Fianaragna Faha-14

Ino Mahavy Vavolombelogn’i Jehovah Milamigny?

Ombiagna nisian’ny Vavolombelogn’i Jehovah amin’andra ziôty? (1)

Karakôry fandaihan’ny fivoriagnan’ny Vavolombelogn’i Jehovah? (2)

Boaka aia vaola hikarakaragna raha ilaigna ao? (3)

Azôvy mitariky amy fivoriagna tsiaraikiaraiky? (4)

Ino koa fivoriagna fagnampiny atao isaka taogno? (5)

Ino asa atao amy foibe ndraiky amy birôn’ny sampagna? (6)

1. Nanomboko tamy 1870 nisian’ny Vavolombelogn’i Jehovah amin’andra ziôty. Mpianatra Baiboly nahaizagna irô io tamy voanalohany. Vavolombelogn’i Jehovah ndraiky, agnaragna nalaigna boaka tamy Baiboly, ikahiagna irô nanomboko tamy 1931. (Isaia 43:10) Mbala vitsy irô tamy zegny, fa iziôty, aifa an-tapitrisany irô mazoto mitory amy tany mandilatra 230.

2. Ankamaraozan’ny fiangonagnan’ny Vavolombelogn’i Jehovah mivory in-telo isak’erignandra. Ravoravo zahay izikoa anao mba avy amin’izio koa. (Hebreo 10:24, 25) Boaka amy Baiboly raha jiaby ianaragna ao. Atomboko ndraiky faragnana amy vavaka fivoriagna jiaby. Misy ‘hira natao agnamaizagna voninahitry Jehovah’ maro tsara koa atao agny. (Efesianina 5:18, 19) Tsisy tanty rakitry ao.—Matio 10:8.

3. Mivory amy Efitragno Fanjakagna ankamaraozagna fiangonagna. Mazàgna tragno tsotra namboarin’ny Vavolombelogno miasa an-tsitrapô izio. Anao tsy hahita sary masigny, lakroa na raha hafa miramiragna amy zegny amy Efitragno Fanjakagna. Izikoa misy raha ilagna vaola, fagnamaizagna an-tsitrapô hikarakaragna zegny. Izikoa misy ti hagnamia zay sitraka fônany, misy boaty nataokana amy zegny ao.—2 Korintianina 9:7.

4. Isaka fiangonagna, misy mitariky fampianaragna. Anti-pagnahy na mpiandraikitry ikahiagna irô io. (1 Timoty 3:1-7; 5:17) Misy olo koa magnampy irô mpiandraikitry aby io. Mpagnampy amy fanompoagna ikahiagna irô io. (1 Timoty 3:8-10, 12, 13) Irô tsy agnabognabon’olo mivory amy fiangonagna ao. (2 Korintianina 1:24) Irô tsy amaizagna girady manaokana. (Matio 23:8-10) Lamban-drô tsy miavaka amin’olo jiaby. Irô koa tsy karamaigny, fa an-tsitrapô irô mikarakara fiangonagna. Irô afaka magnamia fankahiraizagna ndraiky torohevitry laira misy ra-manahiragna.—Jakoba 5:14-16; 1 Petera 5:2, 3.

5. Vavolombelogn’i Jehovah magnano fivoriagna fagnampiny koa isaka taogno. Fivoriambe ikahiagna izio. Amy fotoagnan’io, fiangonagna maromaro miaraka mivory. Izio fandaharagna manaokana natao hianaragna Baiboly. Amy fotoagnan’io agnanaovagna batisa mpianatra vaovao.—Matio 3:13-17; 28:19, 20.

6. A New York foiben’ny Vavolombelogn’i Jehovah airan-tany. Agny misy fitambaran’anti-pagnahy maromaro ampy fahaizagna, mitantagna fiangonagna airan-tany. Filan-kevi-pitatagnana ikahiagna irô io. Misy koa birôn’ny sampagna kadiriny 100 iô airan-tany, ahitagna mpiasa an-tsitrapô magnampy amy fagnamboaragna ndraiky fandifasagna boky maomba Baiboly. Irô amy birôn’ny sampagna koa mitariky fandaminagna asa fitoriagna. Ombiagna anao mba magnano prôgramo mandaiha mizaha birôn’ny sampagna marikitry anao?