Nan̈ino ma Atsika Tôkony Havozo Jehovah?

1-2. Izikoa Salamo 25:14 zahan̈a, ino raha tsy maintsy ataontsika izikoa atsika tihifandray marikitry amy Jehovah?

ERAKA dinikinao, ino aby toetry mila anan̈anao baka anao ndreky namanao ho kamarady fo? Anao mety hivolan̈a fa hikamarady tsarabe anaro izikoa mifankatia ndreky mifan̈ampy. Mety tsy avy an̈atiny dinikinao foeky fa an̈isany toetry ten̈a ilain̈y koa favozoan̈a. Kanefa andininteny fototro amy lahatsoratra ty man̈ambara, fa lan̈iany olo tihikamarady marikitry amy Jehovah, mila ‘mavozo izy.’​—Vakia Salamo 25:14.

² Na firy taon̈o na firy taon̈o nanompoantsika Jehovah, atsika jiaby samy mila mifen̈y mavozo izy fo. Karakory ma mavozo Zan̈ahary zen̈y? Akory hahavy atsika havozo izy? Avio ino raha ianarantsika baka aminy Obadia, Joiada Pisoron̈obe, avio Panjaka Joasy izikoa favozoan̈a Zan̈ahary koran̈iny?

KARAKORY MA MAVOZO ZAN̈AHARY ZEN̈Y?

3. Ino aby raha mety hahavy atsika havozo, avio nan̈ino favozoan̈a mety hiaro atsika?

³ Mety havozo atsika izikoa haintsika fa misy raha mety hampavoa raha atsika. Tsara karazan̈a favozoan̈a araiky zen̈y, fotony han̈ampy atsika hitandrin̈y. Favozoantsika tsao ho latsaka iziô mahavy atsika tsy handeha amy sisiny fampan̈a. Miary lan̈iany raha mety hampiditrandra atsika koa atsika, fotony mavozo tsao haratra. Mitandrin̈y amy raha volan̈intsika ndreky ataontsika koa atsika, fotony mavozo tsao ho robaka fifandraisantsika amy namantsika.

4. Ino ma raha tiany Satana hampidirin̈y an̈aty jerintsika?

⁴ Tiany Satana olo hieritreritry fa Jehovah Zan̈ahary mampavozo. Tiany hampidirin̈y an̈atiny jerintsika fa Jehovah io meloko lalandava, ndreky mitady raha han̈asazian̈a olo, avio sarotindraha mare. (Joba 4:18, 19) Nan̈ino ma atsika tiany hieritreritry zen̈y? Amy zen̈y atsika havozo Jehovah mare, ke ho voly hanompo izy. Fandriky mare raha zen̈y. Ke baka atsika tsy ho tatranizen̈y, mila ianarantsika karakory ten̈a favozoan̈a Zan̈ahary zen̈y.

5. Karakory ma mavozo Zan̈ahary zen̈y?

⁵ Karakory marin̈y ma mavozo Zan̈ahary zen̈y? Mavozo Jehovah olo araiky izikoa tia izy, avio tsy man̈ano raha mety handrobaka fifandraisan̈a aminany. Karaha zen̈y iziô nataony Jesosy. Izy “navozo Zan̈ahary.” (Heb. 5:7) Tsiary nisy fotoan̈a izy nahatsapa fa Jehovah io Zan̈ahary mampavozo. (Isaia 11:2, 3) Ndray izy aby, Jehovah tiany mare, avio izy tihan̈araka volan̈anany. (Jaona 14:21, 31) Karaha Jesosy koa, atsika man̈aja Jehovah mare fotony haintsika fa izy Zan̈ahary be fitiavan̈a, hendry, man̈ano ny rariny, avio farany mahery. Haintsika koa fa tia atsika mare Jehovah, sady misy vokany aminany raha ataontsika. Izikoa atsika tsy man̈araka volan̈anany izy malahelo, fa izikoa ndraiky atsika man̈araka raha volan̈iny izy ravoravo.​—Sal. 78:41; Ohab. 27:11.

AKORY HAHAVY ATSIKA HAVOZO ZAN̈AHARY?

6. Ino, ohatra, fomba araiky hahavy atsika havozo Zan̈ahary? (Salamo 34:11)

⁶ Tsy miaraka atsika teraka efa mavozo Jehovah edy. Fa raha zen̈y mila ianaran̈a. (Vakia Salamo 34:11.) An̈isany fomba araiky hanan̈ana toetry io, fandinihan̈a zavaboary. Izikoa atsika mandiniky zavaboary ho hitantsika fa Jehovah hendry ankitin̈y, farany mahery, avio ten̈a tia atsika. Arakaraka ahitantsika raha aby zen̈y, hahavy atsika hahaihan̈aja ndreky ho tia Jehovah fo. (Rom. 1:20) Ho ranabavy araiky kahian̈a Adrienne: “Gaga zaho koa fa mahita fahendrenany Jehovah baka amy zavaboary aby io. Ke hitako fa izy ten̈a mahay raha mahatsara zaho.” Matetiky izy mieritreritry raha zen̈y, ke hoizy: “Zaho tsy tihan̈ano raha handrobaka fifandraisan̈anaka amy Jehovah foeky, fotony izy nan̈amia fahin̈ana zaho.” Ke nan̈ino izikoa anao manokan̈a fotoan̈a hely handinihan̈a zavaboary, aminy herin̈iandra ty? Anao koa man̈ano zen̈y, anao hahaihan̈aja ndreky hahaiho tia Jehovah fo.​—Sal. 111:2, 3.

7. Nan̈ino vavaka han̈ampy atsika havozo Jehovah?

⁷ Ino koa fomba hafa han̈ampy atsika havozo Zan̈ahary? Mivavaka matetiky aminany. Hahaiho haintsika fo Jehovah, arakaraka ivavahantsika matetiky aminany. Isaka atsika mivavaka aminany baka amezany angovo iaretan̈a fitsapan̈a, mahaitsapantsika fo fa izy farany mahery ankitin̈y. Lera atsika man̈ano mersy Jehovah nan̈amia Zanany hamonjy atsika, loso tsaroantsika fa Jehovah tia atsika ankitin̈y. Lera atsika miangavy Jehovah han̈ampy atsika amy problemontsika, loso tsaroantsika fa Jehovah hendry ankitin̈y. Vavaka karaha zen̈y man̈ampy atsika hahaihan̈aja Jehovah fo. Izio koa mahavy atsika ho tapakevitry tsy han̈ano raha handrobaka fifandraisantsika aminany.

8. Ino raha mila ataontsika baka atsika havozo Zan̈ahary fo?

⁸ Amy Baiboly ao misy tantaranolo nan̈ambela ohatra tsara ndreky ratsy. Havozo Zan̈ahary fo atsika izikoa mangala fianaran̈a baka amy raha nataondro olo aby io. Atsika iziô handiniky ohatranolo aroe tsy nivadiky tamy Jehovah: Obadia piandraikitry fianakavian̈any Panjaka Ahaba, ndreky Joiada Pisoron̈obe. Avio atsika hangala fianaran̈a baka tamy raha nataony Joasy panjakany Joda. Nanompo Jehovah izy tamy voanalohany, fa baka tio izy voly.

MANÀN̈A KORAZY KARAHA OBADIA

9. Nan̈ino favozoan̈a Jehovah nan̈ampy Obadia? (1 Mpanjaka 18:3, 12)

⁹ Ty raha voanalohany volan̈iny Baiboly momba Obadiab: ‘Obadia olo ten̈a navozo Jehovah.’ (Vakia 1 Mpanjaka 18:3, 12.) Nan̈ino favozoan̈a Zan̈ahary nan̈ampy Obadia? Voanalohany, raha zen̈y nan̈ampy izy han̈ano ny marin̈y ndreky nahavy izy ho loso olo mafatoky. Ke baka tamy zen̈y nahavy panjaka nanendry izy hiandraikitry fianakavian̈anany. (Ampiràn̈a amy Nehemia 7:2.) Ankoatranizen̈y, favozoany Zan̈ahary koa nahavy izy nanan̈a korazy. Ten̈a nilainy mare nanan̈a toetry zen̈y, fotony Ahaba, panjaka ratsy fan̈ahy, nanjaka tamy zen̈y. Ahaba ‘nan̈ano raha ratsy mare man̈oloan̈a Jehovah, mandilatra iro [panjaka] jiaby talohanany.’ (1 Mpanj. 16:30) Tsy vitanizen̈y fo fa Jezebela vadiny Ahaba koa nanompo Bala. Halany man̈angy io mare Jehovah. Ke izy nitady hevitry han̈afoan̈ana fivavahan̈a marin̈y tamy fanjakan̈any foko folony Israely. Avio maro tamy paminan̈iny Zan̈ahary nivoneny Jezebela. (1 Mpanj. 18:4) Azo antoko fa tsy nora taminy Obadia nanompo Jehovah tamy fotoan̈a zen̈y.

10. Akory nahitan̈a fa Obadia ten̈a nisy korazy?

¹⁰ Olo nisy korazy mare Obadia. Akory nahitan̈a zen̈y? Jezebela nan̈ano savahao paminan̈iny Jehovah jiaby, misy hamonoany iro. Nalainy Obadia 100 tamy paminan̈y aby io ke nasitriny. Iro baka tio nizarainy aroe. Nataony ‘andiany 50 isaka lavabato sady nan̈aterany mofo ndreky rano.’ (1 Mpanj. 18:13, 14) Ten̈a nisy korazy Obadia, fa izikoa izy tatra tamy zen̈y, izy tsy maintsy naty. Olombelon̈o karaha atsika fo Obadia, ke hay be fa izy tsy tihofoaty, fa fitiavany Jehovah ndreky panompony Jehovah, mbala bebeny fitiavany ain̈inany.

11. Nan̈ino atsika mivolan̈a fa mira Obadia koa panompony Jehovah aminy andra zioty? (Zahava koa sary.)

¹¹ Maro amy panompony Jehovah aminy andra zioty mipetraka amy tany mandrova asantsika. Iro mifen̈y mare man̈aja iro pitondra fanjakan̈a aby io. Fa ndray zen̈y, iro man̈ano karaha Obadia, ke iro tsy voly manompo Jehovah ndray sakanany pitondra fanjakan̈a. (Mat. 22:21) Aboakandro tsarabe fa Zan̈ahary havozoandro, ke izy arehandro volan̈a fa tsy olombelon̈o. (Asa. 5:29) Amy fomba akory? Iro mbala manohy mivory ndreky mitory vaovao tsara fo, fa iro fo misitriky. (Mat. 10:16, 28) Avio, ataondro azo antoko fa iro rahalahy ndreky ranabavindro aby io samy mahazo raha ilaindro hankafataran̈a fifandraisandro amy Jehovah. Diniha baka tantarany Henri, mipetraka an Afriky. Nisy fotoan̈a nandrova asantsika firenena nisy izy. Tamy fotoan̈a zen̈y, Henri nanoloten̈a nan̈atitry boky ndreky gazety tamy piaramanompo. Hoizy: “Zaho olo farany bihen̈amaso. Ke resy lahatra zaho fa nohony fan̈ajako Jehovah mare nahavy zaho nisy korazy nan̈ano izin̈y.” Ke asa anao mba tihanan̈a korazy karaha Henri? Hanan̈a korazy karaha zen̈y anao izikoa mavozo Zan̈ahary.

KARAHA JOIADA PISORON̈OBE, AZA MIVADIKY

12. Akory nahitan̈a fa ten̈a tsy nivadiky tamy Jehovah i Joiada Pisoron̈obe ndreky vadiny?

¹² Olo navozo Jehovah i Joiada Pisoron̈obe. Zen̈y nahavy izy tsy nivadiky ndreky nampirisiky olo hanompo Jehovah. Hita tsarabe raha zen̈y taminy Atalia zanaka Jezebela, nan̈ano forse nanjaka ta Joda. Farandraha ratsy fan̈ahy eky Atalia. Azonizy tiho loso panjaka loatra, sakiny foeky namono zafiny jiaby, ke amy lerany izikoa izy navozoanolo mare. (2 Tan. 22:10, 11) Fa tsy naty ndraiky araiky tamindro tsaiky aby io. Nan̈ino? Fotony izy navotany Josebata, vadiny Joiada Pisoron̈obe. Joasy an̈arany tsaiky io. Iro fivadiany nanitriky izy ndreky nikarakara izy. Baka tamy raha nataondro io, nanjary nisy olo afaka natao panjaka fo baka tamy taranakany Davida. Joiada tsy nivadiky tamy Jehovah foeky, avio tsy nambelany hanakana izy han̈ano raha, favozoan̈a Atalia.​—Ohab. 29:25.

13. Tamy Joasy fito taon̈o, karakory koa nan̈aboahany Joiada fa izy tsy nivadiky?

¹³ Tamy Joasy fito taon̈o, naboakany Joiada ndraiky fa izy tsy nivadiky tamy Jehovah. Nisy tetiky nataony Joiada. Izikoa raha io nahomby, Joasy hanjary panjaka. Izy baka olo ten̈a nanan̈a zo handova seziny Davida. Fa izikoa ndraiky tetiky io tsy nahomby, mety hivonen̈a Joiada. Nampiany Jehovah i Joiada, ke nahomby tetiky nataony. Nampiandro piadidy ndreky Levita aby io koa izy, ke nataondro panjaka i Joasy avio Atalia nivonen̈a. (2 Tan. 23:1-5, 11, 12, 15; 24:1) Baka io, ‘panjaka ndreky vahoaka aby io nirahiny Joiada nan̈ano fifan̈ikian̈a tamy Jehovah, fa iro ho vahoakany Jehovah fo.’ (2 Mpanj. 11:17) Avio Joiada ‘nan̈apetraka piambin̈y varavaran̈a tamy varavaran̈any tran̈ony Jehovah, amy zen̈y tsisy olo maloto afaka miditry ao, na ino na ino nandoto izy.’​—2 Tan. 23:19.

14. Karakory nan̈amezan̈a voninahitry Joiada nohony izy nan̈amia voninahitry Jehovah?

¹⁴ Karaha ty raha efa nivolan̈iny Jehovah taloha tan̈y: ‘Lan̈iany man̈amia voninahitry zaho hamiako voninahitry.’ Ke namezany voninahitry ankitin̈y Joiada! (1 Sam. 2:30) Tamy fomba akory? Nirahiny Jehovah nisoratin̈y amy Baiboly ao raha tsara nataony pisoron̈obe io, baka hangalantsika fianaran̈a. (Rom. 15:4) Tsy vitanizen̈y fo, Joiada koa fa naty, izy nalevin̈y tamy Tanànany Davida niaraka tamindro panjaka aby io, ke voninahitry miavaka raha zen̈y, fotony izy nan̈ano raha tsara taminy Israely ndreky tamy ten̈a Zan̈ahary avio tamy tran̈onany.​—2 Tan. 24:15, 16.

15. Ino raha ianarantsika baka amy tantarany Joiada? (Zahava koa sary.)

¹⁵ Tantarany Joiada afaka man̈ampy atsika jiaby havozo Zan̈ahary. Antipan̈ahy iziô afaka mangala tahaka Joiada, ke mitady fomba fo iarovan̈a fiangonan̈a. (Asa. 20:28) Akory ndraiky olo efa matoe? Izikoa iro mangala tahaka Joiada ke mavozo Jehovah ndreky tsy mivadiky aminany, Jehovah afaka hampiasa iro han̈atanteraka sitraponany. Jehovah tsy han̈ary iro. Tanora ndraiky ke? Aleva onon̈o karakory fomba nitondrasany Jehovah i Joiada, avio aleva tahaka Izy. Mifen̈a man̈amia voninahitry ndreky man̈aja iro matoentsika tsy mivadiky aby io, intsaka eky iro efa nanompo Jehovah tan̈atiny taon̈o maro. (Ohab. 16:31) Avio atsika jiaby koa afaka mangala leson baka amindro piadidy ndreky Levita aby in̈y. Iro baka nanohan̈a Joiada tsarabe. Ke irarian̈a koa atsika jiaby tsy ho voly hanohan̈a ‘iro mitariky’ atsika aby io, ke han̈araka volan̈andro.​—Heb. 13:17.

AZA MAN̈ANO KARAHA PANJAKA JOASY

16. Akory ahitan̈a fa Panjaka Joasy olo mora ribiriben̈y?

¹⁶ Nampiany Joiada hanan̈a toetry tsara Panjaka Joasy. (2 Mpanj. 12:2) Ke mbala hely izy efa nan̈iry han̈ano raha mamparavoravo Jehovah. Fa ino raha niboaka Joiada koa fa naty? Loso iro andriana pivadipinoan̈a aby io koa nitandrin̈esany Joasy. Ino vokany? Izy ndreky iro vahoakanany aby io ‘loso nanompo poto masin̈y ndreky sampy.’ (2 Tan. 24:4, 17, 18) Nalahelo mare Jehovah, fa izy ‘tsy voly nandefa paminan̈y tamindro tan̈y, baka hampirisiky iro himpody aminany ..., fa iro tsy nety nitandren̈y.’ Tsy nijirendro foeky koa raha nivolan̈iny Zakaria zanaka Joiada. Kanefa Zakaria io paminan̈iny Jehovah salakady pisoron̈o. Tsy vitanizen̈y fo, Zakaria zanaka angovaviny Joasy. Nampalahelo fa Panjaka Joasy tsy nahay nankasitraka raha nataony fianakavian̈any Joiada taminany. Ndraiky sakiny namono Zakaria, kanefa fianakavian̈any Zakaria edy nan̈avotro izy.​—2 Tan. 22:11; 24:19-22.

17. Akory niafarany Joasy?

¹⁷ Nisy fotoan̈a Joasy navozo Jehovah. Fa raha zen̈y tsy nahadin̈y ela, ke ratsy mare vokany taminany. Efa nivolan̈a karaha ty Jehovah: ‘Lan̈iany olo tsy man̈isy fotiny zaho tsy hasian̈a fotiny.’ (1 Sam. 2:30) Ke tafara tatỳ, maramila syrianin̈y vitsy hely fo efa naharesy ‘tafiky beny’ Joasy. ‘Naratra mare’ koa Joasy tamy zen̈y. Iro Syrianin̈y aby io koa fa loso, panomponany fo namono Joasy noho izy namono Zakaria. Hitanolo fa tsy vain̈y halevin̈y ‘tamy fasan̈any panjaka tao’ foeky panjaka ratsy fan̈ahy io.​—2 Tan. 24:23-25; zahava “Barakia” amy fan̈azavan̈a amy Matio 23:35.

18. Izikoa Jeremia 17:7, 8 zahan̈a, akory hahavy atsika tsy ho karaha Joasy?

¹⁸ Ino raha ianarantsika baka amy Joasy? Izy mira kakazo araiky tsy mamahatra tsara, ke mila tohan̈ana fo vo mahavita mitsangana. Joiada nanohan̈a izy izikoa fa tsy tio, izy efa voahozongozon̈ony pivadipinoan̈a aby io edy. Ke nivadiky tamy Jehovah izy. Ohatrany Joasy in̈y man̈aboaka tsarabe fa favozoantsika Zan̈ahary tsy tôkony hiankiny amy modely amezanolo, na fianakavian̈antsika zen̈y, na olo an̈ivony fiangonan̈a. Hatanjaka arapan̈ahy fo atsika, izikoa mampitombo fitiavantsika Jehovah ndreky fan̈ajantsika izy. Ho vitantsika raha zen̈y izikoa atsika mianatra tsy tapaka, misaintsain̈y, avio mivavaka.​—Vakia Jeremia 17:7, 8; Kol. 2:6, 7.

19. Ino raha takiny Jehovah amintsika?

¹⁹ Jehovah tsy mitaky raha be loatra amintsika. Mpitoriteny 12:13 mivolan̈a fa ty fo raha takiny amintsika: “Matahora Zan̈ahary araiky ten̈a izy ndreky areha didinany, fotony zen̈y adidy farany maventy tôkony hataonolombelon̈o.” Izikoa atsika mavozo Zan̈ahary, atsika hahavita hiaritry ndreky tsy hivadiky karaha nataony Obadia ndreky Joiada, na ino na ino raha hiboaka aminy amaray. Tsy ho hisy raha foeky hahavita handrobaka fihavan̈antsika amy Jehovah.