Ravan̈a Jerosalema

Matetiky olo ta Joda tao niala tamy Jehovah, ke nanompo sampy. Taon̈o maro, Jehovah nifen̈y nan̈ampy iro. Izy nan̈iraka paminan̈y nampitandrin̈y iro, fa iro tsy nitandren̈y. Paminan̈y aby io nimoezandro. Akory eky hamaran̈any Jehovah sampindro io?

Nebokadnezara tamy zen̈y panjakany Babylony. Izy nandresy firenena maro, baka io resiny koa Jerosalema. Nindesiny ta Babylony Panjaka Joiakina, andriana aby io, maramila, baka io olo mahay asantan̈ana. Harian̈a jiaby tamy tran̈ony Jehovah tao nindesiny aby. Zedekia nataony panjakany Joda.

Tamy voanalohany Zedekia nan̈araka volan̈a Nebokadnezara. Iro firenena tsy lavitry tio ndreky paminan̈y sandoko nan̈iraka izy hivadiky tamy Babylony. Jeremia nampitandrin̈y Zedekia. Hoizy: ‘Anao koa manohitry izy, ho maro olo maty, hisy mosary ndreky aretin̈y a Joda eto.’

Zedekia koa fa baka nanjaka tan̈atiny valo taon̈o, tsy niaraka tamy Babylony eky izy. Nikahiny iro Ezipsianin̈y aby io han̈ampy izy. Nalefany Nebokadnezara hanafiky Jerosalema maramilanany, ke iro nikodidin̈y tanànany Jerosalema. Ho Jeremia tamy Zedekia: ‘Anao koa man̈eky resy volan̈iny Jehovah, anao tsy hofoaty, baka io tanàna ty tsy ho ravan̈a. Anao ndraiky koa mamaly, hiroany Babylony Jerosalema, baka io hindesindro anao.’ Ho Zedekia: ‘Zaho tsy han̈eky resy zen̈y!’

Koa fa nafaka taon̈o araiky sy tapany, nisy maramila babylonianin̈y maro navy. Naronganandro ribany Jerosalema, baka io niroandro tanàna io ndreky tempoly. Olo maro nivonendro ndreky nindesindro ta Babylony.

Nilefa Zedekia. Babylonianin̈y aby io nan̈ian̈a izy. Tatrandro izy tsy lavitry Jeriko, baka io nindesindro tamy Nebokadnezara. Nirahiny panjaka nivonen̈a nan̈oloan̈a izy zanany. Nigilany Nebokadnezara masony Zedekia. Nigadrainy izy baka tio, ke naty tan̈aty prizon tao. Volan̈iny Jehovah: ‘Koa fa afaka 70 taon̈o, hindesiko mimpody a Jerosalema ndraiky vahoakanaka.’

Nisy tanora koa nindesin̈y ta Babylony. Ino raha nahazo iro tan̈y? Asa tsy hivadiky amy Jehovah iro?