Fianaragna Faha-13

Akôry Ahitanao Fivavahagna Marigny Zegny?

Zagnahary mankasitraka fivavahagna jiaby, sa araiky fo? (1)

Nagnino ma fivavahagna maro samy mivolagna izy Kristianigny aby? (2)

Ino lamariky ahaizanao taigna Kristianigny? (3-7)

1. Araiky fo fivavahagna Kristianigny marigny naôrign’i Jesosy. Kaila amy ziôty koa, tsy maintsy araiky fo fivavahagna misy taigna mpivavaka amy Zagnahary Jehovah. (Jaona 4:23, 24; Efesianina 4:4, 5) Baiboly mampianatra fa vitsy fo olo magnaraka lalagna tery mengo amy fiaignana.—Matio 7:13, 14.

2. Baiboly nagnambara fa apostoly jiaby koa maty, hisy fampianaragna diso ndraiky faombafaomba tsy kristianigny hiditry tsihelihely amy fiangonagna kristianigny. Maro hitaogno namany aifa mino, hagnaraka irô fa tsy hagnaraka Kristy. (Matio 7:15, 21-23; Asan’ny Apostoly 20:29, 30) Zegny aviatsika ziô mahita fivavahagna maro samy mivolagn’izy Kristianigny aby. Karakôry ahaizagna taigna Kristianigny?

3. Lamariky maventin’ny taigna Kristianigny, irô mifankatia ankitigny. (Jaona 13:34, 35) Irô tsy nampianarigny hifidy karazagna na saoran’olo sady tsy nampianarigny halaigny olo boaka amy firenena hafa. (Asan’ny Apostoly 10:34, 35) Dikan’izegny, irô tsy miditry amin’ady. Irô mifampitaondra karaha olo kibo araiky.—1 Jaona 4:20, 21.

4. Lamariky hafa koa ahaizagna taigna Kristianigny, irô taigna magnaja Baiboly. Irô magneky fa Volagna Zagnahary marigny izio, sady mino raha volagniny. (Jaona 17:17; 2 Timoty 3:16, 17) Amin-drô, Volagna Zagnahary fo taigna misy valaira fa tsy hevitry na faombafaomban’olo. (Matio 15:1-3, 7-9) Irô mifegny magnaraka volagna Baiboly amy fiaignanan-drô jiaby. Irô koa magnano raha mifagnaraka amy raha koragnin-drô boaka amy Baiboly.—Titosy 1:15, 16.

5. Fivavahagna marigny koa tsy maintsy magnamia voninahitry agnaragna Zagnahary. (Matio 6:9) Jesosy nampianatra olo fa Jehovah agnaragna Zagnahary. Taigna Kristianigny tsy maintsy magnano karaha zegny koa. (Jaona 17:6, 26; Romanina 10:13, 14) Azôvy olo hitanao amy fiaraha-monigny misy anao, mikoragna agnaragna Zagnahary io amin’olo hafa?

6. Taigna Kristianigny tsy maintsy magnambara amin’olo hafa Fanjakagnan’ny Zagnahary. Jesosy nagnano zegny. Mikasiky Fanjakagna io fo koragnanany jiaby. (Lioka 8:1) Jesosy nagniraka mpianatranany hagnambara izio amy tany jiaby. (Matio 24:14; 28:19, 20) Taigna Kristianigny mino fa Fanjakagnan’ny Zagnahary io zaraiky fo hampiadagna ndraiky hampilamigny tany ty.—Salamo 146:3-5.

7. Mpianatra Jesosy tsy dia araiky amy tontolo ratsy ty. (Jaona 17:16) Irô tsy magnano pôlitiky na ady madinidiniky amy fiaraha-monigny. Irô mikaizaka tsy hagnaraka fitondran-taigna, raha fatao ndraiky fihetsikin’olo tsy mivavaka amy Zagnahary. (Jakoba 1:27; 4:4) Anao mba mahita fivavahagna, managna lamarikin’ny taigna Kristianigny aby io, amy tany misy anao?

[Sary, pejy 27]

Taigna kristianigny mifankatia, magnaja Baiboly, boaka iô mitory mikasiky Fanjakagnan’ny Zagnahary