LESON 01
Mbala Ilain̈a ma Baiboly Io?
Maro amintsika tihahay raha momba fiain̈anantsika, momba jaly, momba fafatesan̈a, ndreky momba ny amaraintsika. Atsika koa mety miasaloha amy fiain̈ana andavanandra, karaha ataony velonten̈a ndreky tokantran̈o. Maro ndraiky olo mahita fa Baiboly io mamaly fan̈ontanian̈a maventy momba fiain̈ana. Ao koa misy torohevitry tsara momba fiain̈ana andavanandra. Fahitanao izy, mbala mahatsara fiain̈ananolo ma Baiboly io izioty?
1. Ino aby fan̈ontanian̈a sasany valiany Baiboly?
Ty fan̈ontanian̈a maventy valiany Baiboly: Akory nampisy raha jiaby? Nan̈ino atsika velon̈o? Nan̈ino olo tsara fan̈ahy mijaly? Man̈aia ma olo koa fa maty? Nan̈ino misy lagera, kanefa olo tihiadan̈a? Tany ty ma mbala ho potiky? Baiboly mandrisiky atsika hitady valinizio. Efa mandilatra antapitrisany olo nahita valiny mahafapô.
2. Akory han̈ampiany Baiboly atsika, baka atsika ho ravoravo fo isanandra?
Misy torohevitry tsara amy Baiboly ao. Ohatra, izio mampianatra raha ten̈a mampasambatra fianakavian̈a. Ao mikoran̈a akory atao koa fa miasaloha mare ndreky akory atao baka mazoto miasa. Ho hainao raha jiaby zen̈y. Mbala maro koa raha ho hainao, koa fa mandeha lavidavitry fianaran̈antsika. Anao amy zen̈y mety han̈eky fa “ilain̈y soratra masin̈y jiaby io [raha jiaby an̈aty Baiboly].”—2 Timoty 3:16.
Boky ty tsy mahasolo Baiboly fa mandrisiky anao handiniky Baiboly. Ke vakia iro toko sy andininy misoratra amy leson ato. Ampitovisa amy raha ianaranao iro io.
ALEVA ONON̈O
Diniha akory ataony Baiboly io man̈ampy olo, akory hitiavanao mamaky Baiboly, avio nan̈ino anao mila ampianarin̈y baka hazava aminao raha koran̈inizio.
3. Baiboly io afaka mitariky atsika amy fiain̈ana
Baiboly io mira jiro torsy mazava be in̈y. Atsika mety mampiasa izio baka mahay manapakevitry tsara. Ao koa hahaizantsika raha mbala hoavy.
Vakia Salamo 119:105, avio iaraha dinihin̈y fan̈ontanian̈a aby ty:
Karakory fahitany panoratra salamo io Baiboly?
Akory fo fahitanao Baiboly io?
4. Amy Baiboly io misy valiny fan̈ontanian̈antsika
Misy man̈angy araiky nivolan̈a fa hitany tamy Baiboly tao valiny fan̈ontanian̈a nanahiran̈a jerinany tan̈atiny taon̈o maro. Alifasa VIDEO io, avio iaraha dinihin̈y fan̈ontanian̈a ambany io.
Ino aby fan̈ontanian̈any man̈angy tamy video in̈y?
Akory ahitantsika fa ten̈a nahatsara izy fianaran̈a Baiboly?
Baiboly mandrisiky atsika han̈ontany. Vakia Matio 7:7, avio iaraha dinihin̈y ty:
Ino aby fan̈ontanian̈anao ke mba tianao hita amy Baiboly ao valiny?
5. Akory hahavy anao ho tia mamaky Baiboly?
Maro olo tia mamaky Baiboly ke mahita hatsaran̈a baka amy zen̈y. Alifasa VIDEO io, avio iaraha dinihin̈y fan̈ontanian̈a aby ambany io.
Tamy video in̈y, tia namaky teny ma iro tanora aby in̈y tamy voanalohany?
Nan̈ino fo iro nanjary tia mamaky Baiboly?
Volan̈iny Baiboly ao fa izio azahoantsika fianaran̈a mankahery ndreky man̈amia fan̈antinan̈a atsika. Vakia Romanina 15:4, avio iaraha dinihin̈y fan̈ontanian̈a ty:
Baiboly mivolan̈a fa hankahery anao ndreky han̈amia fan̈antinan̈a anao. Asa mba akory fahitanao raha zen̈y?
6. Tsara izikoa misy olo man̈ampy atsika hahay raha koran̈iny Baiboly
Maro olo mamaky Baiboly man̈eky fa tsara izikoa misy olo man̈azava izio amindro. Vakia Asan’ny Apostoly 8:26-31, avio iaraha dinihin̈y fan̈ontanian̈a ty:
Akory mety hahaizantsika raha koran̈iny Baiboly?—Zahava andininy 30, ndreky 31.
Nila olo nan̈azava Soratra Masin̈y tamy lelahy etiopianin̈y in̈y. Maro koa olo izioty man̈eky fa ten̈a tsara izikoa misy olo man̈azava Soratra Masin̈y io amindro
MISY OLO MIVOLAN̈A: “Fianaran̈a Baiboly io mandany lera.”
Akory ndraiky hevitrinao? Nan̈ino?
INO RAHA NIANARANAO TATO?
Baiboly io man̈amia torohevitry amy fiain̈ana andavanandra, mamaly fan̈ontanian̈a maventy, baka io mankahery ndreky man̈amia fan̈antinan̈a.
Fan̈ontanian̈a Fameren̈ana
Ino aby torohevitry mety ho hitantsika amy Baiboly?
Ino aby fan̈ontanian̈a valiany Baiboly?
Ino raha tianao ianaran̈a amy Baiboly?
ZAHAVA
Diniha iro torohevitry tsara arehantsika izioty amy Baiboly.
“Raha Ampianariny Baiboly Tsy Mety Lany Daty” (Tilikambo Fiambesan̈a No. 1 2018)
Zahava akory nan̈ampiany Baiboly lelahy araiky nandresy raha nampijaly jerinany rango izy mbala hely.
Diniha torohevitriny Baiboly momba fianakavian̈a.
“Torohevitry 12 Mampasambatra Fianakavian̈a” (Mifohaza! No. 2 2018)
Zahava akory an̈itsiany Baiboly hevitry diso anan̈anolo momba azovy mamehy donia ty.