Nan̈ino ma Jaly io Ambelany Zan̈ahary Misy?

HITANY ZAN̈AHARY MA ATSIKA MIJALY IO?

Michela: Mbalatsara, Sophie. Akory naninao? Ravoravo zaho fanôjy anao ndraiky.

Sophie: Zaho koa karaha zen̈y.

Michela: Akory naniny mamanao?

Sophie: Miovaova ay. Sôfy izy miaho, fa niany ndraiky izy tsy dia nan̈ino loatra.

Michela: Tsara zen̈y. Tsy mora miatriky raha sarotro karaha mahazo anao izioty, ke mety mila miady mare anao baka tsy ho kivy.

Sophie: Zen̈y ndraiky ay. Ndraikindraiky zaho loso diniky: ‘Asa mba ombian̈a eky izy tsy hijaly karaha io fo?’

Michela: Tsy diso anao koa mieritreritry zen̈y. Fa asa azonao onon̈o koran̈antsika tamy farany in̈y: Zan̈ahary mahita jalintsika.a Anao tamy zen̈y nivolan̈a fa miasaloha mare anao, intsaka eky tamy mamanao tatrany aksidan tamy tomabily in̈y. Avio anao nan̈ontany karaha ty: Izikoa Zan̈ahary misy angovo han̈adoso jaly, nan̈ino fo izy mbala tsy man̈ano zen̈y? Azonao onon̈o izin̈y?

Sophie: Ia, azoko onon̈o.

Michela: Fa alohany hamaliantsika fan̈ontanian̈a zen̈y, alô himpodianantsika hely antsendriky hevitry sasany hitantsika tamy farany in̈y.

Sophie: Tsy man̈ino.

Michela: Nikoran̈intsika tamizin̈y fa nisy olo manan̈a finoan̈a taloha tan̈y mba nan̈ontany nan̈ino atsika ambelany Zan̈ahary mijaly. Fa Zan̈ahary tsy nasiaka izy na nivolan̈a fa olo io tsy ampy finoan̈a.

Sophie: Sambako naharen̈y hevitry in̈y.

Michela: Hitantsika koa fa malahelo Zan̈ahary mahita atsika mijaly. Ohatra, koran̈iny Baiboly fa nisy fotoan̈a vahoakanany nijaly. Nan̈ano akory Zan̈ahary koa fa nahita zen̈y? Nalahelo koa izy.b Tsy hitanao mankahery mahay fa Zan̈ahary malahelo mahita atsika mijaly?

Sophie: Ia, marin̈y zen̈y.

Michela: Tsy zen̈y fo, nivolan̈a koa atsika tamy farany fa vitany Zan̈ahary niasa atsika io man̈afoan̈a raha jiaby mampijaly atsika, fotony tsisy manan̈a angovo mandilatra izy.

Sophie: Zen̈y baka raha tsy mazava aminaka. Nan̈ino atsika ambelany mijaly be karaha ty, kanefa izy manan̈a angovo han̈afoan̈a jaly?

AZOVY NIVOLAN̈A NY MARIN̈Y?

Michela: Hamaliantsika fan̈ontanian̈a zen̈y, alô zahantsika raha koran̈iny bokiny Genesisy. Zaho matoky fa hainao tantarany Adma ndreky Eva, avio voany kakazo tsy nimboan̈a nihoanindro in̈y. Tsy zen̈y?

Sophie: Ia, efa nampianarin̈y zahay tamy katesisy raha zen̈y. Iro tsy nimboany Zan̈ahary nihina voany kakazo io fa raha io mbala nihoanindro fo.

Michela: Zen̈y tsarabe. Fa ino ma raha nandalo talohany iro nihina izio? Valiny fan̈ontanian̈a io han̈ampy atsika hahay antony mahavy atsika mijaly. Tantara io amy Genesisy 3:1-5. Asa mety vakinao izio?

Sophie: Ia. “Bibilava farany fetsy amy biby jiaby an̈aty ala nataony Zan̈ahary Jehovah. Ke volan̈iny karaha ty tamy man̈angy io: “Izio ma marin̈y ankitin̈y fa Zan̈ahary nivolan̈a taminaro fa anaro tsy mahazo mihina voany kakazo jiaby amy zaridain̈y ato?” Volan̈iny man̈angy io tamy bibilava io: “Zahay mahazo mihina voany kakazo aby amy zaridain̈y ty. Fa momba voany kakazo an̈ivony zaridain̈y io fo, karaha ty nivolan̈iny Zan̈ahary: ‘Aza ahaninaro izio, baka io aza mikasiky izio anaro, tsao anaro maty.’” Volan̈iny bibilava io tamy man̈angy io: “Anaro tsy hofoaty zen̈y foeky. Hainy Zan̈ahary tsarabe fa aminy andra hihinananaro izio, masonaro hibian̈a, anaro ho mira Zan̈ahary, hahay ny tsara ndreky ratsy.”

Michela: Mersy. Alô somary dinihintsika hely andininy aby io. Voanohany, Eva nikoran̈a tamy bibilava araiky. Koran̈iny andininy hafa amy Baiboly fa Satana Devoly nikoran̈a taminy Eva io, fa izy taminio nampiasa bibilava.c Satana nan̈ontany i Eva ino ma raha nivolan̈iny Zan̈ahary momba kakazo io. Fa arakany koran̈iny andininy io, ino sazy miambin̈y Adama ndreky Eva, izikoa iro mihina izio?

Sophie: Iro hofoaty.

Michela: Marin̈y. Izikoa zahan̈a andininy ambanimbany io, ten̈a nankaratsy Zan̈ahary i Satana. Ho izy: “Anaro tsy hofoaty zen̈y foeky.” Tihivolan̈a Satana tiô fa Zan̈ahary pavandy.

Sophie: Sambako ren̈y koa zen̈y!

Michela: Ke problemo naboakany Satana zen̈y tsy ho voavaha betibetiky, fa mila fotoan̈a. Hainao ino antony?

Sophie: Ehe! Tsy haiko foeky.

Michela: Alo atsika hangala ohatra han̈azavantsika izy. Zaho iziô mety hivolan̈a aminao fa zaho matanjaka mandilatra anao. Fa akory han̈aporofoanao fa tsy marin̈y raha zen̈y?

Sophie: Tsy maintsy man̈ano fan̈oesa atsika.

Michela: Zay! Mety hangala raha mavesatra atsika, avio samby irahin̈y mibata izio atsika. Ke tsy ho sarotro foeky hahita azovy amintsika matanjaka. Tsy zen̈y?

Sophie: Zen̈y ke.

Michela: Fa akory fo basy izikoa zaho mivolan̈a fa anao io pamitaka olo? Ho moramora han̈aporofo raha zen̈y, sa karakory?

Sophie: Tsy mora ke.

Michela: Zen̈y tsy ho vitany fan̈oesa eky ay.

Sophie: Marin̈y zen̈y!

Michela: Mila fotoan̈a lavalava vo ho hitanolo pamitaka sa tsy pamitaka anao.

Sophie: Marin̈y zen̈y!

Michela: Impodianantsika hely baka tantara amy Genesisy tio in̈y. Satana ma nivolan̈a fa izy mbala matanjaka mandilatra Zan̈ahary?

Sophie: Aha.

Michela: Izikoa zen̈y raha nisy, tsisy dikany tamy Zan̈ahary foeky nan̈aporofo fa diso Satana. Fa Satana nivolan̈a fa Zan̈ahary io pamitaka. Karaha tihivolan̈a taminy Eva karaha ty izy: ‘Zan̈ahary kony navandy taminaro, fa zaho mivolan̈a ny marin̈y.’

Sophie: Mampieritreritry kony hevitry zen̈y.

Michela: Zan̈ahary ten̈a misy jery, ke hainy tsarabe fa izikoa problemo io tian̈a hilamin̈y tsarabe, tsy maintsy ambela mandeha fotoan̈a. Arakarakany fandehany fotoan̈a, ho hita fo azovy marin̈y na azovy diso.

PROBLEMO MAVENTY

Sophie: Izio ma Eva koa fa naty, tsy efa hita fa marin̈y raha nivolan̈iny Zan̈ahary?

Michela: Amy lafiny araiky, karaha zen̈y. Fa mbala nisy problemo hafa koa naboakany Satana. Zahava ndraiky baka aminy andininy faha-5. Asa hitanao ino raha nivolan̈iny Satana taminy Eva?

Sophie: Nivolan̈a izy fa hibian̈a zen̈y masony Eva izikoa izy mihina voany kakazo io.

Michela: Ia, nivolan̈a izy fa “ho mira Zan̈ahary” zen̈y i Eva ke “hahay ny tsara ndreky ratsy.” Tihivolan̈a Satana io fa misy raha tsara tsy tiany Zan̈ahary ho azonolombelon̈o.

Sophie: Aon!

Michela: Problemo be kony zen̈y ay.

Sophie: Ke karakory amy zay?

Michela: Tihivolan̈a Satana fa ho tsara mare fiain̈anany Eva, na fiain̈ananolo jiaby, izikoa tsy Zan̈ahary mitondra iro. Mbala mitovy fo fomba nandaminany Jehovah problemo io. Nambelany han̈aporofo hevitrinany i Satana. Nambelany Jehovah hitondra donia ty izy. Zen̈y mahavy atsika mijaly mare karaha izioty, fotony Satana manjaka amy donia ty, fa tsy Zan̈ahary.d Ndray izy man̈ano zen̈y, misy vaovao tsara.

Sophie: Ino eky?

Michela: Misy fahamarin̈ana aroe ampianariny Baiboly atsika. Voanalohany, atsika koa fa mijaly, Jehovah man̈ampy atsika. Zahava baka raha nivolan̈iny Panjaka Davida amy Salamo 31:7. Nisy fotoan̈a izy nijaly mare, kanefa aleva onon̈o baka raha nivolan̈iny taminizy nivavaka tamy Zan̈ahary. Asa mety vakinao andininy io, azafady?

Sophie: Tsy man̈ino ke. Karaha ty ho izy: “Ho ravoravo mare zaho, fotony anao be fitiavan̈a salakady tsy mivadiky, hitanao raha mampijaly zaho; hainao irifiriny fahorian̈a mahazo zaho.”

Michela: Ndray Davida nijaly, nankahery izy nahay fa hitany Jehovah raha mahazo izy. Mety misy raha iziô mampijaly anao fa tsy voatery ho hainolo. Ke asa mankahery anao mahay fa hainy Jehovah raha jiaby zen̈y?

Sophie: Mampisy korazy ankitin̈y.

Michela: Ty ndraiky raha faharoe: Tsy hambelany Zan̈ahary hitohy karaha ty fo jaly io. Mivolan̈a Baiboly fa tsy ho ela, Zan̈ahary han̈afoan̈a fitondrasan̈any Satana. Hifoan̈ana tsy ho hisy eky raha ratsy jiaby, an̈isanizen̈y raha nampijaly anao ndreky mamanao. Izikoa tianao, mety mimpody ndraiky zaho aminy herin̈iandra ho avy rỳ, hizahantsika nan̈ino atsika mety matoky fa hifoan̈ana tsy ho ela raha jiaby mampijaly.

Sophie: Pare ke.