Jesosy Namelon̈o Lazarosy

Nipetraka ta Betania Lazarosy ndreky Maria, baka io Marta. Iro io pianadahy ndreky namany Jesosy mare. Tandraraiky, tamy Jesosy mbala tandaforeny Ten̈aranony Jordana, Marta ndreky Maria nandefa hafatra ty taminany: ‘Mavia malaky fa marary mare kony Lazarosy ato e.’ Afaka aroe andra, Jesosy vo nandeha tan̈y. Hoizy taminy apostoly aby io: ‘Alo atsika handeha a Betania fa Lazarosy zay mandry, ke andeha hamoha izy zaho.’ Ho iro taminany: ‘Izy mila mandry, fotony izy baka narary.’ Jesosy nivolan̈a tamindro: ‘Naty Lazarosy.’

Tafarany efatra andra nandiven̈ana Lazarosy vo navy ta Betania tan̈y Jesosy. Maro olo namangy Marta ndreky Maria. Koa fa ren̈iny Marta fa navy Jesosy, izy nilomoay nandeha nitsena izy. Ho Marta: ‘Tompoko anao, anao koa tatỳ tsy naty anadahiko in̈y.’ Ho Jesosy: ‘Ho velon̈o ndraiky anadahinao io. Anao ma mino zen̈y Marta?’ Marta nivolan̈a: ‘Zaho mino fa himpody velon̈o izy aminandra hamiloman̈a olo maty an̈y.’ Ho Jesosy: “Zaho familoman̈a olo maty ndreky fiain̈ana.”

Nandeha tamy Maria tan̈y Marta nivolan̈a: ‘Jesosy navy ao.’ Nilomoay nandeha tamy Jesosy tan̈y Maria. Olo aby io nan̈araka izy. Izy nitomoan̈y tamy vitiny Jesosy tio, sady nivolan̈a: ‘Tompoko anao, anao koa tatỳ tsy naty anadahiko in̈y.’ Hitany Jesosy fa nalahelo mare Maria, ke latsaka koa ranomasony Jesosy. Olo aby io koa fa nahita Jesosy nitomoan̈y, iro nivolan̈a: ‘Zahava, tiany mare Lazarosy e.’ Nisy koa nivolan̈a: ‘Fa nan̈ino izy tsy nampiany?’ Ino eky raha hataony Jesosy?

Nandeha tamy fasan̈a tan̈y Jesosy baka tio. Vato be varavaran̈a raha io, ke ho Jesosy: ‘Adosoa vato io.’ Ho Marta: ‘Efa efatra andra kony izy tao e! Mantsin̈y izy zay.’ Nadosondro fo vato io, Jesosy amy zay nivavaka: ‘Babako anao, man̈ano mersy anao zaho, fotony anao mitandren̈y zaho. Haiko ndraiky anao mitandren̈y zaho fo, fa tiako hainolo aby io fa anao nan̈iraka zaho.’ Nikaiky amy zay izy: ‘Lazarosy, anao miboaha!’ Niboaka ankitin̈y Lazarosy, izy mbala nifon̈o lambampaty. Ho Jesosy: “Vahà izy, baka io ambilà mandeha.”

Naro olo nanjary nino Jesosy koa fa nahita zen̈y. Sasany koa nandeha nitantara tamy Fariseo tan̈y. Iro Fariseo aby io amy zay tihamono Lazarosy ndreky Jesosy. Nandeha nangingin̈y tan̈y koa Jodasy Iskariota, araiky tamindro apostoly 12, ke nivolan̈a: ‘Zaho hamianaro otrino, koa mahita tany misy Jesosy?’ Iro nan̈eky han̈amia izy vola madiniky volafotsy 30. Nanomboko tamy zen̈y, Jodasy nizaha hevitry han̈ampian̈a iro Fariseo aby io hanambotro Jesosy.