Man̈amia Voninahitry Zan̈ahary ma Lamba Sikininao?
“Ataova han̈amezan̈a voninahitry Zan̈ahary raha jiaby.”—1 KOR. 10:31.
1, 2. Nan̈ino ma Vavolombelon̈o Jehovah man̈araka fitsipiky an̈abo izikoa fa mifidy sanjy hataondro? (Zahava sary voanalohany.)
“MARO tsikorakorany lamba hitanao ataonolo, sirto andra koa fa mafana.” Zen̈y raha nikoran̈iny gazety aliman araiky momba fivorian̈a nataondro pitariky fivavahan̈a aby io. Fa mbala izio fo koa nikoran̈a fa “tsy karaha zen̈y amy fivoriambeny Vavolombelon̈o Jehovah ... Lelahy jiaby avoa kotro ndreky kravaty firaka amy tsaiky hely, avio man̈angy jiaby firaka amy tsaiky madiniky man̈ano zipo lava. Tsara sanjindro fa tsy man̈afahafa.” Matetiky olo mankasitraka Vavolombelon̈o Jehovah, fotony iro ‘misikiny lamba man̈aja ndreky feno fahendrena, mifan̈araka aminolo manompo Zan̈ahary.’ (1 Tim. 2:9, 10) Tsy niny man̈angy zaraiky fo toro lalan̈a nikoran̈iny apostoly Paoly io fa niny lelahy kristianin̈y koa.
2 Ten̈a raha maventy amintsika vahoakany Jehovah lamba sikinintsika io, sady ten̈a raha maventy amy Jehovah koa. (Gen. 3:21) Izikoa raha koran̈iny Baiboly momba sanjy io zahan̈a, matoky atsika fa Zan̈ahary Farany An̈abo io manan̈a fitsipiky arehanolo ten̈a pivavaka aminany. Zen̈y mahavy atsika izikoa fa mifidy sanjy hataontsika, tsy raha mamparavoravo atsika fo ataontsika. Sanjy mamparavoravo Jehovah Tompontsika raha ten̈a zahavantsika.
3. Ino raha azontsika ianaran̈a baka amy lalàn̈a momba sanjy namezany Jehovaha iro Israelita aby io?
3 Ohatra izioty, Lalàn̈any Zan̈ahary namian̈a iro Israelita aby io niaro iro tsy han̈araka fitondranten̈a ratsindro firenena nan̈odidin̈y iro. Hita baka tamizin̈y fa halany Jehovah mare olo man̈ano lamba tsy ahaizan̈a izy lelahy sa man̈angy. Raha zen̈y izioty efa mamalan̈a mare koa. (Vakia Deoteronomia 22:5.) Hitantsika baka amy volan̈a Jehovah momba lamba sikinin̈y io fa tsy tiany Jehovah izikoa lelahy man̈ano sarimbavy ndreky man̈angy man̈ano sarindahy. Avio tsy tiany koa olo man̈ano lamba tsy ahaizan̈a izy lelahy va man̈angy.
4. Ino toro lalan̈a mety han̈ampy atsika hanapakevitry izikoa fa mifidy lamba hisikinin̈y?
4 Volan̈a Zan̈ahary ahitantsika taridalan̈a man̈ampy atsika hahay hanapakevitry amy lamba mety. Izio mety arehan̈a amy tany jiaby, na aia atsika mipetraka, na ino kolontsain̈intsika, na mafana na manintsy andra. Atsika tsy mila listiny lamba mety ndreky tsy mety. Dikanizen̈y, atsika ndray efa misy karazan̈a sanjy tiantsika, atsika man̈araka toro lalan̈a amy Baiboly fo. Alo atsika handiniky toro lalan̈a sasany amy Baiboly mety han̈ampy atsika hahay “sitrapony Zan̈ahary salakady tsara, ankasitrahin̈y, baka io tsisy tsin̈iny.”—Rom. 12:1, 2.
‘ATSIKA IO OLONY ZAN̈AHARY’
5, 6. Ino mety ho vokatra tsarany sanjy ataontsika io aminolo?
5 Fan̈ahy masin̈iny Zan̈ahary nandrisiky apostoly Paoly hankamafy fa ten̈a raha maventy toro lalan̈a amy 2 Korintianina 6:4 ao. (Vakia.) Sanjintsika io ahaizanolo raha maro momba atsika. Maro olo man̈ambara raha tsapandro momba atsika, baka amy raha ‘hitandro.’ (1 Sam. 16:7) Ke atsika io olony Zan̈ahary, safe mazava amintsika fa tsy sanjy tiatiantsika fo raha ten̈a maventy amintsika. Toro lalan̈a amy Baiboly io mandrisiky atsika tsy han̈ano lamba maletry loatra, misariky masonolo na mahavy olo tihila atsika. Zen̈y mahavy atsika tsy man̈ano lamba man̈aboaka tany tokony hasitriky amy vatan̈antsika. Tsy tokotro hisy olo hahatsapa ho hafahafa na hitodiky antany hafa izikoa fa mahita sanjintsika.
6 Han̈aja atsika olony Jehovah Zan̈ahary Farany An̈abo ivavahantsika io olo, izikoa milamin̈y ndreky madio lamba sikinintsika, avio fan̈evantsika milamin̈y tsarabe. Mety ho voantsory han̈araka fivavahan̈a marin̈y foeky iro. Tsy basinizen̈y fo fa man̈amia taratrany fandaminan̈a soloantsika ten̈a koa atsika, izikoa mety tsarabe sanjintsika. Vokany aminjay, hanjary hahaiho tianolo fo hitandren̈y hafatra mamonjy fahin̈ana koran̈intsika amindro.
7, 8. Lera karakory atsika ten̈a tokony han̈ao lamba mety tsarabe?
7 Izikoa mifan̈araka tsarabe aminy hafatra indesintsika lambantsika, ke man̈amia voninahitry Jehovah, haboakantsika amy zen̈y fa atsika man̈aja Zan̈ahary masin̈y, man̈aja iro rahalahy ndreky ranabavintsika aby io, avio man̈aja olo itoriantsika aby io. (Rom. 13:8-10) Marin̈y zen̈y sirto lera atsika man̈ano raha misy ifandraisany amy fanompoan̈a, karaha ataony lera mandeha mivory ndreky lera mitory. Tokony han̈ano lamba mifan̈araka ‘aminolo manompo Zan̈ahary’ fo atsika amy lera karaha zen̈y. (1 Tim. 2:10) Misy ndraiky lamba io mety amy tany araiky fa tsy mety amy tany hafa. Fa ndray zen̈y, olony Jehovah erantany mitandrin̈y fo baka tsy han̈aradrorony fo amy sanjy fataonolo amy tany misy izy, ke hanafintohin̈y olo hafa.
Asa hita amy sanjintsika fa atsika man̈aja Zan̈ahary soloantsika ten̈a io? (Zahava fehintsoratra 7, 8)
8 Vakia 1 Korintianina 10:31. Lera atsika man̈aton̈o fivoriambe, atsika tsy han̈ano zay karazan̈a lamba mamalan̈a fataonolo amy donia ty fa han̈ano lamba mifan̈araka aminolo mivavaka amy Zan̈ahary. Karaha zen̈y koa lera atsika fa an̈atiny lotely ndreky lera atsika miboaka baka ao, tsy han̈ano tsikorakorany lamba atsika, ndray efa vita fivoriambe. Atsika koa man̈ano ambaka zen̈y, mirehareha aby atsika man̈ambara fa atsika Vavolombelon̈o Jehovah. Hasaky hitory fo atsika, isaka misy okazion han̈anovan̈a zen̈y.
9, 10. Nan̈ino ma man̈ampy atsika hifidy lamba sikinintsika raha koran̈iny Filipianina 2:4?
9 Vakia Filipianina 2:4. Nan̈ino ma atsika tokony handiniky vokatrany sanjy ataontiska aminolo miaraka mivory amintsika? Voanalohany, fotony atsika man̈araka raha koran̈iny Baiboly ty: “Ke vonia raha jiaby mety hitariky rantsambatan̈anaro hijangajanga, han̈ano fahalotoan̈a, han̈iry han̈ano raha tsy manjary.” (Kol. 3:2, 5) Tsy tiantsika han̈ano raha hampasarotro fan̈arahany namantsika aby io torohevitry zen̈y. Sasany amindro io baka efa niala tamy fitondranten̈a karaha zen̈y fa mety mbala miady mare amizio fo. (1 Kor. 6:9, 10) Safe tsy tiantsika hampasarotro ady ataondro zen̈y, sa karakory?
10 Atsika koa fa miaraka amindro rahalahy ndreky ranabavintsika aby io, tiantsika sanjintsika handrisiky iro hadio fitondranten̈a fo. Tokotro karaha zen̈y fo ataontsika, na lera atsika miaraka maro amy fivorian̈a an̈y, na lera atsika man̈ano fiarahan̈a. Malalaka atsika mifidy lamba sikinintsika, fa atsika fo tompinandraikitry ke han̈ano lamba hahavy olo hadio fitondranten̈a ndreky han̈araka fitsipikiny Zan̈ahary momba fahamasin̈ana aminy hevitry, fivolan̈ana ndreky fitondranten̈a. (1 Pet. 1:15, 16) Fitiavan̈a ten̈a izy zen̈y “tsy man̈ano raha tsy mahamendriky, tsy mitady raha hahatsara izy tompiny fo.”—1 Kor. 13:4, 5.
LAMBA METY TSARABE AMY TANY JIABY NDREKY AMY LERA JIABY
11, 12. Ino raha tsara hidinihintsika, atsika koa fa mandiniky lamba hisikinintsika?
11 Atsika koa fa manapakevitry amy lamba hisikinintsika, tokony halaintsika onon̈o fa “raha jiaby samy amy fotoan̈a natokana an̈anovan̈a izy; misy fotoan̈any aby asa jiaby atao ambony tany.” (Mpito. 3:1, 17) Marin̈y ndraiky fa mety hiovaova arakaraka andra lamba sikinintsika, fa kanefa fitsipikiny Jehovah momba lamba sikinintsika ndraiky tsy miovaova karaha andra io.—Mal. 3:6.
12 Izikoa fa mafana andra, mety tsy ho mora amintsika han̈ano lamba man̈aja tsarabe. Fa izy ndraiky, ten̈a tiandro rahalahy ndreky ranabavintsika aby io izikoa atsika tsy man̈ano lamba maletry loatra na lamba man̈afahafa. (Joba 31:1) Karaha zen̈y koa atsika izikoa fa mandeha amy laplazy na amy lapisiny, tokony fidin̈a tsara fo maiô na lamba findesin̈y miseky sikinintsika. (Ohab. 11:2, 20) Nata tsy mijery zen̈y iro olo amy donia ty koa fa amy laplazy an̈y, atsika tsy man̈ano karaha iro, fa atsika mizaha fomba han̈amezan̈a voninahitry Zan̈ahary masin̈y io fo, fotony atsika tia izy.
13. Nan̈ino misy vokany amy lamba fidintsika hisikinin̈y torohevitry koran̈iny 1 Korintianina 10:32, 33?
13 Misy toro lalan̈a araiky koa ten̈a han̈ampy atsika hifidy lamba sikinintsika. Tokony handiniky olo hafa koa atsika, na efa panompony Jehovah iro io na mbala tsendriky. (Vakia 1 Korintianina 10:32, 33.) Tsy mijijy tamban̈a atsika ke tsy man̈ano lamba manafintohin̈y olo. Karaha ty baka nisoratiny Paoly: “Atsika tokotro ho samy han̈ano raha hamparavoravo namantsika ndreky han̈ano raha hankahery iro.” Fotony nan̈ino ho izy? Fotony “ndray Kristy fo tsy nan̈ano raha namparavoravo ain̈inany.” (Rom. 15:2, 3) Raha mahatsara olo ndreky sitrapony Zan̈ahary fo raha ten̈a maventy tamy Jesosy, fa tsy raha tiany fo. Baka amy zen̈y mahavy atsika tsy man̈ano lamba sasany tiantsika, fotony tiantsika olo hitandren̈y hafatra toriantsika amindro.
14. Akory hampianarany raimandreny zanakandro han̈amia voninahitry Jehovah amy lamba sikinindro?
14 Iro raimandreny mananjanaka aby io manan̈a andraikitry hampianatra zanakandro han̈araka toro lalan̈a amy Baiboly. Ke mila matoky tsarabe iro fa samy mifen̈y iro baka hamparavoravo fôny Jehovah sanjindro. (Ohab. 22:6; 27:11) Mila ampianarindro tsihelihely zanakandro fa ten̈a ilain̈a man̈aja Jehovah Zan̈ahary masin̈y io. Tokony han̈amia modely koa iro amy fisikinan̈a mety, avio tokony ho be fitiavan̈a koa izikoa fa man̈ambara sanjy mety hatao amy zanakandro. Ten̈a tsara iro zanakandro aby io efa ampianarindro lamba mety amy fotoan̈a jiaby ndreky amy tany jiaby, rango iro mbala hely! Dikanizen̈y lamba man̈ampy iro hahavita hisolo ten̈a Jehovah tokony hisikinindro fa tsy zay lamba tiatiandro fo.
AMPIASÀ TSARA SAFIDINAO
15. Ino taridalan̈a tokony harehantsika, izikoa atsika tompiny fa mifidy lamba hisikinintsika?
15 Amy Baiboly ao misy torohevitry mety tsarabe han̈ampy atsika hanapakevitry han̈amia voninahitry Jehovah, ndray atsika samy amy lamba tiantsika. Tsy mitovy raha tiantsika, karaha zen̈y koa vola anan̈antsika. Fa izy ndraiky tokony hadio ndreky hilamin̈y fo, mifan̈araka amy raha jiaby ataontsika, avio mifan̈araka amy sanjy mety amy tany misy atsika.
16. Nan̈ino atsika tokony hifen̈y fo han̈ano lamba mety tsarabe?
16 Mila ikentsika fa tsy voatery ho mora fo han̈ano fanapahankevitry momba lamba mety tsarabe, fotony maro raha mila dinihintsika. Maro labotiky mandafo lamba mamalan̈a, ke mety mila mandany lera ndreky mila mifen̈y atsika vo mahita lazipo ndreky robo, avio patalon̈o tsy mifin̈y mare. Fa atsika koa tsy rivan̈a, iro rahalahy ndreky ranabavintsika aby io ho ravoravo mahita atsika mifen̈y man̈ano lamba mety tsarabe. Avio koa, tsisy tsaratsarany haravoan̈a man̈amia voninahitry Jehovah Babantsika io amy raha jiaby, firaka amy lamba sikinintsika.
17. Ino aby raha mila zahan̈a, izikoa misy rahalahy araiky hanapakevitry hanangana sa tsy hanangana sombotro?
17 Karakory fo basy iro rahalahy aby manangana sombotro aby io? Lalàn̈any Mosesy nan̈iraka iro lelahy aby taloha tan̈y hanangana sombotro. Fa Kristianin̈y izioty fa tsy karaha zen̈y, fotony iro fa tsy tiren̈a han̈ano zen̈y eky. (Lev. 19:27; 21:5; Gal. 3:24, 25) Amy tany sasany, tsy man̈ino izikoa olo manangana sombotro zen̈y. Tsy misakana olo tsy hitandren̈y hafatra torintsika izio an̈y. Misy aby rahalahintsika sasany manan̈a andraikitry, manangana sombotro. Fa misy koa rahalahintsika sasany nanapakevitry tsy hanangana sombotro. (1 Kor. 8:9, 13; 10:32) Fa amy tany sasany ndraiky, tsy fombanolo an̈y manangana sombotro zen̈y, ke hafahafa aminolo mahita Kristianin̈y man̈ano karaha zen̈y. Manjary ‘misy raha ivolan̈ana izy’ rahalahy araiky, koa man̈ano zen̈y an̈y, ke tsy han̈amia voninahitry Zan̈ahary sanjinany.—Rom. 15:1-3; 1 Tim. 3:2, 7.
18, 19. Nan̈ino man̈ampy atsika hifidy lamba mamparavoravo Jehovah raha koran̈iny amy Mika 6:8 ao?
18 Ten̈a man̈ano mersy Jehovah atsika, fotony izy tsy man̈avesatra atsika amy listiny sanjy mety ndreky tsy mety. Ambelany atsika mifidy mifan̈araka amy toro lalan̈a amy Baiboly, avio atsika tompiny fo manapakevitry. Ke nata amy lamba sikinintsika, mbala tiantsika fo han̈aboaka fa atsika ‘manetry ten̈a izikoa fa man̈ano dia araiky amy Zan̈ahary.’—Mika 6:8.
19 Manetry ten̈a atsika fotony ikentsika fa Jehovah io Zan̈ahary masin̈y ndreky madio, avio izy zaraiky fo ten̈a mahay mitariky atsika. Manetry ten̈a koa atsika izikoa man̈aja fihetsehampony namantsika ke mitandrin̈y atsika tsao han̈ano raha manafintohin̈y iro.
20. Ino raha tokony ho avy an̈atiny jerinolo, iro koa fa mahita sanjintsika?
20 Tokony ho hitanolo amy lamba sikinintsika fa atsika panompony Jehovah ankitin̈y. Iro rahalahy ndreky ranabavy aby io ndreky olo jiaby koa tokony hahita fa atsika misolo ten̈a Zan̈ahary ankitin̈y. Fitsipikinany farany tsara, ke ravoravo atsika man̈araka iro io. Man̈eva derain̈a iro rahalahy ndreky ranabavy io fotony pare tsarabe sanjindro sady iro tsara fitondranten̈a. Mahavy olo hitandren̈y hafatra koran̈intsika amindro raha zen̈y sady man̈amia voninahitry Jehovah, avio koa mamparavoravo izy. Atsika koa mahay manapakevitry momba lamba hisikinintsika, han̈amia voninahitry Jehovah fo atsika, fotony Jehovah io misikiny “fan̈ajan̈a ndreky voninahitry.”—Sal. 104:1, 2.