Aboaha fa Anao Mino Fampan̈antinan̈any Jehovah
“Finoan̈a zen̈y ... fan̈amezan̈a porofo mazava momba raha ten̈a misy, kanefa tsy hitany maso.”—HEB. 11:1.
1. Akory tokony ho fiheverantsika finoan̈a io?
FINOAN̈A io an̈isany toetry ten̈a tsara. Fa tsy olo jiaby manan̈a finoan̈a aby. (2 Tes. 3:2) Ndray izy man̈ano zen̈y, Jehovah man̈amia panomponany tsiaraikiaraiky toetry io. (Rom. 12:3; Gal. 5:22) Tokony hankasitraka izy mare lan̈iany olo namiany izio.
2, 3. a) Ino aby hatsaran̈a mety ho azonolo manan̈a finoan̈a? b) Ino aby ma fan̈ontanian̈a hidinihintsika?
2 Jesosy Kristy nivolan̈a fa Babany andan̈itry an̈y mitaon̈o olo han̈aton̈o izy, aminy alalany Jesosy. (Jaona 6:44, 65) Olo araiky amy zay koa fa mino Jesosy, ho voavela heloko izy. Ho ravoravo izy, fotony ho afaka hihavan̈a amy Jehovah mandrakizay izy. (Rom. 6:23) Ino fo raha tokony hataontsika, baka atsika man̈eva hahazo hatsaran̈a be karaha zen̈y? Atsika io panota, ke fahafatesan̈a fo raha vain̈y atsika. (Sal. 103:10) Fa Jehovah mizaha toetry tsara an̈atintsika ao. Izy tsara fan̈ahy, ke izy nan̈ano raha harin̈esantsika vaovao tsara. Safe atsika nanjary nino Jesosy, ke man̈anten̈a hiain̈y tsisy farany aminy amaray an̈y.—Vakia 1 Jaona 4:9, 10.
3 Dikany mino zen̈y ma man̈anten̈a an̈atiny jery an̈y fa hahazo hatsaran̈a baka amy Zan̈ahary fo? Ino raha tsy maintsy hinoantsika?
‘FINOAN̈A BAKA AN̈ATINY FÔ’
4. Hazavà fa finoan̈a tsy raha an̈atiny eritreritry fo.
4 Tsy oe ke izikoa olo araiky fa mahay fikasan̈any Zan̈ahary, efa manan̈a finoan̈a edy. Finoan̈a io angovo mandrisiky olo han̈ano raha mifan̈araka amy sitrapony Zan̈ahary. Ke olo araiky koa mino fa Zan̈ahary hamonjy izy, manjary mazoto mikoran̈a vaovao tsara io aminolo koa izy. Karaha ty nivolan̈any apostoly Paoly momba raha zen̈y: “Izikoa ambaranao ankilanolo maro fa Jesosy io Tompo ankitin̈y, baka io inoanao amy fonao fa Zan̈ahary namelon̈o izy, anao ho voavonjy edy. Hanjary olo marin̈y lan̈iany olo manan̈a finoan̈a baka an̈atiny fô, avio lan̈iany olo mikoran̈a aminolo raha inoany fo ho voavonjy.”—Rom. 10:9, 10; 2 Kor. 4:13.
5. Nan̈ino ma finoan̈a io ten̈a ilain̈a, avio akory tokony hataontsika baka izio ho fatatra fo? Hazavà.
5 Mazava baka amy zen̈y fa olo fatatra finoan̈a ndreky man̈ano raha hankafataran̈a izio fo man̈anten̈a hahazo hahazo fiain̈ana tsisy farany io. Karaha kakazo atsabo mila rano in̈y fo finoan̈a io. Izio mahay miovaova, fa tsy karaha iro folera plastiky aby in̈y. Folera io koa tsy voarozy matetiky, manjary malazo. Fa izio koa tsy karakarain̈y foeky, maty edy. Finoan̈a io koa karaha zen̈y. Mety hihen̈y ndreky hofoaty koa izio izikoa tsy raharahian̈a. (Lioka 22:32; Heb. 3:12) Fa izio ndraiky koa voakarakarantsika tsarabe, ho velon̈o fo ndreky “hitombo” fo, sady ho “fatatra” fo.—2 Tes. 1:3; Tit. 2:2.
INO MA DIKANY FINOAN̈A ZEN̈Y?
6. Izikoa Hebreo 11:1 zahan̈a, ino ma dikany finoan̈a zen̈y?
6 Baiboly man̈azava dikany finoan̈a zen̈y, aminy Hebreo 11:1. (Vakia.) Koa fa mikoran̈a finoan̈a zen̈y, misy raha aroe tsy hitany maso ten̈a koran̈iny: 1) “Raha atokisan̈a fa ho avy.” An̈atinizen̈y iro raha volan̈iny Baiboly fa mbala tsendriky tanteraka izioty, an̈isanizen̈y hadoso raha ratsy jiaby, avio hisy donia vaovao. 2) “Raha ten̈a misy, kanefa tsy hitany maso.” An̈isanizen̈y Jehovah Zan̈ahary, Jesosy Kristy, anjely, ndreky Fanjakan̈a andan̈itry an̈y. Ten̈a inoantsika fa misy iro io. (Hebreo 11:3) Akory han̈aboahantsika fa ten̈a mino fampan̈antinan̈any Zan̈ahary ndreky raha tsy hitany maso koran̈iny Baiboly atsika? Mila haboaka amy raha volan̈intsika ndreky raha ataontsika finoan̈antsika io.
7. Izikoa raha nataony Noa in̈y zahan̈a, karakory ma olo manan̈a finoan̈a zen̈y? (Zahava sary voanalohany amy fianaran̈a ty.)
7 Koran̈iny Hebreo 11:7 fa Noa ten̈a nanan̈a finoan̈a. Finoan̈a nahavy Noa “nan̈aboaka tahotro Zan̈ahary ndreky nan̈amboarany sambofiara hamonjian̈a fianakavian̈anany, iro koa fa nahazo fampitandreman̈a baka tamy Zan̈ahary momba raha mbala tsy hitany aby.” Naboakany Noa fa nino Zan̈ahary izy, taminizy nan̈amboatra sambofiara maventy be in̈y. Iro olo aby tanàna araiky tamy Noa tamy zen̈y nety nan̈ontany izy karaha ty: “Hatao ino koa ma sambo be io ô? Noa tamy zen̈y tsy mety ho nangin̈y fo. Izy koa tsy nety ho nivolan̈a tamindro: “Io tsy aferanaro.” Izy olo nanan̈a finoan̈a, ke izy nasaky nitory. Nampitandrin̈y iro olo aby io izy fa Zan̈ahary handripaka olo jiaby ratsy fan̈ahy. Mety nambarany iro koa volan̈any Jehovah karaha ty in̈y: “Zaho efa tsy handefitry aminolo eky fa efa dila loatra raha ratsy ataondro. Ke iro haripako ... Zaho hahavy safodrano hamono raha jiaby manampahin̈ana ambony tany, baka handripahan̈a nofotro jiaby manampahin̈ana ambaniny lan̈itry. Hofoaty raha jiaby ambony tany.” Tsy maintsy nivolan̈iny Noa tamindro koa bekony Jehovah ty: “Midira an̈atiny sambofiara ao.” Nila niditry tan̈atiny sambofiara tao baka lan̈iany olo tsy tihofoaty. Hita tsarabe fa Noa nanan̈a finoan̈a, fotony izy “pitory fahamarin̈ana.”—Gen. 6:13, 17, 18; 2 Pet. 2:5.
8. Ino ma raha nivolan̈iny Jakoba mikasiky finoan̈a?
8 Nikoran̈a momba finoan̈a Jakoba tamy taratasy nisoratiny. Mety tafara heliny nanoratany apostoly Paoly taratasiny Hebreo toko faha-11 nan̈anaovany zen̈y. Nivolan̈a koa izy, karaha nataony Paoly fa finoan̈a io mila haboaka amy raha hatao. Karaha ty nivolan̈iny: “Aboaha zaho karaha io fo baka finoan̈anao, fa zaho ndraiky han̈aboaka anao finoan̈anaka amy raha ataoko.” (Jak. 2:18) Izy baka tio nan̈azava fa tsy mitovy olo mino ndreky olo man̈aboaka fa mino. Izy nivolan̈a koa fa na iro demony aby io mba mino fa misy Zan̈ahary. Fa iro io fo tsy ten̈a manan̈a finoan̈a, fotony iro manohitry fikasan̈any Zan̈ahary. (Jak. 2:19, 20) Avio Jakoba nikoran̈a momba lelahy araiky ten̈a nanan̈a finoan̈a. Izy nivolan̈a: “Tsy baka tamy raha nataony Abrahama ma nan̈ambaran̈a fa izy olo marin̈y, izy koa fa nan̈amia Isaka zanany, nataony tan̈abony alitara in̈y? Avio koa ho Jakoba: “Vatan̈a koa tsisy fahin̈ana maty, karaha zen̈y koa, finoan̈a koa tsy aboaka amy raha atao, maty koa.”—Jak. 2:21-23, 26.
9, 10. Ino ma raha nataony Jaona han̈aboahan̈a fa atsika ten̈a mila man̈aboaka finoan̈a?
9 Apostoly Jaona koa nahay tsarabe dikany finoan̈a zen̈y, izikoa zahan̈a Filazantsara ndreky iro taratasy telo nisoratiny, 30 taon̈o mandilatra tafarany nanoratan̈a taratasiny Jakoba in̈y. Izy panoratra Baiboly ten̈a nampiasa volan̈a griky matetiky nadika “man̈aboaka finoan̈a.”
10 Ohatra, karaha nivolan̈iny apostoly Jaona: “Zay olo mino Zanaka io manan̈a fiain̈ana tsisy farany. Fa zay olo tsy man̈araka volan̈any Zanaka io ndraiky tsy hahazo fiain̈ana, fotony ho meloko aminany fo Zan̈ahary.” (Jaona 3:36) Atsika koa ten̈a mino Jesosy, atsika man̈araka didinany. Hita baka amy raha nisoratiny Jaona fa matetiky Jesosy nivolan̈a fa mila mifen̈y fo atsika man̈aboaka finoan̈a io.—Jaona 3:16; 6:29, 40; 11:25, 26; 14:1, 12.
11. Akory an̈aboahantsika fa mankasitraka Jehovah atsika fotony nan̈ambarany ny marin̈y?
11 Tokony han̈ano mersy Jehovah atsika, fotony izy mampiasa fan̈ahy masin̈y han̈ambaran̈a amintsika ny marin̈y ndreky han̈ampian̈a atsika han̈aboaka finoan̈a. (Vakia Lioka 10:21.) Tsy tokony ho vôly han̈ano mersy Jehovah atsika, fotony izy nitaon̈o atsika hifandray aminany. Nampiasa Jesosy izy han̈atanteraka raha zen̈y. Izy baka “Pitariky ndreky Pampalavorary finoan̈antsika.” (Heb. 12:2) Karakory fo basy han̈aboahantsika fa atsika mankasitraka hatsarampan̈ahiny Jehovah zen̈y? Atsika mila mivavaka ndreky mianatra Volan̈anany, baka ho fatatra finoan̈antsika.—Efes. 6:18; 1 Pet. 2:2.
Aboaha fa anao olo manan̈a finoan̈a, ke mitoria fo isaka anao afaka man̈ano zen̈y (Zahava fehintsoratra 12)
12. Akory han̈aboahantsika fa atsika manan̈a finoan̈a?
12 Tokony haboakantsika amy raha ataontsika fo koa fa atsika mino fampan̈antinan̈any Jehovah. Ohatra, mitory momba Fanjakan̈any Zan̈ahary fo atsika, ke man̈ampy olo hanjary pan̈aradia Jesosy. ‘Man̈ano ny tsara aminolo jiaby’ koa atsika, indraka eky fa aminolo finoan̈a araiky amintsika.’ (Gal. 6:10) Mifen̈y koa atsika hiala amy ‘toetry taloha ndreky raha fatao miaraka amizio.’ (Kol. 3:5, 8-10) Tiantsika hifandray tsarabe amy Jehovah fo baka atsika.
TEN̈A MILA MINO ZAN̈AHARY ATSIKA
13. Nan̈ino ma atsika ten̈a mila mino Zan̈ahary? Ampitovizin̈y aminino ma finoan̈a io, avio nan̈ino?
13 Koran̈iny Hebreo 11:6: “Izikoa tsy raha baka amy finoan̈a, tsisy raha mety atao eky hazahoan̈a sitraka amy Zan̈ahary, fotony zay olo man̈aton̈o izy tsy maintsy mino fa izy misy sady pamaly hatsaran̈a zay olo mitady izy mare.” An̈isany raha voanalohany ilainolo ten̈a Kristianin̈y “finoan̈a Zan̈ahary” io. Ampitoviziny Baiboly amy fototrony tran̈o izio. (Heb. 6:1) Fa mbala misy toetry tsara koa mila ifen̈any Kristianin̈y hanan̈a izy, izikoa iro tiho tiandran̈ahary fo.—Vakia 2 Petera 1:5-7; Joda 20, 21.
14, 15. Nan̈ino ma fitiavan̈a mbala bebeny finoan̈a?
14 Matetiky iro panoratra Baiboly io mikoran̈a momba finoan̈a, fotony izio ten̈a ilaintsika. Io toetry ten̈a koran̈iny matetiky amy Baiboly ao. Ke dikanizen̈y ma ma finoan̈a io zaraiky fo ma toetry ten̈a ilain̈a?
15 Paoly koa fa nampiran̈a finoan̈a ndreky fitiavan̈a, karaha ty nivolan̈iny: “Izikoa zaho manan̈a finoan̈a jiaby ke mahafindra bongo, kanefa zaho tsy manan̈a fitiavan̈a, tsisy raha ilan̈a zaho.” (1 Kor. 13:2) Jesosy koa fa nan̈ontanian̈a “ino didy farany maventy amy Lalàn̈a”, izy namaly fa fitiavan̈a Zan̈ahary didy farany maventy. (Mat. 22:35-40) Fitiavan̈a io raha han̈ampy atsika hanan̈a toetry tsara maro, an̈isanizen̈y finoan̈a. Ohatra, koran̈iny Baiboly fa “fitiavan̈a io mino raha jiaby.” Dikanizen̈y, olo manan̈a fitiavan̈a io mino zay raha volan̈iny Baiboly.—1 Kor. 13:4, 7.
16, 17. Akory an̈aboahany Baiboly fa finoan̈a ndreky fitiavan̈a io raha samby ilain̈a? Fa ino amindro io ten̈a maventy, avio nan̈ino?
16 Ten̈a ilain̈a finoan̈a ndreky fitiavan̈a. Zen̈y mahavy iro panoratra Baiboly aby io mikoran̈a izio miaraka fo. Ohatra, Paoly nandrisiky iro piaramanompo taminany aby io “hisikiny finoan̈a ndreky fitiavan̈a, hatao fiarovan̈a tratra.” (1 Tes. 5:8) Karaha ty koa nisoratiny Petera: “Ndray tsendriky hitanaro izy, anaro efa tia izy. Tsy zen̈y fo, fa ndray tsy ho hitanaro koa izy amy zioty, anaro mino izy.” (1 Pet. 1:8) Jakoba koa nan̈ontany iro rahalahiny voahosotro aby io karaha ty: “Tsy iro olo aby volan̈inolo amy donia ty masikiny ma olo nifidiny Zan̈ahary ho pan̈arivo finoan̈a, ndreky ho pandova Fanjakan̈a nampan̈antinainy lan̈iany olo tia izy?” (Jak. 2:5) Karaha ty koa nisoratiny Jaona: “Ty didinany [Zan̈ahary]: Atsika mila mino an̈aran̈any Jesosy Kristy Zanany avio atsika koa mila mifankatia, eraka nan̈irahiny atsika.”—1 Jaona 3:23.
17 Fa nata ilain̈a mino fampan̈antinan̈any Zan̈ahary, efa tsy ilain̈a eky raha zen̈y lera izio tanteraka. Fa kanefa ndraiky fitiavan̈a Zan̈ahary ndreky fitiavan̈a naman̈a io mbala hilaintsika fo. Zen̈y nahavy Paoly nanoratra karaha ty: “Fa iro telo ty ndraiky mbala ho iô fo: Finoan̈a, fan̈antinan̈a ndreky fitiavan̈a. Fa fitiavan̈a farany maventy amindro io.”—1 Kor. 13:13.
MISY VOKANY MARE FINOAN̈A IO
18, 19. Ino vokatrany finoan̈a aboakany vahoakany Jehovah? Azovy tokony hiderain̈a amy zen̈y?
18 Aminy andrantsika zioty, ten̈a hita fa mino Fanjakan̈any Zan̈ahary aminy ankitiny panompony Jehovah. Zen̈y mahavy atsika amy zioty efa mandilatra valo tapitrisa erantany miain̈y an̈atiny paradisa arapahy. Ke mihavan̈a ndreky miray sain̈y atsika, fotony manan̈a vokatrany fan̈ahiny Zan̈ahary. (Gal. 5:22, 23) Ten̈a misy vokany tsara ankitin̈y finoan̈a ndreky fitiavan̈a io!
19 Tsisy olo mahavita raha karaha zen̈y. Efa Jehovah zaraiky fo mahavita zen̈y, ke ten̈a man̈eva derain̈a izy. (Isaia 55:13) Ten̈a man̈ano mersy izy koa atsika, fotony izy nan̈ano raha hamonjian̈a lan̈iany olo manan̈a finoan̈a. (Efes. 2:8) Fa mbala hahaimaro fo olo hampiany Jehovah baka hanan̈a finoan̈a io. Ke amy farany an̈y, mbala ho feno olo lavorary ndreky man̈ano ny marin̈y, avio sambatra fo ambony tany eto. Hidera Jehovah mandrakizay iro io. Ke irarian̈a atsika jiaby hino fa ho tanteraka fampan̈antinan̈any Jehovah jiaby, ke haboakantsika amy raha ataontsika finoan̈antsika zen̈y.