FAN̈ONTANIAN̈ANY TANORA
Fan̈anovan̈a Firaisan̈a amy Vava ma Mbala Firaisan̈a Fo?
Foibe Miady Aminy Aretin̈y a Etazony an̈y nan̈adikadin̈y tanora 15 taon̈o firaka 19 taon̈o. Antsasany tamindro tanora aby io efa nan̈ano firaisan̈a tamy vava. Karaha ty nivolan̈iny Sharlene Azam, panoratra boky Oral Sex Is the New Goodnight Kiss: “Izikoa iro tanora aby io edy ikoran̈anao raha momba firaisan̈a amy vava io, iro hivolan̈a aminao fa tsisy maharatsy man̈ano zen̈y. Amindro izio tsy ten̈a firaisan̈a.”
Akory hevitrinao?
Valia ia na ehe fan̈ontanian̈a aby ty:
Tsaiky man̈angy araiky koa man̈ano firaisan̈a amy vava, mety havesatra ma izy?
Ia
Ehe
Mety hazahoan̈a aretin̈y ma fan̈anaovan̈a firaisan̈a amy vava?
Ia
Ehe
Fan̈anaovan̈a Firaisan̈a amy Vava ma Mbala Firaisan̈a Fo?
Ia
Ehe
Ino ny ten̈a marin̈y?
Ampiràn̈a amy raha voakoran̈a ambany io valinteninao:
Tsaiky man̈angy araiky koa man̈ano firaisan̈a amy vava, mety havesatra ma izy?
Valiny: Ehe. Zen̈y antony mahavy olo maro mieritreritry fa tsisy maharatsy man̈ano firaisan̈a amy vava, fa kanefa iro io diso hevitry.
Mety hazahoan̈a aretin̈y ma fan̈anaovan̈a firaisan̈a amy vava?
Valiny: Ia. An̈isany aretin̈y azo baka amizio angatra, aretinkoditry herpesy, hepatity (A na B), SIDA, tety, betivoan̈a ankasarotan̈a an̈y.
Fan̈anaovan̈a firaisan̈a amy vava ma mbala firaisan̈a fo?
Valiny: Ia. Izikoa fa raha jiaby atao ke ampiasan̈a raha mahalelahy na mahaman̈angy ninolo hafa, efa firaisan̈a edy zen̈y. An̈isanizen̈y firaisan̈a amy vava, amy lavabody, fitanatanan̈a raha mahalelahy na mahaman̈angy ninolo hafa.
Nan̈ino ma anao mila mahay ny marin̈y?
Diniha baka iro toko sy andininy aby ty:
Baiboly mivolan̈a: ‘Karaha ty sitrapony Zan̈ahary: “Fadiana fijangajangan̈a.’—1 Tesalonianina 4:3.
Dikany volan̈a nadika “fijangajangan̈a” io, lan̈iany firaisan̈a jiaby ataonolo tsy fivadiany. An̈atinizen̈y olo mitanatana raha mahalelahy na mahamangy ninolo hafa, olo man̈ano firaisan̈a amy vava na amy lavabody. Ratsy mare vokany, izikoa olo araiky mijangajanga. Fa ny farany ratsy, ho robaka fihavan̈anolo io amy Zan̈ahary.—1 Petera 3:12.
Baiboly mivolan̈a: “Olo pijangajanga ndraiky manota aminy ain̈inany tompiny.”
Fan̈anaovan̈a firaisan̈a amy vava io misy vokany ratsy amy lafiny arabatan̈a ndreky arapan̈ahy, avio amy fihetsehampo. Karaha ty nikoran̈iny boky araiky Talking Sex With Your Kids: “Tsy olo man̈ano firaisan̈a mahazatra fo mahatsapa karaha tsisy dikany na manen̈iny na mahatsiaro ho mora hararaotinolo. Iro olo man̈ano firaisan̈a tsy aradalàn̈a aby io koa samy mety hanan̈a fihetsehampo ratsy, na ino na ino karazan̈a firaisan̈a ataony. Io tsy mifidy fa izikoa fa firaisan̈a efa firaisan̈a edy.”
Baiboly mivolan̈a: “Zaho Jehovah, Zan̈aharinao, Araiky mampianatra anao raha mahatsara anao.”—Isaia 48:17.
Asa anao mba mino fa ten̈a mahatsara anao lalàn̈any Zan̈ahary momba firaisan̈a io, sa anao mihevitry izio misery anao? Fa ohatra anao izioty mitondra tomabily, ke amy lalan̈a imboanao feno iro plaky man̈ambara lalàn̈any fitondrasan̈a tomabily amy lalan̈a. Fahitanao izy ma miaro anao iro plaky aby io sa manahiran̈a anao? Han̈ano karakory anao izikoa tsy man̈aja iro lalàn̈a aby io anao ndreky iro sofera aby io?
Lalàn̈any fitondrasan̈a tomabily io tsy man̈omba anao han̈ano zay raha tianao, fa izio ndraiky miaro anao. Lalàn̈any Zan̈ahary koa miaro anao, nata izio tsy man̈omba anao han̈ano raha sasany
Karaha zen̈y koa fitsipikiny Zan̈ahary. Anao koa tsy mijery iro io, anao tsy maintsy ho azondraha fo. (Galatianina 6:7) Karaha ty nivolan̈iny boky Sex Smart: “Anao koa miala amy raha ninoanao ndreky fitsipiky narehanao ke man̈ano raha efa hainao fa tsy mety, tsy man̈aja ten̈a anao amy zen̈y.” Fa izikoa ndraiky anao man̈araka fitsipikiny Zan̈ahary, ho hita fa anao olo mahay man̈avaka ny tsara ndreky ny ratsy. Fa ny raha ten̈a maventy, anao tsy hinjehiny eritreritry.—1 Petera 3:16.