Kakazo Nirehitry!

Nidoko ta Medianin̈y 40 taon̈o Mosesy. Nanambady izy tan̈y sady niteraka. Tandraraiky, niambin̈y ondrikondrikinany marikitry Bongo Sinay izy, nisy raha hafahafa hitany. Nisy kakazo nirehitry, kanefa tsy nay! Mosesy koa fa nan̈aton̈o hizaha izio tsarabe, nisy feo baka tao nivolan̈a: ‘Mosesy! Aza man̈aton̈o marikitry atỳ. Adosoa kiraronao fotony tany tsangananao io masin̈y.’ Jehovah izio, fa izy nampiasa anjely.

Navozo Mosesy, ke nitakofany soranany. Volan̈iny feo io: ‘Hitako jalindro Israelita aby io. Han̈avotro iro aminy Ezipsianin̈y zaho, avio hitondra iro amy tany tsara. Anao tiako hitariky vahoakanaka hiboaka baka Ezipta.’ Mety taitry Mosesy, sa karakory?

Ho Mosesy: ‘Ino raha volan̈iko, iro koa man̈ontany azovy nan̈iraka zaho?’ Zan̈ahary nivolan̈a: ‘Volàn̈a amindro fa Jehovah, Zan̈ahariny Abrahama, Zan̈ahariny Isaka, ndreky Zan̈ahariny Jakoba nan̈iraka anao.’ Mosesy nivolan̈a: ‘Ke iro koa tsy mitandren̈y zaho ke?’ Jehovah nan̈ano raha han̈amezan̈a toky Mosesy. Nirahiny natsipiny Mosesy tamy tany tongozonany. Nanjary bibilava tongozo io. Koa fa nisamboriny Mosesy rambony raha io, nimpody tongozo. Ho Jehovah: ‘Koa ataonao raha io, iro hatoky fa zaho nan̈iraka anao.’

Ho Mosesy: ‘Zaho olo tsy mahay mivolan̈a.’ Ho Jehovah: ‘Zaho han̈ambara anao raha tokony volan̈inao, hirahiko han̈ampy anao Arona rahalahinao.’ Koa fa hainy Mosesy fa han̈ampy izy Jehovah, loso izy ndreky vadiny, baka io ry zanany nandeha ta Ezipta.