Ahilikilikin’olo ma Anao?

OLO araiky voailikiliky zen̈y olo tsy tian’olo atao naman̈a. Mety tsy miran̈a kolera amindrô baka olo io na tsy miran̈a tany favian̈a amindrô. Mety tsy miran̈a amy nindrô koa fivolan̈ananany ndreky raha ataony. Mahatsapa ahilikiliky karaha zen̈y koa ma anao?...a

Alô atsika hikoran̈a momba lelahy araiky nahatsapa raha karaha zen̈y. An̈aran̈anany Mefiboseta. Hianarantsika azôvy izy aviô nan̈ino izy nahatsiaro voailikiliky. Afaka mianatra raha maro baka aminany anao izikoa anao mahatsapa ahilikilikin’ny naman̈a.

Mefiboseta io zanakan’i Jonatana, kamaradin’i Davida. Jonatana naty tamy lagera. Fa talohan’izy naty, izy niangavy Davida mba ho tsara fan̈ahy tamy zanany. Ke Davida koa fa lôso mpanjaka, taon̈o maromaro tafara tatỳ tsaroany raha nivolan̈in’ny kamaradinany io. Mbala velon̈o Mefiboseta tamy zen̈y. Lavo Mefiboseta tamin’izy mbala hely ke nanjary nisy antsa firaka izy naty. Azonao nan̈ino izy nahatsapa voailikiliky?...

Davida tihan̈aboaka hatsaram-pan̈ahy tamy zanakan’i Jonatana. Ke Mefiboseta namezany tran̈o narikitry tran̈onany ta Jerosalema, sady nirahiny niaraka nihina taminany isan’andra. Namezany mpanompo koa Mefiboseta, tsy azôvy zen̈y fa Ziba ndreky ry zanany ndreky olo miasa aminany. Hitantsika baka amy zen̈y fa nan̈aja izy ankitin̈y Davida! Fa asa hainao raha niboaka tafaran’izen̈y?...

Tandraraiky, nisy prôblemo tan̈atin’ny fianakavian̈an’i Davida. Nivadiky taminany zanany lelahy araiky kahian̈a Absaloma sady nitady han̈ongana fanjakan̈a. Ke Davida tsy maintsy nilefa. Maro olo nahay fa Davida nitindren’ny Zan̈ahary ho mpanjaka, ke irô niaraka nilefa taminany. Tihiaraka taminany koa Mefiboseta fa izy tsy afaka, fôtony azon’ny antsanany mijaly izy mandeha.

Davida in̈y amy zay navandesan’i Ziba. Nivolan̈a izy fa kinia nijanon̈o ta Jerosalema zen̈y Mefiboseta fôtony tihanjary mpanjaka. Davida nino vandinany, ke namezany Ziba fanan̈anan’i Mefiboseta jiaby! Tsy ela, resin’i Davida i Absaloma, ke izy nody ta Jerosalema. Nazavain’i Mefiboseta taminany ny marin̈y. Davida nanapa-kevitry fa fanan̈anan’i Mefiboseta in̈y ifampizarandrô roen’i Ziba. Eraka dinikinao, akôry nataon’i Mefiboseta?...

Mefiboseta tsy nitarain̈y ke nivolan̈a fa tsy rariny raha nataon’i Davida. Hainy fa mpanjaka mila filaminan̈a baka izy mahavita tsara asanany. Ke izy nivolan̈a fa tsy man̈ino ndray tanàn’i Ziba an̈y fo fanan̈ana jiaby zen̈y. Taminany ny raha ten̈a maventy, Davida mpanompon’i Jehovah tafimpody ta Jerosalema sady tafimpody mpanjaka.

Nijaly mare Mefiboseta. Natetiky baka izy nahilikilikin’olo. Fa ndray zen̈y, izy tian’i Jehovah sady nikarakarainy mare. Ino raha ianarantsika baka amy zen̈y?... Ndray atsika mifen̈y man̈ano raha marin̈y, mety mbala hisy olo fo hivolan̈a vandy momba atsika. Ho Jesosy: “Izikoa anarô halan’ny donia ty, tsaraova fa zaho efa halany talohan’izy nankahala anarô.” Ndray Jesosy fo nivonen’olo! Fa ndray zen̈y, atsika afaka matoky fa izikoa atsika man̈ano raha marin̈y fo, Jehovah, Zan̈ahary marin̈y, ndreky Jesosy Zanany ho tia atsika fo.