Nasitriky Rahaba iro Pitsikilo aby Io

Iro pitsikilondro Israelita aby io koa fa navy tamy tanànany Jeriko tao, iro nidoko tamy tran̈ony man̈angy araiky zay. Rahaba an̈arany man̈angy io. Koa fa ren̈iny panjakany Jeriko raha zen̈y, izy nandefa maramila nandeha tamy Rahaba tan̈y. Nasitriky Rahaba tan̈abony tafontran̈onany iro pitsikilo aby io, fa iro maramila aby in̈y nirahiny nandeha tantany hafa. Nivolan̈iny Rahaba tamindro pitsikilo aby io: ‘Zaho hiaro anaro, fotony haiko fa Jehovah miaraka aminaro, baka io anaro handresy tanàna ty. Azafady, mba amia toky zaho fa anaro hiaro fianakavian̈anaka.’

Iro pitsikilo aby io nivolan̈a tamy Rahaba: ‘Zahay man̈amia toky anao fa tsisy raha hahazo lan̈iany olo an̈aty tran̈onao ato. Fa tady mena ty fo fiheza amy lafenaitaranao, baka fianakavian̈anao tsy hofoaty.’

Rahaba nampijotso iro pitsikilo aby in̈y baka tamy tady tamy lafenaitaranany. Iro pitsikilo aby io nandeha nisitriky tamy bongo tan̈y, tan̈atiny telo andra. Iro baka tio amy zay nimpody tamy Josoa tan̈y. Iro Israelita aby io nitsaka Ten̈aranony Jordana, baka io nan̈amboatra handeha hangala tany io. Jeriko tanàna voanalohany resindro. Jehovah nan̈iraka iro hikodidin̈y tanàna io indraiky isanandra, an̈atiny tsiota andra. Taminandra fahafito amy zay, iro nikodidin̈y tanàna io impito aby. Iro pisoron̈o aby io nitsoko trompetrandro, baka io iro maramila aby io nandronton̈o farany mare erakany vitandro. Rongana ribany tanàna io, fa tran̈ony Rahaba zaraiky fo tavela. Tsy naty Rahaba ndreky ry havany, fotony Rahaba natoky Jehovah.