Rahaba Nino Jehovah

Hainao taia nisy tanànany Jeriko zen̈y?... Izio ta Kanana tan̈y, ke olo nipetraka tao tsy nino Jehovah. Nisy man̈angy araiky nipetraka tan̈y, Rahaba an̈arany.

Taminizy mbala hely, ren̈iny tantarany Mosesy nahavita nampisaraka Ranomasin̈y Mena ndreky nitondra Israelita aby io niala Ejipta. Ren̈iny koa Jehovah nan̈ampy Israelita aby io nandresy fahavalondro. Tamy diany araiky ty, izy naharen̈y fa Israelita aby io mitoby tsy lavitry Jeriko!

Tandraraiky, andra efa mahiziky, nisy pitsikilo aroe lahy nalefandro Israelita aby io ta Jeriko. Iro koa fa navy tamy tran̈ony Rahaba, izy nan̈iraka iro nidoko taminany tao. Alin̈izio fo, hainy panjaka ta Jeriko tao raha io, ke izy nan̈iraka olo hanambotro iro. Iro nasitriky Rahaba tamy tafontran̈onany tan̈y, baka io izy nivolan̈a taminy iraka panjaka io: ‘Olo aby zen̈y tato marin̈y, fa iro fa loso. Zaho matoky fa anaro koa milomoay, iro mbala tatranaro!’ Nan̈ino ma Rahaba nanitriky iro pitsikilo aby io?... Fotony izy nino Jehovah. Hainy fa Jehovah han̈ano raha hazahoany Israelita aby io tany Kanana.

Iro pitsikilo aby io koa fa hiala tran̈ony Rahaba, iro nivolan̈a taminany fa izy ndreky ry havany tsy hofoaty, iro koa fa handravan̈a Jeriko io. Hainao raha nivolan̈indro tamy Rahaba?... Iro nivolan̈a: ‘Mangalà tady mena, fiheza amy lafenaitaranao, baka olo jiaby antran̈onao ato tsy hofoaty.’ Rahaba nan̈araka raha nivolan̈indro. Hainao amy zay tohiny tantara?...

Tsy ela, Israelita aby io efa nandeha nikodidin̈y tanàna io fa tsy ren̈inolo tao fo. Indraiky isanandra iro nikodidin̈y tanàna io, tan̈atiny tsiota andra. Taminandra fahafito, iro nikodidin̈y tanàna io impito aby. Iro tamy zen̈y naresaka mare. Nataony Jehovah amy zay raha namparongana tanàna io. Tsy rongana tran̈o nisy tady mena tamy lafenaitara in̈y! Hitanao sary io?... Rahaba ndreky ry havany tsy naty!

Karakory han̈anovanao karaha Rahaba in̈y?... Rahaba nino Jehovah, fotony izy nahay raha maro nataony Jehovah. Anao koa mila mianatra raha maro nataony Jehovah. Anao koa ma mino Jehovah mira Rahaba in̈y?... Anao baka mino izy e!