FIANARAN̈A 6

Olo Maty ma Mbala ho Velon̈o?

1. Ino ma vaovao tsara momba olo efa naty aby in̈y?

Marta ndreky Maria ravoravo nahita Lazarosy velon̈o

Lazarosy efa naty efatra andra, tamy Jesosy navy ta Betania, marikitry Jerosalema. Jesosy ndreky Marta ndreky Maria anabaviny Lazarosy, nandeha tamy fasan̈anany tan̈y. Tsy ela, olo efa vory. Lazarosy koa fa nivilominy Jesosy, ravoravo mare ry anabaviny.—Vakia Jaona 11:21-24, 38-44.

Marta efa naharen̈y vaovao tsara momba olo maty. Izy nahay fa Jehovah mbala hamelon̈o olo maty.—Vakia Joba 14:14, 15.

2. Man̈ano karakory ma olo koa fa maty?

Adama vo niasainy Zan̈ahary ndreky izy naty — Zan̈ahary nivolan̈a karaha ty taminy Adama: “Anao fotaka, baka io hanjary fotaka koa.”—GENESISY 3:19.

Baka amy fotaka niasan̈a olo. (Genesisy 2:7; 3:19) Vatan̈a ndreky fan̈ahy tsy misaraka. Olo koa fa maty, tsisy fan̈ahy mandehandeha eky an̈y, fotony betronany efa tsy miasa eky. Raha jiaby tiany hatao taminizy mbala velon̈o, tsy vitany eky. Karaha zen̈y Lazarosy. Izy koa fa nivilomin̈y, izy tsy nitantara izy naty tan̈y, fotony olo maty efa tsisy raha hainy eky.—Vakia Salamo 146:4; Mpitoriteny 9:5, 6, 10.

Misy olo mivolan̈a fa olo maty zen̈y mandeha amy motrobe. Tsy marin̈y zen̈y, fotony Baiboly mivolan̈a fa olo maty efa tsisy raha hainy eky. Tsy tan̈aty diniky Zan̈ahary foeky han̈ano raha karaha zen̈y.—Vakia Jeremia 7:31.

Zahava video Man̈ano Karakory ma Olo koa fa Maty?

3. Olo maty ma mbala mahavita mivolan̈a?

Olo maty tsy maharen̈y raha ndreky tsy mahavita mivolan̈a eky. (Salamo 115:17) Misy anjely nivadiky tamy Zan̈ahary mahavita mangala tahaka feonolo maty. Iro miaboko olo efa naty. (2 Petera 2:4) Zen̈y mahavy Jehovah tsy man̈omba atsika mikoran̈a aminolo maty.—Vakia Deoteronomia 18:10, 11.

4. Olo karakory ma hivilominy Zan̈ahary?

Lelahy araiky baka naty ampianarin̈y raha momba Zan̈ahary, amy paradisa.

Marobe olo hivilominy Zan̈ahary. Nata olo aby tsy nahay Zan̈ahary ndreky nan̈ano ny ratsy mbala hivilominy fo.—Vakia Lioka 23:43; Asan’ny Apostoly 24:15.

Iro koa fa velon̈o, mbala hampianarin̈y ny marin̈y momba Zan̈ahary. Iro koa hampianarin̈y hino Jesosy ndreky han̈araka volan̈anany. (Apokalypsy 20:11-13) Iro koa mifen̈y man̈ano ny tsara, iro ho velon̈o tsisy farany ambony tany eto.—Vakia Jaona 5:28, 29.

5. Ino ma toetriny Jehovah hitantsika baka amy zen̈y?

Atsika man̈anten̈a fa olo naty aby in̈y ho velon̈o marin̈y, fotony Zan̈ahary efa nan̈iraka Zanany han̈avotro atsika. Hitantsika baka amy zen̈y fa Jehovah io ten̈a tsara fan̈ahy ndreky tia atsika. Koa avy marin̈y raha zen̈y, azovy ma ten̈a tianao ho hita?—Vakia Jaona 3:16; Romanina 6:23.

Misy fan̈azavan̈a koa amy boky Ino ma Raha Ten̈a Ampianariny Baiboly? toko faha-6, 7 ndreky faha-10.