Fianaragna Faha-2
Azôvy ma Zagnahary Zegny?
Ino raha ahaizagna taigna Zagnahary, boaka iô azôvy agnarany? (1, 2)
Ino vatagnanany? (3)
Ino aby toetrinany miavaka? (4)
Mety atao mampiasa sary masigny na sarin-draha hafa izikoa fa mivavaka aminany? (5)
Ino faomba aroe mety ahaizatsika Zagnahary? (6)
1. Maro raha ivavahan’olo. Fa kanaifa Baiboly mivolagna fa araiky fo Zagnahary MARIGNY. Izy nagnamboatra raha jiaby an-dagnitry agny ndraiky ambony tany eto. Izy zaraiky fo tôkony hivavahatsika, fôtony boaka taminany nazahoatsika fahignana.—1 Korintianina 8:5, 6; Apokalypsy 4:11.
2. Managna agnaragna fagnajagna maro Zagnahary, fa araiky fo taigna agnarany: JEHOVAH. Amin’ankamaraozan’ny Baiboly, nadoso na nisoloagna agnaragna fagnajagna TÔMPO na ZAGNAHARY agnarany. Kanaifa, tamy fotoagna nanoratagna Baiboly, nisy im-7 000 agnaragna Jehovah io voasaoratra tao.—Eksodosy 3:15; Salamo 83:18.
3. Zagnahary managna vatagna, fa tsy miragna nintsika fo. Volagnin’ny Baiboly: “Fagnahy Zagnahary.” (Jaona 4:24) Tsisy olo afaka mahita Zagnahary. Jehovah mipaitraka an-dagnitry agny, kanaifa izy mahita zay raha ataotsika. (Salamo 11:4, 5; Jaona 1:18) Ino fo fagnahy masigny zegny? Tsy Zagnahary izio fa angôvo indesiny magnano raha tiany hatao.—Salamo 104:30.
4. Ambaran’ny Baiboly amitsika fa toetrin’ny Zagnahary miavaka: fitiavagna, tia rariny, misaigny, be angôvo. (Deoteronomia 32:4; Joba 12:13; Isaia 40:26; 1 Jaona 4:8) Mivolagna amitsika Baiboly fa izy mamindra fô, tsara fagnahy, magnambaila adisovagna, tsy matity, boaka iô mahari-draha. Karaha ataon’ny tsaiky araiky tia magnaraka volagnan’olobeny, atsika tôkony hifegny hagnaraka toetrin’ny Zagnahary.—Efesianina 5:1, 2.
5. Mety ma mankôhoko na mivavaka amy sary masigny, na raha hafa laira mivavaka aminany? Tsy mety. (Eksodosy 20:4, 5) Jehovah nivolagna fa izy zaraiky fo tôkony hivavahatsika. Voninahitrinany tsy amiany olo na raha hafa foeky. Fagnampin’izegny, sary masigny tsy afaka magnampy atsika.—Salamo 115:4-8; Isaia 42:8.
6. Akôry faomba ahaizatsika Zagnahary tsarabe? Voanalohany, atsika mila mizaha raha namboariny ndraiky mandiniky laligny maomba raha tian’izigny volagniny amitsika. Boaka amy raha namboariny ahitatsika fa be angôvo Zagnahary, maro ankitigny fahaizagna anagnany sady tia atsika izy. (Salamo 19:1-6; Romanina 1:20) Fianaragna Baiboly koa faomba araiky hafa ahaizagna Zagnahary. Agnatin’izio taigna ahitatsika toetrinany. Ambarany atsika koa raha mbala tiany hatao ndraiky raha tiany hataotsika.—Amosa 3:7; 2 Timoty 3:16, 17.
[Sary, pejy 5]
Ahaizatsika Zagnahary raha namboariny ndraiky Baiboly