Akôry ma Ataon’ny Vavolombelon̈on’i Jehovah Mianatra Mitory Ndreky Mampianatra Baiboly?

Vavolombelon̈on’i Jehovah mahazo fiofan̈ana isan-karazany, an̈isan’izen̈y fampiofan̈ana amin’ny asa fanompoan̈a ataondrô. Fitorian̈a ndreky fampianaran̈a vaovao tsara momba Fanjakan̈an’ny Zan̈ahary io asa fanompoan̈a nirahin’i Jesosy hataon’olo jiaby man̈ara-dia izy. (Matio 24:14; 28:19, 20) Mahazo fampiofanan̈a io zahay amy fivorian̈a fataonay andavan’andra ndreky amy fivoriambe fataonay isaka taon̈o. Mbala misy sekoly ara-baiboly isan-karazany koa alamin̈y ampiofan̈ana lan̈iany Vavolombelon̈on’i Jehovah manan̈a andraikitry an̈atin’ny fiangonan̈a na an̈atin’ny fandaminan̈anay.

Ho hitanao ato:

Ino aby fampiofan̈ana azon’ny Vavolombelon̈on’i Jehovah?

Fivorian̈a ataon’ny fiangonan̈a. Indroe zahay mivory isaka herin̈iandra. Izio ataonay amy tany fivorianay, kahian̈a Tran̈o Fivorian̈a. Atao andavan’andra fivorian̈anay araiky, fa araiky ndraiky amy farany herin̈iandra. Olo jiaby afaka man̈aton̈o izio sady tsisy tanty rakitry.

Fivorian̈a andavan’andra. Amy fivorian̈a io zahay mianatra man̈atsara vakiteny, fahaizan̈a mikoran̈a, fahaizan̈a man̈ano kabaro, fahaizan̈a mitory, aviô fan̈atsaran̈a fomba fampianaran̈a. Ndraikindraiky fampiofan̈ana aby io atao amy kabaro, amy fiarahan̈a midiniky, ampisehoan̈a, na koa video. Fampiofan̈ana azonay io man̈ampy zahay hahomby lera mitory amin’olo hafatra baka amy Baiboly ndreky lera mampianatra Baiboly olo lian̈a. Mahazo hatsaran̈a baka amy fampiofan̈ana io olo jiaby man̈aton̈o fivorian̈a. Fa an̈abon’ny raha jiaby zen̈y, fivorian̈anay aby io mankafatatra finoan̈anay ndreky fitiavanay Zan̈ahary ndreky mpiara-manompo aminay.
Fivorian̈a amy faran’ny herin̈iandra. Mizara aroe fivorian̈a io. Tapany voanalohany kabaro baka amy Baiboly. Olo vaovao ny ten̈a ivantan̈an’ny kabaro io. Tapany faharoe ndraiky fiarahan̈a midiniky misy fan̈ontanian̈a ndreky valiny. Misy lahatsoratra fianaran̈a araiky amy Tilikambo Fiambesan̈a ianaran̈a amizio.a Lahatsoratra ianaran̈a aby io mikoran̈a ndreky man̈azava momba foto-kevitry amy Baiboly ndreky toro lalan̈a afaka man̈ampy zahay amy fanompoan̈a ndreky amy fiain̈ana andavanandra.

Fivoriambe. Isaka taon̈o zahay man̈ano fivoriambe telo. Mpitory baka amy fiangonan̈a isan-karazany avy man̈aton̈o fivoriambe aby io. Fotoan̈a aby io an̈isany fotoan̈a mamparavoravo mare fôtony fandaharan̈a jiaby mifôtotro amy foto-kevitry araiky baka amy Baiboly. Misy kabaro isan-karazany ndreky fampisehoan̈a, fan̈adikadin̈ana aviô video koa amizio. Karaha fivorian̈anay aby io fo, amy fivoriambe aby io koa ianaranay raha maro momba Baiboly ndreky man̈ampy zahay hahay hitory ndreky hampianatra vaovao tsara. Afaka man̈aton̈o fivoriambe aby io olo jiaby sady tsisy tanty rakitry koa an̈y, karaha amy fivorian̈anay jiaby fo.

Ino aby sekoly ara-baiboly ataon’ny Vavolombelon̈on’i Jehovah?

Misy Vavolombelon̈on’i Jehovah sasany avoakaiky han̈aton̈o sekoly maromaro azahoan̈a fiofan̈ana lalindalin̈y. Ino aby sekoly aby zen̈y? Ino tanjon̈on’ny sekoly aby io, aviô mahadin̈y firy andra fiofan̈ana aby io? Azôvy aby afaka man̈aton̈o sekoly aby io?

Sekolin’ny Fanompoan̈an’ny Mpisava Lalan̈a

Tanjon̈onany: Ampiofanan̈a mpitory manontolo andra kahian̈a mpisava lalan̈a,b baka irô mahaimahita vokatra fo koa fa mitory ndreky mampianatra. Amy fiofan̈ana io misy fiarahan̈a midiniky, fampisehoan̈a, kabaro isan-karazany aviô fan̈adikadin̈ana.
Faharetany: Tsiota andra.
Olo afaka man̈aton̈o izio: Kahian̈a han̈aton̈o izio lan̈iany nahavita mpisava lalan̈a taon̈o araiky. Mety kahian̈a han̈aton̈o izio ndraiky koa lan̈iany mpisava lalan̈a efa ela sady tsy nan̈ano sekoly io tan̈atin’ny dimy taon̈o tafarafara tato.

Sekolin’ny Mpitory Momba Fanjakan̈an’ny Zan̈ahary

Tanjon̈onany: Ampiofan̈ana mpitory manontolo andra efa za-draharaha. Mpianatra amin’izio ampian̈a hankatsara fahaizandrô mitory ndreky mampianatra, aviô mandalin̈y foto-kevitry isan-karazany amy Baiboly. Ankamarozandrô mahazo diplaomy amin’izio alefa amy tany mbala mila mpitory maro.
Faharetany: Fanjava aroe.
Olo afaka man̈aton̈o izio: Afaka mangataka han̈ano izio lan̈iany mpisava lalan̈a mahafeno fepetra sady afaka manompo amy tany mila mpitory.

Sekolin’ny Anti-pan̈ahy

Tanjon̈onany: Man̈ampy anti-pan̈ahyc hahavita tsara andraikitrindrô an̈atin’ny fiangonan̈a, karaha ataon’ny mampianatra, mitsidiky ôndrikôndriky, aviô izio mankafatatra fitiavandrô Zan̈ahary ndreky mpiara-manompo.—1 Petera 5:2, 3.
Faharetany: Dimy andra.
Olo afaka man̈aton̈o izio: Kahian̈a han̈aton̈o izio anti-pan̈ahy vo voatendry ndreky anti-pan̈ahy efa za-draharaha fa mbala tsy nan̈ano sekoly io tan̈atin’ny dimy taon̈o tafarafara tatỳ.

Sekolin’ny Mpiandraikitry Faritry Ndreky Vadiny

Tanjon̈onany: Ampiofan̈ana mpitory mpitety faritry, kahian̈a mpiandraikitry faritry,d amy zen̈y irô mahavita tsara andraikitrindrô. (1 Timoty 5:17) Fiofan̈ana io koa natao an̈ampian̈a anti-pan̈ahy kristianin̈y aby io ndreky vadindrô handalin̈y Soratra Masin̈y.
Faharetany: Fanjava araiky.
Olo afaka man̈aton̈o izio: Kahian̈a han̈aton̈o izio mpiandraikitry faritry vaovao ndreky vadindrô, taon̈o araiky afaran’ny nampavoatendry irô. Afaran’izen̈y, kahian̈a han̈ano izio koa irô isaka kadiriny dimy taon̈o iô iô.

Sekolin’ny Fanompoan̈a Momba Fanjakan̈an’ny Zan̈ahary

Tanjon̈onany: Man̈ampy anti-pan̈ahy ndreky mpikarakara fiangonan̈ae han̈ano andraikitrindrô amy fikarakaran̈a fiangonan̈a, mifan̈araka amy raha mandalo ndreky raha misy, aviô raha ilain’ny fiangonan̈a. (2 Timoty 3:1) Sekoly io misy isaka taon̈o aroe na telo iô.
Faharetany: Arakaraka raha misy, matetiky andra araiky.
Olo afaka man̈aton̈o izio: Mpiandraikitry faritry ndreky anti-pan̈ahy aviô mpikarakara fiangonan̈a.

Sekolin’ny Fanompoan̈a amy Betela

Tanjon̈onany: Man̈ampy olo miasa amy Betelaf hahavita tsara asandrô ndreky man̈ampy irô hampitombo fitiavandrô Zan̈ahary ndreky irô samby irô.
Faharetany: Dimy andra sy tapany.
Olo afaka man̈aton̈o izio: Tsy maintsy man̈ano izio Betelita vaovao jiaby. Mety kahian̈a man̈ano izio koa Betelita tsy nan̈ano sekoly io tan̈atin’ny dimy taon̈o tafarafara tatỳ.

Sekoly Ara-baibolin’i Gileada

Tanjon̈onany: Man̈ampy mpianatra amin’izio hahaihankasitraka Volan̈an’ny Zan̈ahary ndreky hahazo tsara raha koran̈in’izio, aviô man̈ampy irô han̈araka raha nianarandrô. (1 Tesalonianina 2:13) Kristianin̈y matotro ara-pan̈ahy aby man̈ao sekoly io, mety lelahy zen̈y na man̈angy. Irô koa fa mahavita sekoly io manjary azon’ny fandaminan̈an’i Jehovah ampiasain̈y misimisy amin’ny asa fampianaran̈a Baiboly atao eran-tany. Irô koa fa mahazo diplaomy aminany io, irô mety alefa manompo amy faritany na alefa miasa amy sampan̈a amy tanindrô na an-tany hafa.
Faharetany: Dimy fanjava.
Olo afaka man̈aton̈o izio: Asain’ny birôn’ny sampan̈a mandefa fangatahan̈a irô mpanompo manontolo andra efa voafidy han̈ano izio. Sekoly io atao amy Foiben’ny Fampianaran̈a Baiboly Ataon’ny Watchtower, a Patterson, a New York, Etazonỳ.

Sekoly Ataon’ny Kômitin’ny Sampan̈a Ndreky Vadiny

Tanjon̈onany: Ampiofan̈ana olo an̈isan’ny Kômitin’ny Sampan̈ag hahavita hiandraikitry asa atao amy birôn’ny sampan̈a ndreky asa ara-pan̈ahy ataon’ny Vavolombelon̈on’i Jehovah amy tany misy sampan̈a io na amy tany hafa irahin̈y karakarain’ny sampan̈a io.
Faharetany: Fanjava aroe.
Olo afaka man̈aton̈o izio: Foiben’ny Vavolombelon̈on’i Jehovah mifidy rahalahy an̈isan’ny Kômitin’ny Sampan̈a ndreky vadindrô kahian̈a han̈aton̈o io. Sekoly io atao amy Foiben’ny Fampianaran̈a Baiboly Ataon’ny Watchtower, a Patterson, a New York.

Mifôtotro amin’ino ma fiofan̈ana amezan̈a Vavolombelon̈on’i Jehovah?

Fiofan̈ana jiaby ataon’ny Vavolombelon̈on’i Jehovah mifôtotro amy Baiboly. Zahay mino fa Baiboly io baka amy Zan̈ahary sady ao misy fampianaran̈a farany tsara ilain’ny Krisitanin̈y amy lafiny jiaby amy fiain̈anandrô.—2 Timoty 3:16, 17.

Man̈efa ma anarô koa fa man̈ano fiofan̈ana aby io?

Ehe, tsisy an̈ifan̈a vola fiofan̈ana jiaby io. Raha jiaby ataon’ny Vavolombelon̈on’i Jehovah tohanan̈a amy fan̈amezan̈a antsitra-pô.—2 Korintianina 9:7.

a Amy sitinay jw.org ao misy Baiboly ndreky fitaovan̈a fianaranay Baiboly, an̈isan’izen̈y video isan-karazany.

b Mpisava lalan̈a zen̈y Vavolombelon̈on’i Jehovah môdely, na lelahy zen̈y na man̈angy, vôn̈ono handany lera voafaritry isaka fanjava ikoran̈ana amin’olo hafatra baka amy Baiboly.

c Anti-pan̈ahy zen̈y lelahy kristianin̈y matotro mampianatra Soratra Masin̈y ndreky mikarakara vahoakan’i Jehovah sady man̈ampy ndreky mankahery irô. Tsy karamain̈y irô man̈ano asandrô io.

d Mpiandraikitry faritry zen̈y mpitory manontolo andra mandeha mitsidiky fiangonan̈a samihafa amy faritry karakaraindrô, isaka herin̈iandra. Izy mandeha mankahery mpiara-manompo amindrô ke man̈ano kabaro mankahery baka amy Baiboly aviô miaraka manompo amindrô.

e Mpikarakara fiangonan̈a man̈ano asa isan-karazany amy fiangonan̈a baka avoakarakara tsara irô rahalahindrô ndreky ranabavindrô ara-pan̈ahy. Ke baka amy zen̈y mahavy anti-pan̈ahy aby io manjary misy fotoan̈a hampianaran̈a ndreky hitsidihan̈a ôndrikôndriky.

f Betela an̈aran̈a ikahian̈a birôn’ny sampan̈an’ny Vavolombelon̈on’i Jehovah. Mpanompo manontolo andra jiaby manompo ao manohan̈a asa isan-karazany ataon’ny sampan̈a an-toeran̈a iô.

g Rahalahy matotro sady za-draharaha telo na mandilatran’izen̈y mahafôron̈o Kômitin’ny Sampan̈a.

Ino hatsaran̈a azon’ny Vavolombelon̈on’i Jehovah baka amy fiofan̈ana azondrô?

“Zaho olo bihen̈amaso, ke sarotro aminaka hikoran̈a Baiboly amin’olo tsy haiko. Fa fampiofan̈ana azonay amy fivorian̈anay andavan’andra nan̈ampy zaho natoky ten̈a ndreky nankatsara fahaizako mampianatra. Ke zaho iziô nanjary tsy sahiran̈a koa fa mikoran̈a amin’olo amy fiangonan̈a ndreky ampiasan̈anay an̈y.”—Natasha, a Etazonỳ.
“Sekolin’ny Mpitory Momba Fanjakan̈an’ny Zan̈ahary in̈y nan̈ampy zaho hanan̈a toetry tsara, karaha ataon’ny fitiavan̈a, faharetan̈a aviô hatsaram-pan̈ahy. Ke tsapako fa iziô mba manan̈a toetry Kristianin̈y, kamarady tsara, aviô mba mahay miara-monin̈y amin’olo. Sekoly io koa nampianatra zaho akôry atao man̈ano fikarohan̈a foto-kevitry amy Baiboly ndreky nan̈ampy zaho hahay han̈azava Volan̈an’ny Zan̈ahary ndreky hanohin̈y fônolo.”—Stephen, a Nigeria.
“Sekolin’ny Anti-pan̈ahy nan̈ampy zaho hahaihanetry ten̈a, ke lôso vitako tsara andraikitrinaka amy maha anti-pan̈ahy zaho. Nampodimpody tamy kabaro aby tao fa ilain̈y mangala tahaka Jesosy.”—Luca, an Italy.
“Sekolin’ny Fanompoan̈a Momba Fanjakan̈an’ny Zan̈ahary nampianatra zaho nan̈ino zaho mila mora antôn̈iny ndreky tsara fan̈ahy, aviô be fitiavan̈a koa fa mifandray amin’olo. Nianarako koa fa fitiavan̈a tôkony antony hahavy zaho han̈ano raha amin’olo, fa tsy raha adidy fo.”—Samuel, a Royaume-Uni.
“Sekolin’i Gileada nan̈ampy zahay handinin-ten̈a koa fa mianatra Volan̈an’ny Zan̈ahary, fôtony izio miran̈a fitaratra. (Jakoba 1:22-25) Ke nanjary hitanay ino amy toetrinay mbala mila ahitsinay ndreky ino raha mila amboarinay amy fanompoan̈a ataonay. Nianaranay koa fa zahay mila mieritreritry olo hafa fa tsy ain̈inay fo, aviô tôkony fitiavan̈a fo mahavy zahay hivolan̈a ndreky han̈ano raha araiky.”—Elnathan ndreky Princess, a Philippines.