Niditry karaha pandresy ta Jerosalema, niondran̈a zanaka boriky

“Faminanian̈a Momba Mesia ma Man̈aporofo fa Jesosy Ankitin̈y Mesia?”

Valiny baka amy Baiboly

Ia. Tamy Jesosy tambony tany teto, naro faminanian̈any Baiboly tanteraka taminany, momba “Mesia Pitariky”, ‘Pamonjy olo jiaby.’ (Daniela 9:25; 1 Jaona 4:14) Nata efa tafarany namiloman̈a Jesosy, mbala maro fo faminanian̈a tanteraka taminany.—Salamo 110:1; Asan’ny Apostoly 2:34-36.

Ino ma dikany “Mesia” zen̈y?

Mesia io baka amy volan̈a hebreo Mashiah (Mesia), fa amy volan̈a griky ndraiky izio Kristôs na Kristy. Araiky fo dikany volan̈a aby io: “Voahosotro.” Ke dikany “Jesosy Kristy” zen̈y, “Jesosy Voahosotro” na “Jesosy Mesia.”

Taloha tan̈y, matetiky olo araiky koa fa voahosotro zen̈y, idin̈ana menaka lohanany. Zen̈y mivolan̈a fa izy mahazo toeran̈a manokan̈a, manan̈a fahifan̈a maventy. (Levitikosy 8:12; 1 Samoela 16:13) Zan̈ahary nifidy Jesosy nataony Mesia, manan̈a fahifan̈a maventy. (Asan’ny Apostoly 2:36) Fa Jesosy tsy nisorany Zan̈ahary menaka, fa nisoriny fan̈ahy masin̈y.—Matio 3:16.

Tanteraka taminolo hafa koa ma faminanian̈a momba Mesia io?

Ehe. Izio mira sorisoritry amy tondronolo in̈y fo. Maro sorisoritry io fa olo araiky fo tompiny. Tanteraka tamy Mesia na Kristy zaraiky fo koa iro faminanian̈a maro amy Baiboly ao. Fa Baiboly efa nampitandrin̈y fa hisy “paminan̈y sandoko ho avy, ke iro han̈ano famantaran̈a maventy ndreky fahagagan̈a. Tiandro hifitahin̈y aby firaka amindro olo efa voafidy aby io, izikoa mbala vitandro.”—Matio 24:24.

Mbala aminy amaray an̈y ma Mesia io vo hiboaka?

Ehe. Baiboly efa nan̈ambara fa Mesia io hiboaka baka amy taranakany Panjaka Davida, panjakany Israely. (Salamo 89:3, 4) Fa kanefa, izikoa fa resiny Romanin̈y Jerosalema tamy 70 T.K., karaha very tamy zen̈y taratasy misy kopìndro jiaby rango tamy Davida.a Ke nanomboko tamy zen̈y, tsisy olo afaka niaboko fa izy an̈isany taranakany panjaka baka amy fehitriny Davida. Tamy Jesosy tambony tany teto, mbala tiô taratasy nisy an̈arandro razambeny Jesosy aby io, ke tsisy olo nahavita niaboko iro taranakany Davida nata iro fahavalony Jesosy aby io.—Matio 22:41-46.

Firy ma faminanian̈a momba Mesia io amy Baiboly ao?

Tsisy olo mahay firy marin̈y faminanian̈a momba Mesia io. Ohatra, mety hiovaova fomba fikontianolo faminanian̈a io, nata aminy andininy mikoran̈a mazava momba Mesia. Aminy Isaia 53:2-7 ao mivolan̈a faminanian̈a maro momba Mesia. Olo sasany mety hikonty izio faminanian̈a araiky fo, fa sasany ndraiky mety hivolan̈a fa izio faminanian̈a samby isany.

Faminanian̈a sasany tanteraka tamy Jesosy

Faminanian̈a	Hita amy	Tanteraka
Taranakany Abrahama	Genesisy 22:17, 18	Matio 1:1
Taranakany Isaka zanakany Abrahama	Genesisy 17:19	Matio 1:2
Baka amy fokony Joda	Genesisy 49:10	Matio 1:1, 3
Taranakany Panjaka Davida	Isaia 9:7	Matio 1:1
Man̈angy virijiny niteraka izy	Isaia 7:14	Matio 1:18, 22, 23
Teraka ta Betlehema	Mika 5:2	Matio 2:1, 5, 6
Imanoelab nikahian̈a izy	Isaia 7:14	Matio 1:21-23
Olo tsotra	Isaia 53:2	Lioka 2:7
Nisy tsaiky maro nivonen̈a tafarany nitirahany Mesia	Jeremia 31:15	Matio 2:16-18
Nikahian̈a hiala ta Ezipty	Hosea 11:1	Matio 2:13-15
Natao Nazareanin̈yc fikahian̈a izy	Isaia 11:1	Matio 2:23
Nisy iraka nalefa talohany naviany	Malakia 3:1	Matio 11:7-10
Voahosotro ho Mesia tamy 29 T.K.d	Daniela 9:25	Matio 3:13-17
Zan̈ahary nivolan̈a fa Mesia io Zanany	Salamo 2:7	Asan’ny Apostoly 13:33, 34
Mahasarotiny izy raha momba tran̈ony Zan̈ahary	Salamo 69:9	Jaona 2:13-17
Pitory vaovao tsara	Isaia 61:1	Lioka 4:16-21
Nahavita nitory mare ta Galilia izy ke nira hazavan̈a	Isaia 9:1, 2	Matio 4:13-16
Nan̈ano fahagagan̈a karaha ambaka nataony Mosesy	Deoteronomia 18:15	Asan’ny Apostoly 2:22
Nivolan̈a hevitriny Zan̈ahary karaha nataony Mosesy	Deoteronomia 18:18, 19	Jaona 12:49
Nampajanga olo maro	Isaia 53:4	Matio 8:16, 17
Tsy nisariky sain̈inolo taminany	Isaia 42:2	Matio 12:17, 19
Nahinakinaka iro olo nampijalin̈a aby io	Isaia 42:3	Matio 12:9-20; Marka 6:34
Nan̈ambara fahamarin̈any Zan̈ahary	Isaia 42:1, 4	Matio 12:17-20
Panolotsain̈y Mahagaga	Isaia 9:6, 7	Jaona 6:68
Nan̈ambara an̈aran̈any Jehovah	Salamo 22:22	Jaona 17:6
Nan̈ano fan̈oharan̈a	Salamo 78:2	Matio 13:34, 35
Pitariky	Daniela 9:25	Matio 23:10
Maro olo tsy nino izy	Isaia 53:1	Jaona 12:37, 38
Vato mampavoatsikon̈o	Isaia 8:14, 15	Matio 21:42-44
Nifamaranolo	Salamo 118:22, 23	Asan’ny Apostoly 4:10, 11
Halanolo tsy aminy antony	Salamo 69:4	Jaona 15:24, 25
Niditry karaha pandresy ta Jerosalema, niondran̈a zanaka boriky	Zakaria 9:9	Matio 21:4-9
Tsaiky madiniky nidera izy	Salamo 8:2	Matio 21:15, 16
Navy taminy an̈aran̈any Jehovah	Salamo 118:26	Jaona 12:12, 13
Namany marikitry izy namadiky izy	Salamo 41:9	Jaona 13:18
Volafotsy 30 sekely namadihan̈a izye	Zakaria 11:12, 13	Matio 26:14-16; 27:3-10
Iro namany aby io niala izy	Zakaria 13:7	Matio 26:31, 56
Nisy vavolombelon̈o vandivandy nankaratsy izy	Salamo 35:11	Matio 26:59-61
Tsy namaly olo nan̈odihody raha tsy nataony	Isaia 53:7	Matio 27:12-14
Nandroranolo	Isaia 50:6	Matio 26:67; 27:27, 30
Nivangoendro lohanany	Mika 5:1	Marka 15:19
Nivangovangoen̈a karavasy	Isaia 50:6	Jaona 19:1
Tsy nivaliany iro olo namango izy	Isaia 50:6	Jaona 18:22, 23
Iro manampahifan̈a aby io nan̈ano tetiky hamonoan̈a izy	Salamo 2:2	Lioka 23:10-12
Nifantsihin̈y taminy hazofijalian̈a tan̈anany ndreky vitiny	Salamo 22:16	Matio 27:35; Jaona 20:25
Nataonolo loka lambanany	Salamo 22:18	Jaona 19:23, 24
Nikonten̈a an̈isanolo panota	Isaia 53:12	Matio 27:38
Nadroedroen̈a, tsy nasian̈a fotiny	Salamo 22:7, 8	Matio 27:39-43
Nijaly hamonjian̈a olo panota	Isaia 53:5, 6	1 Petera 2:23-25
Karaha raha tsy nijireny Zan̈ahary	Salamo 22:1	Marka 15:34
Namian̈a vinaigra ndreky raha mafaiky	Salamo 69:21	Matio 27:34
Sakara talohany izy hofoaty	Salamo 22:15	Jaona 19:28, 29
Nankininy tamy Zan̈ahary fahin̈ananany	Salamo 31:5	Lioka 23:46
Nan̈amia fiain̈ananany	Isaia 53:12	Marka 15:37
Nan̈amia vidipan̈avotan̈a nan̈adosoan̈a fahotan̈anolo	Isaia 53:12	Matio 20:28
Tsy nitapahin̈y taolan̈anany	Salamo 34:20	Jaona 19:31-33, 36
Nitombohin̈y	Zakaria 12:10	Jaona 19:33-35, 37
Nalevin̈y tamy fasan̈anolo pan̈arivo	Isaia 53:9	Matio 27:57-60
Nivilominy Zan̈ahary	Salamo 16:10	Asan’ny Apostoly 2:29-31
Nisoloan̈a araiky namadiky izy in̈y	Salamo 109:8	Asan’ny Apostoly 1:15-20
Nipetraka tamy tan̈ana ankavan̈any Zan̈ahary	Salamo 110:1	Asan’ny Apostoly 2:34-36

a Karaha ty nikoran̈iny Rakipahizan̈a (angiley) nisoratiny McClintock ndreky Strong: “Be toky ivolan̈ana fa ravan̈a tamy fandravan̈ana Jerosalema in̈y iro boky jiaby misy taranakany jiosy aby io ndreky fianakavian̈andro jiaby fa tsy talohanizin̈y.”

b Imanoela io an̈aran̈a hebreo, dikany “Man̈ampy Atsika Zan̈ahary.” Izio man̈ambara andraikitriny Jesosy, izy Mesia. Fandalovany tambony tany teto ndreky asa nataony man̈amia porofo fa Zan̈ahary man̈ampy olonany ankitin̈y.—Lioka 2:27-32; 7:12-16.

c Dikany “Nazareanin̈y” zen̈y baka amy volan̈a hebreo ne’tser, dikany “tsiriny hely.”

d Izikoa tihahazo fan̈ampiny fan̈azavan̈a momba konty man̈aboaka taon̈o 29, taon̈o naviany Mesia io, zahava lahatsoratra “Paminan̈y Daniela Nan̈ambara Faviany Mesia.”

e Amy bokiny Zakaria ao misy faminanian̈a io, kanefa Matio panoratra Baiboly nivolan̈a fa “paminan̈y Jeremia nirahin̈y nivolan̈a izio.” (Matio 27:9) Bokiny Jeremia io mbala an̈isany fizaran̈a amy Soratra Masin̈y ao kahian̈a “Paminan̈y.” (Lioka 24:44) Mety bokiny Jeremia boky voanalohany amy fizaran̈a io ndraikindraiky. Ke mety fizaran̈a io nivolan̈iny Matio fa “Jeremia” io, ke tan̈atinizio tao koa bokiny Zakaria.