FAN̈ONTANIAN̈A VALIANY BAIBOLY

Afaka mahazo familankeloko ma atsika?

Baiboly man̈ambara fa tsisy olombelon̈o tsy panota. Fahotan̈a io nilovaintsika baka taminy Adama, olombelon̈o voanalohany. Mety misy fotoan̈a atsika tafan̈ano raha tsy mety, fa baka io manen̈iny atsika nan̈ano izin̈y. Jesosy Kristy, Zanaka Zan̈ahary, naty han̈avotan̈a atsika. Izy nan̈efa vidin’ny fahotan̈antsika. Baka amy soron̈o nataony zen̈y mahavy atsika afaka mahazo familankeloko. Ten̈a kadô baka amy Zan̈ahary izio.​—Vakia Romanina 3:23, 24.

Nahavita fahotan̈a maventy olo sasany, ke loso eritreritry iro asa mbala hambelany Zan̈ahary edy hadisovan̈andro. Mamparavoravo fa karaha ty ho Volan̈a Zan̈ahary: “Liony Jesosy man̈adio atsika ho afaka amy fahotan̈a jiaby.” (1 Jaona 1:7) Jehovah von̈ono han̈ambela hadisovan̈antsika izikoa atsika mibebaka aminy ankitin̈y.​—Vakia Isaia 1:18.

Ino basy raha tsy maintsy ataontsika baka atsika voavela heloko?

Izikoa tiantsika hambelany Zan̈ahary Jehovah hadisovan̈antsika, atsika mila mianatra raha momba izy; mila haintsika lalan̈anany, taridalan̈anany, ndreky raha takiny aminolo. (Jaona 17:3) Ambelany Jehovah hadisovan̈anolo mibebaka amy raha tsy mety nataony, ke miezaka hiova.​—Vakia Asan’ny Apostoly 3:19.

Atsika afaka mahazo fankasitrahan̈any Zan̈ahary. Hainy Jehovah fahalimian̈antsika. Izy mamindra fô ndreky tsara fan̈ahy. Nohony Jehovah be fitiavan̈a sady tsy mivadiky mahavy atsika han̈ano raha mamparavoravo izy, sa karakory?​—Vakia Salamo 103:13, 14.