihy.”—Jakoba 3:17.

INO HEVITRY?

Aleva onon̈o raha ataonao. Ino fangalan̈a diandian̈a tianaro? Akory fifampitondrasanaro fivadiany? Akory fitondrasanaro zanakanaro? Olo karakory kamaradinaro? Anaro ma mba tsara fan̈ahy aminolo? Izikoa atao volan̈a araiky fan̈ontanian̈a jiaby zen̈y: Modely tsara amy zanakanaro ma anaro?

“Izikoa fa raha tsy vitanay roe fivadiany han̈ano izy, io tsy ampan̈anovinay zanakanay.”—Christine.

Mahaiza miala tsin̈y koa fa diso anaro. Hainy zanakanaro fa anaro koa mba mahay diso. Ke anaro koa diso, man̈anova “azafady” aminaro samy anaro ndreky amy zanakanaro. Ho hitandro amy zen̈y fa ten̈a tsy mila man̈ambony ten̈a ndreky mila miala tsin̈y koa iro koa diso.

“Tsaiky koa maharen̈y atsika raimandreny miala tsin̈y koa fa diso, ho mora amindro koa han̈ano karaha zen̈y iro koa fa man̈ano raha tsy mety.”—Sandrine.