Andevo Nan̈araka Volan̈a Zan̈ahary

Josefa io zanaka Jakoba araiky alohany farany. Hitandro zokiny aby io fa izy ten̈a tiany papandro. Ino eky raha nataondro? Iro be fô Josefa ndreky tsy tia izy. Josefa koa fa nan̈inofy raha hafahafa, nitantarainy tamindry zokiny raha io. Tan̈aty jerindro, andra araiky an̈y iro handohaliky amy Josefa, ke iro nahay tsy tia izy fo!

Tandraraiky, zokiny Josefa aby io niambin̈y ondrikondriky narikitry tanànany Sekema. Jakoba nan̈iraka Josefa handeha hizaha iro. Tazan̈andro zokiny aby io Josefa, ke iro nivolan̈a: ‘Navy in̈y pan̈inofy in̈y! Alo vonentsika izy!’ Izy nisamborindro, baka io natsipindro tan̈aty lavaka lalin̈y be. Nisy rahalahiny araiky, Joda an̈arany, nivolan̈a: ‘Aza vonenaro izy! Sitrany izy halafontsika andevo.’ Koa fa nahita pivarotro midianita handeha ta Ezipta iro, nalafondro vola madiniky volafotsy 20 taminolo aby io Josefa.

Nalaindro lambany Josefa, baka io najobokondro tan̈aty liony bengy, ke nalefandro tamy babandro tan̈y. Volan̈indro: ‘Tsy ndraiky lambany zanakanao edy ty va?’ Jakoba nieritreritry fa nisy biby namono Josefa. Nalahelo mare Jakoba. Tsisy olo nahavita nan̈amboatra jerinany.

Josefa in̈y koa fa navy ta Ezipta, nalafo tamy manampahifan̈a araiky zay, Potifara an̈arany. Jehovah tsy niala Josefa. Hitany Potifara fa Josefa ten̈a nahay niasa sady atokisan̈a. Ke nankin̈iny Potifara taminany raha jiaby nanan̈any.

Hitany vadiny Potifara fa Josefa io zatovo sady matanjaka. Isanandra izy mikaiky Josefa hoandry aminany. Josefa tsy nety, ke nivolan̈a: ‘Aha! Tsy mety zen̈y. Tomponaka matoky zaho, sady anao koa vadiny. Manota amy Zan̈ahary zaho koa mandry aminao!’

Tandraraiky, vadiny Potifara niforse Josefa hoandry aminany. Izy nan̈antsory lambanany, fa Josefa nilefa. Potifara koa fa nody tantran̈o, navandesany vadiny izy. Izy nivolan̈a fa Josefa tseky nan̈olan̈a izy. Neloko mare Potifara, ke Josefa nigadrainy. Jehovah tsy nan̈adin̈a Josefa foeky.