Fianaragna Faha-11

Finoagna Ndraiky Faombafaomba Tsy Maharavoravo Zagnahary

Karazagna finoagna ndraiky faombafaomba karakôry ma ratsy? (1)

Tôkony hino ma Kristianigny fa Zagnahary telo mitambatra araiky? (2)

Nagnino ma taigna Kristianigny tsy magnano Krismasy, Paka, na anivairisaira? (3, 4)

Olo maty ma mbala mahavita magnano ratsy atsika? (5)

Jesosy ma naty tamy lakroa? (6)

Ampaharavoravo azôvy taigna misy valairany? (7)

1. Tsy zay finoagna ndraiky faombafaomba jiaby zay ratsy aby. Kanaifa ndraiky, tsy iken’ny Zagnahary, izikoa boaka amy fivavahagna diso na mifanohitry amy raha ampianarin’ny Baiboly.—Matio 15:6.

2. Zagnahary telo mitambatra araiky: Jehovah ma Zagnahary telo mitambatra araiky? Tsy zegny! Jehovah io Baba, Izy “Zagnahary taokagna sady marigny.” (Jaona 17:3; Marka 12:29) Jesosy Zanakanany talagnolo ndraiky ambany fahifagnanany. (1 Korintianina 11:3) Baba bebe toizay Zanaka. (Jaona 14:28) Fagnahy masigny ndraiky tsy olo fa angôvo ampiasain-Jagnahary.—Genesisy 1:2; Asan’ny Apostoly 2:18.

3. Krismasy, Paka: Jesosy tsy tairaka tamy 25 Desambra. Tôkotôkony tamy 1 Oktobra izy tairaka. Tamy fotoagna zegny, nisy mpiambigny ôndrikôndriky tamy kijà tagny. (Lioka 2:8-12) Jesosy tsy nagniraka Kristianigny hagnano anivairisairanany. Izy nivolagna fa mpianatranany tôkony hankalaza na hahatsiaro ny nahafataisany. (Lioka 22:19, 20) Krismasy ndraiky faombafaomba jiaby miaraka amizio boaka tamy fivavahagna diso aifa aila be taloha tagny. Karaha zegny koa faombafaomba atao amy Paka, aohatra amy zegny fampiasagna antody ndraiky bitro. Irô Kristianigny taloha tagny tsy nagnano Krismasy na Paka. Karaha zegny koa ataon’ny taigna Kristianigny amy ziôty. 

4. Anivairisaira: Anivairisaira aroe fo koragnin’ny Baiboly, sady tsisy mpivavaka amy Jehovah irô nagnano izo. (Genesisy 40:20-22; Marka 6:21, 22, 24-27) Taigna Kristianigny tamy voanalohany tagny tsy nagnano anivairisaira. Boaka amy fivavahagna diso taloha tagny koa faombafaomba jiaby amin’anivairisaira io. Amy fotoagna hafa ndraiky, irô mifagnamia kadô ndraiky magnano fety.

5. Fahavozoagna olo maty: Olo maty tsisy zaka aifany. Atsika tsy afaka magnampy irô, irô tsy afaka magnano ratsy atsika. (Salamo 146:4; Mpitoriteny 9:5, 10) Olo araiky koa maty, maty, fa tsisy fiaignana eky afaran’izegny. (Ezekiela 18:4) Fa ndraikindraiky misy anjely ratsy fagnahy, demony ikahiagna irô io, mihaboko fagnahin’olo maty. Ratsy faombafaomba jiaby izikoa fahavozoagna olo maty hagnanaovagna izy na fanompoagna irô.—Isaia 8:19.

6. Lakroa: Jesosy tsy naty tamy lakroa fa tamy pôtô na kakazo araiky mahitsy. Amy Baiboly maro, kakazo araiky mahitsy fo dikan’ny volagna Griky “lakroa” zegny. Fampiasagna lakroa io boaka tamy fivavahagna diso taloha tagny. Taigna Kristianigny taloha tagny tsy nampiasa izio. Kay aminao manaokana, mety mampiasa izio ma laira mivavaka?—Deoteronomia 7:26; 1 Korintianina 10:14.

7. Mety sarotro ialagna sasany amy finoagna ndraiky faombafaomba aby io. Mety hisy havagna na kamarady magnano hevitry amy zegny anao tsy miala amy finoagnanao io. Kanaifa, raha ampaharavoravo Zagnahary taigna misy valairany toizay raha ampaharavoravo olo miragna atsika.—Ohabolana 29:25; Matio 10:36, 37.

[Sary, pejy 22]

Zagnahary tsy telo mitambatra araiky

[Sary, pejy 23]

Boaka amy fivavahagna diso taloha tagny Krismasy ndraiky Paka

[Sary, pejy 23]

Tsisy raha tôkony hanompoatsika olo maty