Jesosy Kristy: Mesia Efa Nambara fa ho Avy

ZAN̈AHARY nan̈iraka paminan̈y maro nanoratra raha momba Jesosy, baka atsika mahay tsarabe raha momba Mesia io. An̈isany raha nisoratindro: Izy ho teraka, ndreky fanompoan̈a nataony ndreky fomba hifatesany. Tanteraka tamy Jesosy raha jiaby nivolan̈indro. Mahagaga raha zen̈y, fotony tanteraka aby raha jiaby nivolan̈iny paminan̈y aby io. Atsika hizaha raha nambarany paminan̈y momba tany nitirahany ndreky fiain̈ananany taminizy mbala hely.

Paminan̈y Isaia nivolan̈a fa baka amy taranaka Panjaka Davida hiboahany Mesia. (Isaia 9:⁠7) Izy baka amy taranaka Davida ankitin̈y.—Matio 1:​1, 6-17.

Paminan̈y Mika koa nivolan̈a fa tsaiky io ho teraka a Betlehema Efrata, ke izy hanjary panjaka. (Mika 5:⁠2) Tanàna aroe aby tamy zen̈y samy Betlehema an̈arany. Araiky, tavaratra tanàna marikitry Nazareta, araiky ta Joda, tsy lavitry Jerosalema. Araiky ta Joda tsy lavitry Jerosalema io Betlehema Efrata zen̈y. Tan̈y ankitin̈y Jesosy teraka!—Matio 2:⁠1.

Misy paminan̈y hafa koa nivolan̈a fa Zanaka Zan̈ahary io hikahian̈a “hiala ta Ejipta.” Panjaka Heroda koa fa naty, Jesosy nindesin̈y niala baka ta Ejipta ankitin̈y.—Hosea 11:⁠1; Matio 2:⁠15.

Misy toko ndreky andininy maro amy “Raha nambarany Paminan̈y Momba Mesia”, misy soratra “Raha efa Nambara.” Izio ahitan̈a raha jiaby efa nisoratin̈y momba Mesia. Araiky “Niboahany” ndraiky ahitanao toko ndreky andininy man̈ambara fa tanteraka tamy Jesosy ankitin̈y “Raha Efa Nambara” io. Anao koa mandiniky andininy aby io, ho fatatra finoan̈anao.

Anao koa fa mamaky toko ndreky andininy aby io, aza adin̈a fa efa taon̈o maro talohany Jesosy teraka sasany amindro io nisoratin̈y. Jesosy nivolan̈a karaha ty: “Raha jiaby nisoratin̈y momba zaho amy lalàn̈any Mosesy ndreky amy Paminan̈y ndreky Salamo, tsy maintsy ho tanteraka.” (Lioka 24:44) Zahava amy Baibolinao karakory nampatanteraka raha jiaby voasoratra momba Mesia io.