Joiada Tsy Navozovozo

Jezebela nanan̈a zanaka man̈angy, Atalia an̈arany. Izio ratsy jery mira mamany. Atalia nanambady panjakany Joda. Vadiny koa fa naty, zanany nanjary panjaka. Koa fa naty zanany io, Atalia fo nan̈ano ten̈anany panjakany Joda. Nivoneny zanaka panjaka jiaby, ndreky lan̈iany olo mety hanjary panjaka. Firaka amy zafiny mbala nivoneny fo. Olo jiaby navozo izy.

Joiada Pisoron̈obe ndreky vadiny koa fa nahita raha tsy manjary jiaby nataony Atalia io, nasitrikindro zafiny araiky. Joasy an̈arany tsaiky hely io. Tamy tempoly tao iro nitaiza tsaiky io, fa iro koa tatra nivoneny.

Joasy koa fa fito taon̈o, nikahiany Joiada iro sojabe ndreky Levita aby io. Hoizy tamindro: ‘Ambesa tsarabe varavaran̈any tempoly, ke aza misy olo ambela miditry.’ Nataony Joiada panjakany Joda i Joasy, baka io nataony satrokampanjaka tamy lohanany. Vahoaka nandronton̈o: ‘Ho lava haviloman̈a anao panjaka!’

Ren̈iny Atalia vahoaka naresaka, ke izy nandeha tamy tempoly tan̈y. Koa fa hitany Panjaka vaovao io, izy nandronton̈o: “Nivadiky! Nivadiky anaro!” Nisamborindro sojabe aby io panjakavavy ratsy jery be io, nindesindro niboaka, avio nivonendro. Karakory fo raha ratsy jiaby nataony tamy firenena io?

Nirahiny Joiada nifanta tamy Jehovah iro vahoaka aby io, baka Jehovah zaraiky fo hivavahandro. Nirahiny nirobatin̈y ndreky nipotehin̈y tempoliny Bala ndreky sampy jiaby. Nisy pisoron̈o ndreky Levita nirahiny niasa tamy tempoly tao, baka vahoaka hivavaka ao ndraiky. Nasiany piambin̈y varavaran̈a tamy tempoly io, baka tsisy olo maloto tafiditry ao. Baka io Joiada ndreky sojabe aby io nitondra Joasy tamy lapa tan̈y ndreky nametraka izy tamy sezinany. Ravoravo vahoakany Joda tamy zen̈y. Nivavaka tamy Jehovah ndraiky iro, fotony efa tsy tio eky Atalia, sady efa ravan̈a fivavahan̈a tamy Bala. Nahazo hatsaran̈a vahoaka, baka tamy Joiada tsy navozovozo.