LESON 37
Ino ma Raha Volan̈iny Baiboly Momba Asa Ndreky Vola?
Anao ma mba efa navy niasaloha mare momba asa ndreky vola? Mety tsy ho mora marin̈y sady mitady vola, sady manompo Jehovah amy fô jiaby. Fa amy Baiboly ao misy torohevitry tsara afaka man̈ampy atsika.
1. Ino ma raha volan̈iny Baiboly momba asa?
Tiany Zan̈ahary atsika ho ravoravo aminy asantsika. Baiboly mivolan̈a fa ‘tsisy raha mahatsara olo mandilatra mahita haravoan̈a baka aminy asa mare ataony.’ (Mpitoriteny 2:24) Jehovah koa mba miasa mare. Man̈ano karaha izy atsika izikoa mazoto miasa. Mamparavoravo izy raha zen̈y, avio atsika koa ho afapo aminy asantsika.
Ten̈a ilain̈a miasa, fa tsy tokony hatakalontsika fanompoan̈a Jehovah foeky. Fanompoan̈a Jehovah raha farany maventy. (Jaona 6:27) Jehovah mampan̈anten̈a fa izikoa izy ataontsika voalohantoeran̈a, izy han̈amia raha ten̈a ilaintsika amy fiain̈ana.
2. Akory hahaizantsika mandanjalanja amy resaka vola?
Baiboly mivolan̈a fa ‘vola io fiarovan̈a.’ Fa Baiboly koa mampitandrin̈y atsika fa koa vola zaraiky fo tsy mahasambatra. (Mpitoriteny 7:12) Ke Baiboly mandrisiky atsika tsy ho tia vola fa ‘ho afapo amy raha anan̈antsika.’ (Vakia Hebreo 13:5.) Atsika koa man̈ano zen̈y, tsy hiasaloha amy raha maro tsy anan̈antsika eky. Atsika tsy hitrosa tsy aminy antony. (Ohabolana 22:7) Atsika koa tsy hiloka ndreky tsy hirisiky amy raha mampapan̈arivo malaky.
3. Akory hataontsika hampiasa vola kanefa tsy ho tia ten̈a?
Jehovah io Zan̈ahary tsy matity. Man̈ano karaha izy atsika izikoa “tsy matity, ndreky matariky man̈amia.” (1 Timoty 6:18) Tsy ho tia ten̈a atsika, fa afaka mampiasa volantsika hanohanan̈a fiangonan̈a ndreky han̈ampian̈a olo sahiran̈a, sirto iro rahalahy ndreky ranabavintsika. Tsy habezany vola amiantsika ten̈a zahany Jehovah, fa antony mahavy atsika man̈amia izio. Izikoa baka amy fontsika jiaby han̈amezantsika volantsika io, atsika ho ravoravo. Jehovah koa ho ravoravo.—Vakia Asan’ny Apostoly 20:35.
ALEVA ONON̈O
Zahava ino mahatsara man̈apetraka asa io amy plasy tokony hisy izy ndreky mahatsara atsika afapo amy raha efa anan̈antsika.
4. Amia voninahitry Jehovah baka amy fomba fan̈anovanao asanao
Misy ifandraisany amy fikamaradianantsika amy Jehovah toetsain̈intsika manoloan̈a asa. Alifasa VIDEO io, avio iaraha dinihin̈y iro fan̈ontanian̈a aby ambany io.
Tamy video io, ino raha nahagaga anao tamy toetsain̈iny Jason ndreky fitondranten̈anany tamy tany niasany?
Ino raha nataony baka asa io amy plasy tokony hisy izy fo?
Vakia Kolosianina 3:23, 24, avio iaraha dinihin̈y fan̈ontanian̈a ty:
Nan̈ino ma ten̈a raha maventy toetsain̈intsika manoloan̈a asa?
Ten̈a ilain̈a miasa, fa tsy tokony hatakalontsika fanompoan̈a Jehovah foeky. Fanompoan̈a Jehovah raha farany maventy
5. Hahazo hatsaran̈a atsika koa afapo amy raha anan̈antsika
Maro olo mamono ten̈a mitady vola. Fa tsy zen̈y torohevitry azontsika baka amy Baiboly. Vakia 1 Timoty 6:6-8, avio iaraha dinihin̈y fan̈ontanian̈a ty:
Mandrisiky atsika han̈ino Baiboly?
Atsika ndray tsy manan̈a, atsika afaka ho sambatra fo. Alifasa VIDEO io, avio iaraha dinihin̈y fan̈ontanian̈a ambany io.
Tamy video tio in̈y, ino raha namparavoravo fianakavian̈a in̈y, ndray hely fo volandro?
Akory fo izikoa atsika efa manambola fa mbala mila bebenizen̈y? Jesosy nan̈ano fan̈oharan̈a zay hahitan̈a fa ten̈a ratsy raha zen̈y. Vakia Lioka 12:15-21, avio iaraha dinihin̈y fan̈ontanian̈a ty:
Ino raha nianaranao tamy fan̈oharan̈any Jesosy io?—Zahava andininy 15.
Vakia avio ampitovisa Ohabolana 10:22 ndreky 1 Timoty 6:10. Avio iaraha dinihin̈y fan̈ontanian̈a aby ty:
Ino raha hitanao ten̈a maventy amy fiain̈ana: Anao tsara fihavan̈ana amy Jehovah sa anao pan̈arivo? Nan̈ino?
Ino maharatsy mamono ten̈a mitady vola?
6. Jehovah hikarakara raha ten̈a ilaintsika amy fiain̈ana
Lera atsika sahiran̈a aminy asa ndreky tsisy vola ten̈a ahitan̈a fatokisantsika Jehovah. Alifasa VIDEO io ahitan̈a ino raha tokony hataontsika, izikoa zen̈y problemontsika, avio iaraha dinihin̈y fan̈ontanian̈a ambany io.
Ino aby problemony rahalahy tamy video tio in̈y?
Akory nataony namaha problemonany aby io?
Vakia Matio 6:25-34, avio iaraha dinihin̈y fan̈ontanian̈a ty:
Ino raha ampan̈antinainy Jehovah olo man̈ano voalohantoeran̈a fanompoan̈a izy?
MISY OLO MIVOLAN̈A: “Zaho tsy afaka mivory tsy tapaka, fotony zaho tsy maintsy miasa hamilomako vadiko ndreky ry zanako.”
Ino toko sy andininy mahavy anao man̈eky fa fan̈anovan̈a fanompoan̈a Jehovah voalohantoeran̈a fo fanapahankevitry ten̈a tsara?
INO RAHA NIANARANAO TATO?
Ilain̈a asa ndreky vola, fa tsy tokony hambelantsika hisakana fanompoantsika Jehovah foeky.
Fan̈ontanian̈a Fameren̈ana
Ino han̈ampy anao hahay handanjalanja amy resaka asa?
Nan̈ino ma tsara izikoa anao afapo amy raha efa anan̈anao?
Akory han̈aboahanao fa anao matoky fampan̈antinan̈any Jehovah hikarakara olonany?
ZAHAVA
Diniha asa Baiboly mivolan̈a fa vola io ratsy.
“Vola ma Fototrony Raha Ratsy Jiaby?” (Lahatsoratra aminy Internet)
Zahava akory mety hampiasantsika vola io baka hamparavoravo Zan̈ahary.
“Ino ma Raha Koran̈iny Baiboly Momba Fan̈amezan̈a?” (Lahatsoratra aminy Internet)
Tsy mampan̈ino ma man̈ano loka?
“Ino ma Raha Koran̈iny Baiboly?—Loka” (Mifohaza! Marsy 2015)
Zahava ino raha nampiova olo navy piloka sady pangalatra ty.
“Navy Tiako Mare Lakorisy Sevaly” (Tilikambo Fiambesan̈a 1 Novambra 2011)