Jehovah Nikoran̈a Tamy Samoela

Ely Pisoron̈obe nanan̈a zanaka aroe lahy. Hofinia ndreky Finehasa an̈arandro io. Iro pisoron̈o tamy tran̈olay masin̈y tao. Iro tsy nijery lalàn̈any Jehovah, baka io koa iro ratsy fan̈ahy mare. Izikoa fa nisy Israelita nan̈ano soron̈o biby amian̈a Jehovah, nalaindro hena ten̈a tsara tamizio. Naharen̈y raha nataondro zanany aby io Ely fa nibanjainy fo iro. Ke ravoravo tamy zen̈y ma Jehovah?

Efa be Hofinia ndreky Finehasa fa Samoela mbala tsaiky hely, ndray zen̈y Samoela tsy nan̈araka raha nataondro. Ravoravo tamy Samoela Jehovah. Alin̈y araiky zay, tamy Samoela nandry in̈y, nisy feo ren̈iny nikaiky an̈aranany. Nifoha izy, ndreky nilomoay nandeha taminy Ely tan̈y, sady nivolan̈a: ‘Anao karaha nikaiky zaho?’ Fa Ely nivolan̈a taminany: ‘Zaho tsy nikaiky anao. Mindao anao mimpody mandry.’ Nimpody nandry ndraiky Samoela. Fa mbala nikaiky fan̈indroeny feo io. Fan̈intelony Samoela naharen̈y raha io, hainy Ely amy zay fa Jehovah nikaiky Samoela io. Ke hoizy tamy Samoela: ‘Izikoa mbala maharen̈y feo io ndraiky anao, ty volàn̈a: Mivolàn̈a anao Jehovah, fa zaho efa mitandren̈y.’

Nimpody nandry Samoela. Baka tio amy zay nisy feo karaha ty: ‘Samoela! Samoela!’ Izy nivolan̈a: ‘Mivolàn̈a, fa zaho efa mitandren̈y.’ Jehovah nivolan̈a taminany: ‘Volàn̈a aminy Ely fa zaho han̈asazy izy ndreky fianakavian̈anany. Hainy raha ratsy nataony zanany aby io tamy tran̈olay masin̈y tato fa nibanjainy fo iro.’ Koa fa maraindrain̈y, nisokafiny Samoela varavaran̈a tran̈olay masin̈y, karaha fataony isanandra. Navozo izy handeha hivolan̈a amy pisoron̈obe raha nivolan̈iny Jehovah taminany. Nikaiky izy Ely, baka io nan̈ontany: ‘Ino raha nivolan̈iny Jehovah taminao, zanako? Ambàra zaho jiaby fa aza misy asitriky.’ Nivolan̈iny Samoela taminany raha jiaby.

Nahaibe fo Samoela, baka io Jehovah nan̈ampy izy fo. Loso hainolo jiaby ta Israely fa Jehovah nifidy Samoela atao paminan̈y ndreky pitsara.