Tantara 21

Josefa Tsy Tian’ny Rahalahiny

NALEMY trôko mare tovolahy io. Izio Josefa. Rahalahiny aby io vo boaka nandafo izy tamy lelahy handeha Ejipta aby io. Hatao andevo Josefa koa fa avy an̈y. Nan̈ino ma rahalahiny aby io nan̈ano raha ratsy karaha zen̈y? Fôtony irô nafana fô Josefa.

Josefa baka farany tian’i Jakoba, baban-drô. Izy zaraiky fo namiany lamba lava tsara. Rahalahiny aby io koa fa nahita fa Josefa farany tian’ny baban-drô, irô nanampôno nafana fô, ndreky tsy tia Josefa. Misy antony hafa koa nahavy irô tsy tia izy.

Josefa nan̈inôfy indroe aby. Amy nôfinany aroe io, rahalahiny aby io nankôhoko taminany zen̈y. Izikoa fa nitantarain’i Josefa tamy rahalahiny aby io nôfinany, irô nahay tsy tia izy fo.

Andra araiky amy zay, rahalahin’i Josefa aby io niambin̈y ôndrikôndrikin’ny baban-drô. Jakoba nan̈iraka Josefa hizaha irô. Izikoa fa hitan-drô boaka lavitry Josefa navy, irô nivolan̈a: ‘Alô vonetsika izy e!’ Robena, talan̈olo amin-drô, nivolan̈a: ‘Aha, anarô kaza man̈ano zen̈y!’ Josefa baka iô nalain-drô, natsipin-drô tan̈aty vôvo tsisy rano. Irô baka iô nipetraka, nieritreritry raha hataon-drô izy.

Tamy zen̈y, nisy lelahy Isimaelita nandalo. Joda nivolan̈a tamy rahalahiny aby io: ‘Alô izy alafotsika amin-drô Isimaelita aby io ô.’ Zen̈y ankitin̈y nataon-drô. Nalafon-drô sekely volafotsy 20 Josefa. Haratsiam-pan̈ahy ma zen̈y!

Ino amy zay raha hivolan̈in-drô amy baban-drô? Irô namono bengy araiky. Baka iô nalain-drô lamban’i Josefa tsarabe in̈y, najobokon-drô tamy lion’ny bengy in̈y tao. Nalain-drô amy zay izin̈y, nindesin-drô tamy baban-drô tan̈y. Irô nivolan̈a: ‘Ty raha hitanay tan̈y. Zahava baka izio koa tsy lamban’i Josefa.’

Hitan’i Jakoba fa nin’i Josefa marin̈y lamba io. Tafiafatra izy nivolan̈a: ‘Lanin’ny biby masiaka Josefa.’ Zen̈y edy raha tian-drô rahalahin’i Josefa aby io iritriretin’ny baban-drô. Jakoba nalahelo. Tan̈atin’andra maro izy tomoan̈y fo. Josefa tsy naty aby. Atsika hizaha nan̈ano karakôry izy koa fa nindesin̈y in̈y.

Genesisy 37:1-35.