FIANARAN̈A 10
Akory Hahaizanao Fivavahan̈a Marin̈y?
1. Araiky fo ma fivavahan̈a marin̈y?
‘Tandrema fa aminaro misy miaboko paminan̈y.’—MATIO 7:15.
Jesosy nivolan̈a tamy pianatranany fa araiky fo fivavahan̈a marin̈y. Izy nivolan̈a fa izio mira lalan̈a araiky mandeha amy fiain̈ana tsisy farany. Nambarany karaha ty: “Vitsy fo olo man̈araka” lalan̈a io. (Matio 7:14) Fivavahan̈a man̈araka raha volan̈iny Baiboly fo ikeny Zan̈ahary. Tokony fivavahan̈a araiky fo arehanolo jiaby ten̈a pivavaka.—Vakia Jaona 4:23, 24; 14:6; Efesianina 4:4, 5.
Zahava video Ikeny Zan̈ahary aby ma Zay Fomba Hanompoanolo Izy?
2. Ino raha nampitandreminy Jesosy momba fivavahan̈a?
‘Iro mivolan̈a tia Zan̈ahary, fa iro tsy man̈ano raha tiany.’—TITOSY 1:16.
Jesosy nampitandrin̈y fa iro olo miaboko paminan̈y aby io hamitaka olo ten̈a Kristianin̈y. Izikoa anao tsy mahay tsarabe, anao mivolan̈a iro ten̈a Kristianin̈y. Karakory fo ahaizanao fa iro io miaboko Kristianin̈y? Baka amy raha ampianarindro ndreky amy raha ataondro.—Vakia Matio 7:13-23.
3. Karakory ma hahaizanao fivavahan̈a marin̈y?
Ty misy raha dimy hahaizanao fivavahan̈a marin̈y:
Man̈aja Baiboly. Iro mifen̈y man̈araka didiny Zan̈ahary amy Baiboly ao. Didinolombelon̈o koa fa tsy fan̈araka amy Baiboly, iro efa tsy man̈araka edy. (Matio 15:7-9) Olo amy fivavahan̈a marin̈y koa fa mampianatra raha olo, iro koa man̈araka raha ampianarindro.—Vakia Jaona 17:17; 2 Timoty 3:16, 17.
Man̈aja an̈aran̈a Jehovah. Jesosy nan̈aja an̈aran̈a Zan̈ahary io, fotony izy nampianatra olo an̈aran̈a Zan̈ahary. Izy koa nampianatra olo hivavaka baka an̈aran̈a Jehovah io hankamasin̈iny ndreky nampianatra olo hahay raha momba Jehovah. (Matio 6:9) Fivavahan̈anjovy ma mampianatra olo an̈aran̈a Jehovah io?—Vakia Jaona 17:26; Romanina 10:13, 14.
Man̈ambara Fanjakan̈any Zan̈ahary. Zan̈ahary nan̈iraka Jesosy han̈ambara raha tsara hataony Fanjakan̈any Zan̈ahary. Izio zaraiky fo mahavita man̈adoso jalinolo jiaby. Jesosy tambony tany teto koa fa mampianatra, matetiky izy mikoran̈a Fanjakan̈any Zan̈ahary io. (Lioka 4:43; 8:1; 23:42, 43) Izy nan̈iraka pianatranany han̈ambara Fanjakan̈any Zan̈ahary. Fivavahan̈anjovy ma hitanao mikoran̈a Fanjakan̈any Zan̈ahary io aminolo?—Vakia Matio 24:14.
Tsy man̈ano raha ratsy fataonolo amy donia ty. Iro tsy tia ady ndreky tsy man̈ano politiky. (Jaona 17:16; 18:36) Iro koa tsy man̈araka jery ratsinolo ndreky raha ratsy fataondro.—Vakia Jakoba 4:4.
Ten̈a mifankatia. Iro koa fa nianatra Baiboly, haindro fa iro tsy tokony han̈avakavaka. Olo amy fivavahan̈a tsy marin̈y tia miady. Olo amy fivavahan̈a marin̈y tsy miady aminolo. (Mika 4:1-3) Iro ten̈a tia olo.—Vakia Jaona 13:34, 35; 1 Jaona 4:20.
4. Hainao amy zay man̈avaka fivavahan̈a marin̈y?
Araka dinikinao, fivavahan̈anjovy man̈araka raha dimy ty: Man̈aja Baiboly, man̈aja an̈aran̈a Zan̈ahary, man̈ambara aminolo Fanjakan̈any Zan̈ahary, tsy miady fa ten̈a mifankatia?—Vakia 1 Jaona 3:10-12.