Tantara 49

Tsy Nety Tsôfotro Andra

ZAHAVA baka Josoa. Izy iô mivolan̈a: ‘Masoandra, midokoa iô!’ Ke tsy nety tsôfotro andra tamy zen̈y. Tan̈atin’ny andra araiky masoandra nidôko tan̈ivon’ny lan̈itry tarỳ fo. Jehovah nampan̈ano izy karaha zen̈y! Alô zahavatsika antony itiavan’i Josoa andra tsy tsôfotro.

Ampanjaka dimy ratsy fan̈ahy aby ta Kanana in̈y koa fa nanampôno niady tamy Gibeonita, Gibeonita aby io nan̈iraka lelahy araiky, hitady vonjy tamy Josoa. Volan̈iny: ‘Mavia aminay an̈y malaky, vonjia zahay! Ampanjaka jiaby boaka lavitry navy, hiady amy mpanomponao.’

Niaraka tamy zen̈y, Josoa ndreky maramilanany jiaby nandeha. Irô nandeha tan̈atin’ny alin̈y araiky. Irô koa fa navy ta Gibeona, maramilan-drô ampanjaka dimy aby in̈y navozo, ke nanampôno nilefa. Jehovah amy zay nandatsaka bolongan’ny lagilasy. Lagilasy in̈y nahafaty maramila maro toizay maramilan’i Josoa.

Josoa nahita fa ho tsôfotro andra. Izikoa baka mahiziky andra, maramilan-drô ampanjaka dimy ratsy fan̈ahy aby io hilefa. Ke Josoa nivavaka tamy Jehovah, nivolan̈a: ‘Masoandra, midokoa iô!’ Masoandra koa fa nidôko tamy lan̈itry tarỳ, Israelita aby io niady fo zisk’irô nandresy.

Ta Kanana tan̈y, mbala maro fo ampanjaka ratsy fan̈ahy tsy tia olon’ny Zan̈ahary. Tan̈atin’ny tsiaota taon̈o, Josoa ndreky maramilanany vo naharesy ampanjaka 31 tamy tany io. Izikoa fa vita zen̈y, Josoa nirasa tany tamy foko aby mbala tsendriky nahazo tany.

Koa fa nandeha taon̈o, naty Josoa. Izy tamy zen̈y 110 taon̈o. Tamin’izy ndreky ry namany mbala velon̈o, olo nan̈araka volan̈a Jehovah. Fa irô koa fa naty, olo nanampôno nan̈ano raha ratsy koa, ke nazon-draha. Irô tamy zen̈y ten̈a nila Zan̈ahary han̈ampy irô.

Josoa 10:6-15; 12:7-24; 14:1-5; Mpitsara 2:8-13.