Nan̈ino ma Sanjinay Milamin̈y Lera Mandeha Mivory?

Asa mba azonao onon̈o sanjinolo aby amy sary io? Karaha io ataony Vavolombelon̈o Jehovah izikoa fa mandeha mivory. Nan̈ino ma zahay milamin̈y karaha io lera mandeha mivory?

Zahay man̈aja Zan̈ahary. Marin̈y ankitin̈y fa tsy sanjy raha ten̈a zahany Zan̈ahary. (1 Samoela 16:7) Ndray izy man̈ano zen̈y, fivorian̈a io an̈isany fanompoan̈a Zan̈ahary. Zen̈y mahavy zahay man̈ano sanjy milamin̈y, fotony tianay han̈aja Zan̈ahary ndreky olo miaraka mivavaka aminay. Izio mira olo araiky handeha hikoran̈a amy prezidà in̈y fo. Izikoa izy ten̈a man̈aja prezidà io, lamba madio ndreky milamin̈y ataony.—Jeremia 10:7

Filaminan̈a io ahaizan̈a olony Zan̈ahary. Baiboly mivolan̈a fa olo Kristianin̈y zen̈y tokony han̈ano sanjy madio ndreky milamin̈y. Lamba milamin̈y zen̈y tsy mifin̈y loatra, na malalaka loatra. Tokony hita amy sanjintsika fo fa atsika olony Zan̈ahary ankitin̈y. (1 Timoty 2:9, 10) Dikanizen̈y, fan̈evantsika ndreky lambantsika tokony hilamin̈y lera handeha hivory. (Titosy 2:10; 1 Petera 2:12) Baka amy sanjintsika mandeha mivory koa hitsaranolo fivavahan̈antsika.

Anao mety avy fo ndray tsendriky misy lamba mety indesin̈y mivory. Tsy voatery lamba vao fo atao, fa mila izy madio ndreky milamin̈y fo.

• Nan̈ino ma sanjintsika mila madio ndreky milamin̈y lera mandeha mivory?

• Karakory ahaizantsika sanjy mety ndreky tsy mety?