Tantara 16

Isaka Nahazo Vady Tsara

HAINAO azôvy man̈angy io? Rebeka an̈arany. Lelahy handeha atôn̈iny io, Isaka. Man̈angy io hanjary vadin’Isaka. Karakôry ma nampanety raha zen̈y?

Tian’Abrahama hahazo vady tsara Isaka zanany. Tsy tiany Isaka hanambady man̈angy boaka amy tany Kanana, fôtony irô nanompo zan̈ahary tsy izy. Zen̈y nahavy Abrahama nan̈iraka ampiasanany. Volan̈iny: ‘Mindao kony anao mimpody amin-dry havako mipetraka Harana an̈y. Anao koa avy an̈y, tadiava vady Isaka, zanako.’ 

Ampiasan’Abrahama tsy nirekireky nangala rameva folo, baka iô nan̈ano diabe. Izy koa fa navy marikitry tany ipitrahan’ny havan’Abrahama, nidôko marikitry vôvo antsendriky. Efa ho tsôfotro andra tamy zen̈y, ho avy tsaiky man̈angy aby an-tanàna hantsaka amy vôvo. Ampiasan’Abrahama in̈y amy zay nankôhoko, nivavaka tamy Jehovah. Volan̈iny: ‘Irarian̈a man̈angy mety han̈amia rano higiako ndreky higiahin’ny rameva aby ty, man̈angy nifidinao vadin’Isaka.’

Koa fa refindrefiny, Rebeka navy hangala rano. Ampiasa io koa fa nangataka rano taminany, namiany. Baka iô, nangala rano koa izy hamian̈a rameva jiaby. Rameva aby io tamy zen̈y sakara. Tsy mora mampigiaka rameva zen̈y, fôtony izio biby farany migiaka eky.

Izikoa fa vitan’i Rebeka zen̈y, ampiasan’Abrahama io nan̈ontany izy an̈aran̈a babany. Ampiasa io nan̈ontany koa, izikoa izy mety mipetraka amin-drô an̈y alin̈y araiky. Nambarany: ‘Betoela an̈aran̈a babako, zahay misy tran̈o mety hipitrahanao.’ Ampiasan’Abrahama nahay fa Betoela io zanaka rahalahin’Abrahama, Nahora an̈arany. Izy baka tiô nandohaliky, nan̈ano mersỳ Jehovah, fôtony koa tsy Jehovah tsy hitany tany nisy havan’Abrahama.

Alin̈in’izin̈y fo, ampiasan’Abrahama nitantara tamy Betoela ndreky Labana anadahin’i Rebeka, antony naviany tan̈y. Irô’roe samy nan̈eky fa Rebeka mahazo mandeha miaraka aminany, atao vadin’Isaka. Ino raha nambaran’i Rebeka izikoa izy fa nan̈ontanian̈a? ‘Ia’, volan̈iny. Izy handeha. Kiakan’izin̈y fo irô fa nandeha, nitenginy rameva, nan̈ano diabe himpody ta Kanana.

Arivariva andra tamin’irô navy tan̈y. Rebeka nahita lelahy araiky nitsangatsangana tamy kijà. Kaiky izio Isaka. Izy ravoravo nahita Rebeka. Saraha, reniny niteraka izy, naty efa telo taon̈o zay, ke izy mbala nalahelo fo. Isaka iziô nanjary sambatra, fôtony tiany mare Rebeka.

Genesisy 24:1-67.