Gabriela Mamangy Maria

Nipetraka ta Nazareta, ta Galilia, Maria havany Elizabeta. Maria tamy zen̈y efa tsy ho ela hanjary vadiny Josefa pandrafitry. Niboaka tamy Maria anjely Gabriela, efa navesatra tsiota fanjava Elizabeta tamy zen̈y. Gabriela nivolan̈a: ‘Mbalatsara Maria! Anao ten̈a tiany Jehovah.’ Tsy nazava tamy Maria foeky raha tiany volan̈iny. Ke ho Gabriela: ‘Anao havesatra, ke hiteraka tsaiky lelahy. Ataova Jesosy an̈arany. Izy ho Panjaka, baka io Fanjakan̈anany hahadin̈y mandrakizay.’

Ho Maria: ‘Akory hahavy zaho hiteraka? Zaho kony mbala virijiny e!’ Ho Gabriela: ‘Tsisy raha tsy hainy Jehovah. Hamiany fan̈ahy masin̈y anao, ke hananjanaka. Elizabeta havanao koa zioty efa mavesatra.’ Ke Maria nivolan̈a: ‘Panompovaviny Jehovah zaho. Irarian̈a ho tanteraka aminaka raha nivolan̈inao aby zen̈y.’

Nandeha namangy Elizabeta tamindro tan̈y Maria baka tio. Maria koa fa nan̈ano mbalatsara Elizabeta in̈y, ren̈iny Elizabeta fa nihetsiky tsaiky tan̈aty kibonany tao, ke feno fan̈ahy masin̈y izy nivolan̈a: ‘Anao Maria ten̈a tiany Jehovah e. Ravoravo zaho fotony navy antran̈onaka ato mamany Tomponaka.’ Ho Maria: ‘Zaho midera Jehovah amy fonaka jiaby.’ Telo fanjava Maria nidoko taminy Elizabeta tan̈y, baka io izy nody ta Nazareta.

Koa fa hainy Josefa fa navesatra Maria, tseky hisarahany izy. Nakiry izy fo nisy anjely niboaka tamy nofinany nivolan̈a: ‘Aza mavozo anao hangala vady Maria, izy tsisy raha ratsy nataony.’ Josefa amy zay nangala vady Maria, ke izy nindesiny tantran̈onany.