Tantara 25

Fifindran̈a Ta Ejipta

TSY voatanan’i Josefa eky raha tan̈aty fônany tao. Nirahiny niboaka ampiasanany jiaby. Izikoa fa izy ndreky rahalahiny aby io fo tao, Josefa nanampôno nitomoan̈y. Misaora lany fan̈ahy rahalahiny aby io tamy zen̈y, fôtony irô tsy nahay raha nampitomoan̈y izy. Farany amy zay, Josefa nivolan̈a: ‘Zaho Josefa. Babako mbala velon̈o?’

Rahalahiny aby io taitry loatra, ke tsy tafivolan̈a. Irô navozo. Josefa nivolan̈a: ‘Man̈ataon̈a marikitry zaho atỳ anarô.’ Irô koa fa nan̈aton̈o narikitry izy, izy nivolan̈a amy zay: ‘Zaho Josefa rahalahinarô, araiky nalafonarô nandeha ta Ejipta in̈y.’

Tsy nasiaka foeky Josefa nivolan̈a tamin-drô: ‘Kaza miasa loha anarô nandafo zaho nandeha atỳ. Zan̈ahary ankitin̈y nan̈iraka zaho andeha atỳ han̈avotro olo. Farao nan̈ano zaho sefon’ny tany jiaby. Ke anarô iziô mimpodiana malaky amy babako an̈y, baka iô tantarà aminany zen̈y. Volàn̈a izy mila avy atỳ, ndreky mipetraka atỳ.’

Nitolon̈in’i Josefa mare irô, baka iô nirôfiny. Farao koa fa naharen̈y fa ao rahalahin’i Josefa, volan̈iny tamy Josefa: ‘Angalà sarety irô, itondrasan-drô baban-drô, ndreky havan-drô jiaby handeha atỳ. Irô hamiako tanàna farany tsara amy tany Ejipta ty.’

Nataon-drô raha jiaby zen̈y. Hitanao iô Josefa fanôjy babany, lera irô jiaby navy ta Ejipta.

Havan’i Jakoba nahaimaro fo. Izikoa konten̈a, 70 irô jiaby. An̈atin’izen̈y Jakoba ndreky zanany, ndreky zafiny jiaby. Tan̈y koa vadin-drô, ndreky ampiasan-drô jiaby. Irô jiaby io nifindra ta Ejipta. Israelita nikahian̈a irô, fôtony Zan̈ahary nan̈ova an̈aran̈a Jakoba, nataony Israely. Atsika hahita fa Israelita aby io nanjary olo nifinidin’i Jehovah.

Genesisy 45:1-28; 46:1-27.