Tantara 29

Nan̈ino Mosesy Nilefa

ZAHAVA baka Mosesy milefa boaka Ejipta. Hitanao lelahy aby man̈ian̈a izy io? Hainao nan̈ino irô mila hamono Mosesy? Alô zahavatsika.

Farao, ampanjakan’Ejipta, nitarimy Mosesy zisk’izy be. Izy nanjary nahay raha ndreky nalaza be. Mosesy nahay fa babany ndreky mamany niteraka izy tsy Ejipsianin̈y, fa Israelita andevo.

Mosesy koa fa 40 taon̈o, nandeha nizaha akôry nanin-drô olo fehitry araiky aminany aby io. Israelita aby io nampijalin̈a tsisy ambaka izy. Izy nahita Ejipsianin̈y araiky, mamango Israelita andevo araiky. Mosesy nizahazaha tsao hitan’olo. Koa fa hitany fa tsisy olo nahita, nivangoeny Ejipsianin̈y io, baka iô naty. Nalevin’i Mosesy tan̈aty jia amy zay fatinany.

Amarain’izin̈y, Mosesy nimpody nizaha olo fehitry araiky aminany aby io. Tan̈aty jerinany izy mahavita man̈avotro irô, beky irô tsy andevo eky. Mosesy nahita lelahy israelita aroe niady. Nivolan̈iny tamin’araiky nitariky ady io: ‘Nan̈ino ma rahalahinao vangoenao manafo?’

Lelahy io nivolan̈a taminany: ‘Azôvy ma nan̈iraka anao mitsara zahay? Anao ma mila hamono zaho, karaha nataonao namono Ejipsianin̈y in̈y?’

Mosesy nivadiky navozo. Hainy fa nisy olo nahita raha nataony Ejipsianin̈y in̈y. Farao koa fa naharen̈y raha nataony in̈y, nan̈iraka olo hamono Mosesy. Zen̈y nahavy Mosesy tsy maintsy nilefa, niala ta Ejipta.

Mosesy koa fa niala lavitry Ejipta, navy tamy tany Midiana. Tan̈y izy nahita Jetro ndreky ry zanany. Zipora, zanaka Jetro amy zay nalainy vady. Mosesy nanjary mpiambin̈y ôndrikôndriky. Izy nitarimy ôndrikôndrikin’i Jetro. Tan̈atin’ny 40 taon̈o izy nipetraka ta Midiana tan̈y. Izy iziô 80 taon̈o. Tandraraiky, Mosesy niambin̈y ôndrikôndrikin’i Jetro. Izy nahita raha nampagaga nampiaova fiain̈ananany jiaby. Avadiha baka boky, atsika hizaha nino raha mampagaga io.

Eksodosy 2:11-25; Asan’ny Apostoly 7:22-29.