Nan̈ino ma Tsara Hahaizanao Raha Nandalo ta Edena Io?
AN̈ISANY raha ten̈a mahalany fan̈ahy, misy manampahizan̈a mivolan̈a fa tsisy andininy hafa amy Baiboly mankamarin̈y fa ten̈a nisy ankitin̈y tantara momba Edena zen̈y. Ohatra, karaha ty nisoratiny Profesera Paul Morris: “Amy Baiboly ao tsisy toko sy andininy mikoran̈a mivantan̈a momba Edena zen̈y.” Nata hisy “manampahizan̈a” han̈eky zen̈y, raha zen̈y tsy marin̈y.
Maro toko sy andininy mikoran̈a momba zaradain̈iny Edena, Adama ndreky Eva, avio bibilava in̈y.a Dikanizen̈y, iro manampahizan̈a aby io diso hevitry. Fa mbala hadisovan̈a maventy ndreky miparitaka koa fankaratsian̈a Baiboly ataondro pitondra fivavahan̈a aby io ndreky iro pankaratsy Baiboly io. Iro man̈ano raha tsy hinoanolo fa efa navy nisy ankitin̈y zaridain̈iny Edena io.
Izikoa tsy mazava tsarabe amintsika raha nandalo ta Edena io, tsy hazava amintsika tsarabe koa raha hafa koran̈iny Baiboly. Tsy maintsy misy ifandraisany amizio fo baka valiny fan̈ontanian̈a manahiran̈a sain̈inolo maro, amezany Baiboly. Diniha baka valiny fan̈ontanian̈a aby ty:
● Ino mahavy olo matoe ndreky maty? Adama ndreky Eva koa nan̈araka volan̈a Zan̈ahary, iro tsy naty foeky. Fa iro tsy nan̈araka volan̈a Zan̈ahary, ke iro nahainatoe, ndraiky farany iro naty. (Genesisy 2:16, 17; 3:19) Iro efa tsy lavorary eky, avio taranakandro koa nanjary panota ndreky tsy lavorary karaha iro. Karaha ty baka fivolan̈any Baiboly raha zen̈y: “Baka taminolo araiky nidirany fahotan̈a tamy zao tontolo zao. Baka tamy fahotan̈a io nidirany fahafatesan̈a, ke fahafatesan̈a io nahazo olo jiaby, fotony iro jiaby samy efa nanota aby.”—Romanina 5:12.
● Nan̈ino ma raha ratsy io tsy adosony Zan̈ahary? Ta Edena tan̈y, Satana nivolan̈a fa Zan̈ahary zen̈y pavandy, avio tsy amezany raha tsara iro raha niasainy aby io. (Genesisy 3:3-5) Jehovah zen̈y ho Satana tsy mahay mitondra. Safe Adama ndreky Eva nifidy han̈araka volan̈a Satana, ke iro tsy nan̈eky Jehovah ho pitondra iro. Avio koa iro tihivolan̈a ankolaka fa olombelon̈o fo efa mahavita manapakevitry fa tsy mila Zan̈ahary. Fa Jehovah io ten̈a hendry ndreky tia rariny, ke hainy fa raha araiky fo tsara handaminan̈a problemo io. Mila amian̈a fotoan̈a olo hitondra, ke banjain̈a iro han̈ano erakany itiavandro izy. Zen̈y ankitin̈y raha nataondro, ke ratsy vokany. Mbala sosoko zen̈y koa raha nataony Satana. Ke nahaihita tsihelihely fo fa izikoa olombelon̈o fo mifampitondra, tsy hanjary fiain̈ana. Ten̈a mila Zan̈ahary fo olo hitondra iro.—Jeremia 10:23.
● Ino ma fikasan̈any Zan̈ahary taminizy niasa tany ty? Nataony Jehovah nilamin̈y ndreky tsara zaridain̈iny Edena. Tiany hatao karaha zen̈y koa tany jiaby. Ke Adama ndreky Eva nirahiny niteraka, avio ‘hameno’ tany ty ndreky hanjaka amizio. (Genesisy 1:28) Ke fikasan̈any Zan̈ahary taminizy niasa tany ty, tiany hanjary paradisa tany jiaby. Tiany koa izikoa taranakany Adama ndreky Eva lavorary sady mifankatia mipetraka iô. Fomba han̈atantirahany Zan̈ahary fikasan̈anany io raha ten̈a koran̈iny Baiboly.
● Ino ma antony naviany Jesosy tambony tany teto? Adama ndreky Eva koa fa tsy nan̈araka volan̈a Zan̈ahary, navoasazy hofoaty iro ndreky taranakandro. Fa Zan̈ahary be fitiavan̈a, ke zen̈y nahavy taranakandro mbala misy raha antinain̈y. Zan̈ahary nan̈iraka Zanany io nandeha tambony tany teto. Koran̈iny Baiboly fa han̈amia vidipan̈avotan̈a antony naviany. (Matio 20:28) Ino ma vidipan̈avotan̈a zen̈y? Jesosy koran̈iny koa “Adama farany.” Izy nan̈araka volan̈any Zan̈ahary fo, ke izy lavorary fo. Fa Adama ndraiky tsy nahavita zen̈y. Ke Jesosy nan̈amia ain̈inany natao soron̈o na vidipan̈avotan̈a. Ke nohony soron̈o nataony Jesosy io, lan̈iany olo tsy mivadiky amy Zan̈ahary, mety hahazo familankeloko ndreky hahazo fiain̈ana karaha niny Adama ndreky Eva, taminiro mbala tsy nanota in̈y. (1 Korintianina 15:22, 45; Jaona 3:16) Ke Jesosy nan̈amia antoko fa ho tanteraka fikasan̈any Jehovah, han̈ova tany ty hanjary paradisa, karaha zaridain̈iny Edena taloha tan̈y in̈y.b
Fikasan̈any Zan̈ahary io raha ten̈a misy, fa tsy anjoanjo na raha manjavonjavon̈o azavainy manampahizan̈a momba fivavahan̈a aby io. Raha ten̈a nisy ankitin̈y zaridain̈iny Edena ndreky iro olo ndreky biby tao io. Karaha zen̈y koa fampan̈antinan̈any Zan̈ahary efa tsy ela ho tanteraka io. Ten̈a ho hisy koa izio. Fa izikoa tanteraka raha zen̈y, asa anao mba an̈isany ho ao? Izio miankin̈y aminao fo. Tiany Zan̈ahary ho farany maro olo ao. Firaka amindro olo nan̈ano raha ratsy aby io mbala tiany ho an̈isanolo ho ao fo koa.—1 Timoty 2:3, 4.
Tamy Jesosy efa tsy ela hofoaty, izy nikoran̈a tamy lelahy araiky zay. Lelahy io dahalo, ke hainy fa izy ten̈a man̈eva hofoaty ankitin̈y. Fa izy mbala nangataka Jesosy hankahery izy ndreky han̈amia izy fan̈antinan̈a. Ke akory ho Jesosy taminany? “Anao hiaraka aminaka amy Paradisa an̈y.” (Lioka 23:43) Na olo ratsy io tiany Jesosy hivilomin̈y ndreky hahazo hatsaran̈a maro, avio hiain̈y tsisy farany amy Paradisa, ke intsaka eky anao! Anao koa mba tiany Jehovah ndreky Jesosy hahazo fiain̈ana tsara io. Izikoa tianao hahazo zen̈y, mifen̈a mianatra raha momba Zan̈ahary niasa zaridain̈iny Edena io.
[Lamariky amy pazy ambany]
a Ohatra, zahava baka Genesisy 13:10; Deoteronomia 32:8; 2 Samoela 7:14; 1 Tantara 1:1; Isaia 51:3; Ezekiela 28:13; 31:8, 9; Lioka 3:38; Romanina 5:12-14; 1 Korintianina 15:22, 45; 2 Korintianina 11:3; 1 Timoty 2:13, 14; Joda 14; ndreky Apokalypsy 12:9.
b Man̈azava tsarabe momba soropan̈avotan̈a nataony Kristy toko 5 amy boky Ino ma Raha Ten̈a Ampianariny Baiboly?, naboakany Vavolombelon̈o Jehovah.
[Efajoro/Sary]
FAMINANIAN̈A ARAIKY MAMPIFANDRAY RAHA JIABY KORAN̈INY BAIBOLY
“Hataoko raha tsy mampifankahazo anao ndreky man̈angy io, taranakanao ndreky taranakanany. Izy hanorotoro lohanao, anao ndraiky handratra izy aminy hotrombitinany.”—Genesisy 3:15.
Volan̈a Zan̈ahary ta Edena tan̈y io faminanian̈a voanalohany amy Baiboly ao. Fa azovy fo man̈angy ndreky taranakanany io, avio azovy bibilava ndreky taranakanany io? ‘Tsy fankahazo’ karakory ma iro io?
BIBILAVA IO
Satana Devoly.—Apokalypsy 12:9.
MAN̈ANGY IO
Fandaminan̈any Jehovah misy iro anjely andan̈itry an̈y. (Galatianina 4:26, 27) Isaia efa nivolan̈a tsialohaloha fa “man̈angy” io hiteraka firenena arapan̈ahy aminy hoavy.—Isaia 54:1; 66:8.
TARANAKANY BIBILAVA
Lan̈iany olo mifidy han̈ano sitrapony Satana.—Jaona 8:44.
TARANAKANY MAN̈ANGY
Jesosy Kristy voanalohany amy taranakany man̈angy io. izy an̈isany fandaminan̈any Jehovah andan̈itry an̈y io. Fa mbala an̈isany “taranaka” io koa iro voahosotro aby rahalahiny Kristy, hiaraka manjaka aminany andan̈itry an̈y. Iro Kristianin̈y voahosotro aby io firenena arapan̈ahy, na “Israeliny Zan̈ahary.”—Galatianina 3:16, 29; 6:16; Genesisy 22:18.
HOTROMBITY NARATRA
Mesia io nata nijaly, izio tsy nahadin̈y ela. Vitany Satana namono izy taminizy tambony tany teto fa izy baka tio nivilominy Zan̈ahary.
TOROTORO LOHA
Hifoan̈any Jesosy antsendriky raha ratsy nikomanseny Satana ta Edena tan̈y. Avio izy hanorotoro Satana, ke tsy ho hisy Satana eky mandrakizay.—1 Jaona 3:8; Apokalypsy 20:10.
Misy bokikely mamintin̈y raha koran̈iny Baiboly, naboakany Vavolombelon̈o Jehovah. Titranany io Ino ma Raha Koran̈iny Baiboly?
[Sary]
Adama ndreky Eva nijaly fotony iro nanota