Akory Tokony Hataonao Baka Volan̈anao Hamparavoravo Jehovah?

Jehovah koa fa namoron̈o atsika, namezany kadô tsara be atsika, fahaizan̈a mivolan̈a. Ten̈a raha maventy aminany ma fomba fampiasantsika kadô namiany io? Ia! (Vakia Jakoba 1:26.) Karakory fomba tokony hampiasantsika fahaizantsika mivolan̈a io, baka hamparavoravo Jehovah?

1. Akory fomba tsara ampiasantsika fahaizan̈a mivolan̈a io?

Baiboly mandrisiky atsika “hifankahery ndreky hifanohantohan̈a fo.” (1 Tesalonianina 5:11) Asa azovy olo iritriretinao mila hankahirezin̈y? Ke ino raha azonao atao mba hankahirezan̈a iro? Ataova tsapandro fa iro ten̈a misy valerany aminao. Azonao atao koa mivolan̈a amindro raha itiavanao iro. Ino toko sy andininy mety hankahirezan̈a olo araiky hainao? Maro toko sy andininy mety fidinao. Aza adin̈a fa fomba fivolan̈anao koa mety hankahery olo mare. Ke mifen̈a fo han̈ano volan̈a malemy ndreky feno hatsarampan̈ahy.​—Ohabolana 15:1.

2. Volan̈a karakory tsy tokony hataontsika?

Ho Baiboly: “Irarian̈a tsy ho hisy volandraty hiboaka amy vavanaro.” (Vakia Efesianina 4:29.) Dikanizen̈y, atsika tsy tokony han̈asaha na han̈ano volandraty, ke hamparary fonolo. Atsika koa tsy tokony hitsiko olo na han̈odihody olo amy raha tsy nataony.​—Vakia Ohabolana 16:28.

3. Ino han̈ampy atsika han̈ano volan̈a mankahery olo?

Matetiky raha volan̈intsika hahaizan̈a raha ten̈a an̈aty fontsika ndreky raha mampiasaloha atsika. (Lioka 6:45) Ke atsika mila mizatra mifantoko amy raha mahitsy, madio, mampisy fitiavan̈a, ndreky man̈eva derain̈a. (Filipianina 4:8) Atsika koa tihifantoko amy raha aby io, atsika mila mifidy fangalan̈a diandian̈a tsara ndreky kamarady tsara. (Ohabolana 13:20) Han̈ampy atsika han̈ano volan̈a tsara koa atsika mba mangala fotoan̈a mandiniky hely, alohany hivolan̈a. Baiboly mivolan̈a: “Volan̈a tsy voadiniky, marary karaha tomboko sabatra in̈y, fa volan̈anolo misain̈y ndraiky mampahivan̈a.”​—Ohabolana 12:18.

ALEVA ONON̈O

4. Diniha raha hivolan̈inao, lera hivolan̈anao izy ndreky fomba hivolan̈anao izy

Atsika jiaby samy mety tafivolan̈a raha anin̈enantsika. (Jakoba 3:2) Vakia Galatianina 5:22, 23, avio iaraha dinihin̈y fan̈ontanian̈a aby ty:

• Ino amindro toetry aby io tianao hangatahin̈y amy vavaka baka han̈ampy anao hifehy raha volan̈inao? Akory fomba han̈ampiany toetry aby io anao?

Vakia 1 Korintianina 15:33, avio iaraha dinihin̈y fan̈ontanian̈a ty:

• Misy vokany amy volan̈a ataonao ma namanao ndreky fangalan̈a diandian̈a ataonao?

Vakia Mpitoriteny 3:1, 7, avio iaraha dinihin̈y fan̈ontanian̈a ty:

• Amy fotoan̈a karakory atsika tokony hangin̈y na hiambin̈y fotoan̈a mety tsarabe vo mivolan̈a?

5. Mivolàn̈a raha tsara momba olo

VIDEO: Man̈anova “Volan̈a Tsara Sady Mankahery” (4:07)

• Tamy video in̈y, nan̈ino rahalahy in̈y nila nan̈ova fomba fikoran̈any?

• Ino raha nataony ke nan̈ampy izy niova?

Vakia Mpitoriteny 7:16, avio iaraha dinihin̈y fan̈ontanian̈a ty:

• Ino raha tokony halaintsika onon̈o, atsika koa fa tihivolan̈a olo?

Vakia Mpitoriteny 7:21, 22, avio iaraha dinihin̈y fan̈ontanian̈a ty:

• Nan̈ino man̈ampy anao tsy ho mora meloko andininy io, izikoa fa misy olo ren̈inao mivolan̈a anao?

6. Man̈anova volan̈a feno hatsarampan̈ahy koa fa mikoran̈a amy fianakavian̈anao

VIDEO: Fitiavan̈a Ndreky Fan̈ajan̈a Mampitambatra Fianakavian̈a (3:08)

• Ino han̈ampy anao han̈ano volan̈a feno hatsarampan̈ahy koa fa mivolan̈a amy fianakavian̈anao?

Vakia Efesianina 4:31, 32, avio iaraha dinihin̈y fan̈ontanian̈a ty:

• Karazan̈a volan̈a karakory tokony hataontsika baka fianakavian̈antsika hifankahazo tsara?

Jehovah nikoran̈a raha tsapany momba Jesosy Zanany. Vakia Matio 17:5, avio iaraha dinihin̈y fan̈ontanian̈a ty:

• Akory hangalanao tahaka Jehovah izikoa anao mikoran̈a amy fianakavian̈anao?

INO RAHA NIANARANAO TATO?

Misy vokany aminolo raha volan̈intsika. Atsika mila mandiniky raha hivolan̈intsika, lera hivolan̈antsika izy, ndreky fomba hivolan̈antsika izy.

Fan̈ontanian̈a Fameren̈ana

• Akory aby fomba azonao hampiasan̈a volan̈anao hankahirezan̈a olo?

• Volan̈a karakory tsy tokony hataonao?

• Ino han̈ampy atsika baka volan̈antsika ahitan̈a hatsarampan̈ahy ndreky hankahery olo hafa fo?

ZAHAVA

Ino raha afaka han̈ampy atsika han̈ano volan̈a mankahery olo?

Mifen̈a Man̈ano Volan̈anolo Misy Jery (8:04)

Diniha ino han̈ampy anao tsy han̈ano volandraty.

“Tsy Mety Marin̈y ma Man̈ano Volandraty?” (Lahatsoratra aminy Internet)

Zahava akory hahavitanao miala amy fitsokoan̈a olo.

Akory Ataoko Baka Zaho Tsy Hitsiko Olo? (2:36)

Zahava akory nataony Jehovah nan̈ampy lelahy araiky baka izy voly nan̈ano volandraty.

“Loso Diniky Zaho Han̈ano Akory Hiafarako” (Tilikambo Fiambesan̈a 1 Aoty 2013)