Nihavan̈a Jakoba Ndreky Esao

Jehovah nivolan̈a tamy Jakoba fa hiaro izy, karaha niarovany Abrahama ndreky Isaka. Jakoba nipetraka ta Harana. Nanambady izy tan̈y, baka io niteraka maro iro sady nanjary pan̈arivo be.

Jehovah amy zay nivolan̈a tamy Jakoba: ‘Mindao anao mimpody aminaro an̈y.’ Nandeha Jakoba ndreky fianakavian̈anany jiaby nimpody tan̈y. Tandalan̈a nisy olo nan̈aton̈o Jakoba, ke nivolan̈a taminany: ‘Navy ao Esao rahalahinao, miaraka amy lelahy 400!’ Navozo Jakoba tsao fo Esao hamono izy ndreky vadiny, baka io ry zanany. Izy nivavaka tamy Jehovah: ‘Azafady kony mba vonjia zaho!’ Amarainizin̈y, nandifasany Jakoba kado maro Esao, tao ondrikondriky, bengy, aomby, rameva ndreky boriky.

Alin̈inizio Jakoba zaraiky fo tio, nisy anjely hitany! Nifampitolon̈o mare izy ndreky anjely io firaka andra kiaka. Na fa narary Jakoba tsy nety navotsony raha io. Anjely io nivolan̈a: ‘Ambilà zaho andeha.’ Ho Jakoba: ‘Ehe, anao tsy ambelako koa tsy mitsodrano zaho.’

Farany nitsodrano izy foeky anjely io. Nahazo toky Jakoba fa Jehovah tsy han̈ambela izy hivoneny Esao.

Koa fa kiaka andra, tazan̈a Jakoba i Esao ndreky lelahy 400 niaraka taminany. Nandeha taloha izy, baka tio nankohoko tamy tany impito firaka izy navy tankilany Esao. Nilomoay malaky Esao nan̈anton̈o Jakoba ke nifihin̈iny izy. Tafitomoan̈y iro roe, baka tio nihavan̈a ndraiky. Misora ravoravo Jehovah nahita raha nataony Jakoba io, sa karakory?

Nody Esao, fa Jakoba nanohy dianany. Nisy 12 zanaka Jakoba lelahy: Robena, Simeona, Levy, Joda, Dana, Naftaly, Gada, Asera, Isakara, Zebolona, Josefa ndreky Benjamina. Josefa nampiasainy Jehovah hamonjy olonany. Hainao karakory nataony? Alo zahavantsika.