Ino ma Raha Koran̈iny Baiboly Momba Firaisan̈a?

Maro olo men̈atra koa fa mikoran̈a momba firaisan̈a zen̈y. Fa Baiboly koa fa mikoran̈a raha momba izio, mivantan̈a ndreky man̈aja fomba ivolan̈any izy. Mahatsara atsika mahay raha volan̈iny Baiboly momba firaisan̈a. Fotony nan̈ino? An̈abony raha jiaby, Jehovah niasa atsika. Hainy raha ten̈a mahatsara atsika. Ambarany atsika koa raha tokony hatao baka hamparavoravo izy, ndreky raha han̈ampy atsika ankafy fiain̈ana tsisy farany.

1. Akory fiheverany Jehovah firaisan̈a io?

Kadô baka amy Jehovah firaisan̈a io. Tiany Jehovah hankafy izio lelahy ndreky man̈angy vita soratra arapanjakan̈a. Firaisan̈a io tsy raha natao hazahoanolo fivadiany zanaka fo fa natao hahatsapandro fitiavan̈a ndreky haravoan̈a. Zen̈y mahavy Baiboly mivolan̈a: “Miravoravoa amy vadiny fahatanoran̈anao.” (Ohabolana 5:18, 19) Olo manambady tiany Jehovah ho tsara fan̈ahy amy vadiny, ke tsy tokony hijangajanga foeky.​—Vakia Hebreo 13:4.

2. Ino ma fijangajangan̈a zen̈y?

Baiboly mivolan̈a fa “olo pijangajanga, tsy handova Fanjakan̈any Zan̈ahary.” (1 Korintianina 6:9, 10) Iro panoratra Baiboly nanoratra volan̈a griky nampiasa por·neiʹa io ivolan̈ana firaisan̈a tsy aradalàn̈a jiaby. An̈isanizen̈y 1) firaisan̈aa ataonolo tsy vita mariazy, 2) lelahy manambady lelahy na man̈angy manambady man̈angy, baka io 3) olo manambady biby. Atsika mamparavoravo Jehovah ndreky man̈ano raha mahatsara atsika izikoa ‘fady fijangajangan̈a.’​—1 Tesalonianina 4:3.

ALEVA ONON̈O

3. Milifasa fijangajangan̈a

Nisy lelahy araiky, Josefa an̈arany, tsy nivadiky tamy Zan̈ahary. Nifen̈y mare izy baka nadio fitondranten̈a fo. Vakia Genesisy 39:1-12, avio iaraha dinihin̈y fan̈ontanian̈a aby ty:

• Nan̈ino ma Josefa nilefa?​—Zahava andininy 9.

• Araka dinikinao, tsara ma fanapahankevitriny Josefa io? Nan̈ino?

VIDEO: Milifasa Fijangajangan̈a (5:06)

Tiany Jehovah hilefa fijangajangan̈a atsika jiaby. Vakia 1 Korintianina 6:18, avio iaraha dinihin̈y fan̈ontanian̈a aby ty:

• Ino aby raha mety hitariky olo araiky hijangajanga?

• Akory hilifasanao fijangajangan̈a?

4. Anao afaka hahavita hanohitry fakampan̈ahy

VIDEO: Han̈ampy Anao Handresy Fakampan̈ahy Famakian̈a Baiboly (3:02)

• Akory nataony rahalahy tamy video in̈y, koa fa hitany fa mety hampivadiky izy amy vadiny eritreritrinany ndreky raha ataony?

Ndraikindraiky nata Kristianin̈y tsy mivadiky mbala miady mare baka hanan̈a eritreritry madio fo. Akory hahavy anao tsy hanohy hieritreritry raha vetaveta? Vakia Filipianina 4:8, avio iaraha dinihin̈y fan̈ontanian̈a aby ty:

• Raha karakory tokony hiritriretintsika?

• Nan̈ino famakian̈a Baiboly ndreky fan̈anovan̈a asany Jehovah han̈ampy atsika hiady amy fakampan̈ahy hanota?

5. Mahatsara atsika fitsipikiny Jehovah

VIDEO: Mifen̈a Baka Hisain̈y Tsarabe (9:31)

• Akory nataony tsaiky lelahy io nandeha tamy lalan̈a misy fakampan̈ahy?​—Zahava Ohabolana 7:8, 9.

• Izikoa Ohabolana 7:23, 26 zahan̈a, ten̈a misy vokany ratsy fijangajangan̈a io. Ino problemo tsy hahazo atsika, izikoa atsika mifen̈y hadio fitondranten̈a fo?

• Nan̈ino fanan̈ana eritreritry madio han̈ampy atsika ho ravoravo miain̈y tsisy farany?

Misy olo mieritreritry fa tsy pare raha volan̈iny Baiboly momba lelahy manambady lelahy na man̈angy manambady man̈angy. Fa Jehovah io Zan̈ahary be fitiavan̈a, ke tiany ankafy fiain̈ana tsisy farany olo jiaby. Olo man̈araka fitsipikinany fo afaka mankafy fiain̈ana io. Vakia 1 Korintianina 6:9-11, avio iaraha dinihin̈y fan̈ontanian̈a ty:

• Izikoa hevitry Jehovah zahan̈a, ten̈a ratsy ma lelahy manambady lelahy na man̈angy manambady man̈angy zen̈y?

Mila miova atsika jiaby koa tiantsika hamparavoravo Zan̈ahary. Mba tsara han̈anovan̈a ezaka ma raha zen̈y? Vakia Salamo 19:8, 11, avio iaraha dinihin̈y fan̈ontanian̈a aby ty:

• Araka hevitrinao, amy rariny ma fitsipikiny Jehovah? Nan̈ino?

INO RAHA NIANARANAO TATO?

Kadô baka amy Jehovah fan̈anovan̈a firaisan̈a io ke olo fivadiany aradalàn̈a fo tokony hankafy izio.

Fan̈ontanian̈a Fameren̈ana

• Ino aby an̈isany firaisan̈a tsy aradalàn̈a?

• Ino raha han̈ampy atsika hadio fitondranten̈a fo?

• Ino hatsaran̈a ho azontsika izikoa atsika man̈araka fitsipikiny Jehovah momba fitondranten̈a?

ZAHAVA

Zahava nan̈ino ten̈a raha maventy amy Jehovah vadian̈a aradalàn̈a io.

“Ino Raha Koran̈iny Baiboly Momba Olo Man̈ano Tran̈o Araiky Kanefa Tsy Vita Mariazy?” (Lahatsoratra aminy Internet)

Zahava nan̈ino fitsipikiny Baiboly momba lelahy manambady lelahy na man̈angy manambady man̈angy io tsy mivolan̈a fa halantsika iro olo aby io.

“Ratsy ma Lelahy Manambady Lelahy Ndreky Man̈angy Manambady Man̈angy Zen̈y?” (Lahatsoratra aminy Internet)

Zahava fa lalàn̈any Zan̈ahary momba firaisan̈a io miaro atsika.

“Fan̈anovan̈a Firaisan̈a amy Vava ma Mbala Firaisan̈a Fo?” (Lahatsoratra aminy Internet)

Zahava amy fitantaran̈a ‘Najaindro Fo Zaho,’ ino raha nan̈ampy lelahy araiky nanambady lelahy taloha, han̈ova fiain̈ananany baka hamparavoravo Zan̈ahary.

“Man̈ova Olo Baiboly” (Tilikambo Fiambesan̈a 1 Avrily 2011)