Hajà Olo ‘Natambatra Zan̈ahary Lazioga Araiky’
“Olo koa fa natambatra Zan̈ahary lazioga araiky, tsy tokony hisarahinolo eky.”—MAR. 10:9.
1, 2. Tokony handrisiky atsika han̈ino raha koran̈iny Hebreo 13:4 ao?
ANAO ma tia man̈aja Jehovah ndreky man̈amia voninahitry izy? Man̈ano zen̈y anao, sady Jehovah lastio koa mendriky raha zen̈y. Izy mampan̈anten̈a fa hamiany voninahitry lan̈iany olo man̈amia voninahitry izy. (1 Sam. 2:30; Ohab. 3:9; Apok. 4:11) Anao koa tiany han̈aja ndreky han̈amia voninahitry olo hafa, an̈isanizen̈y iro manampahifan̈a aby io. (Rom. 12:10; 13:7) Misy raha hafa koa mba tiany hajainao. Tiany anao han̈aja vadian̈anao.
2 Karaha ty nisoratiny apostoly Paoly: “Vadian̈a io tokony hisy hajany aminolo jiaby, ke fandrian̈anolo fivadiany tsy tokony ho voaloto.” (Heb. 13:4) Paoly eto tsy raha zisty tihivolan̈a momba vadian̈a fo fa izy tihandrisiky Kristianin̈y tsiaraikiaraiky han̈aja vadian̈a. Tiany iro hihevitry izio ho raha ten̈a misy valerany. Ke izikoa anao izioty efa misy vady, asa mba karaha zen̈y fiheveranao vadian̈anao?
3. Ino ma torohevitry maventy nikoran̈iny Jesosy momba vadian̈a? (Zahava sary voanalohany amy fianaran̈a ty.)
3 Izikoa anao man̈aja vadian̈anao, mangala tahaka Jesosy anao, fotony izy modely farany tsara. Tandraraiky, nisy Fariseo nan̈ontany izy momba fisarahan̈a. Jesosy tamy zen̈y nan̈ampody raha nivolan̈iny Zan̈ahary momba vadian̈a tamboanalohany tan̈y. Volan̈iny karaha ty: “Olo koa fa natambatra Zan̈ahary lazioga araiky, tsy tokony hisarahinolo eky.”—Vakia Marka 10:2-12; Gen. 2:24.
4. Tiany Zan̈ahary han̈ano karakory ma vadian̈anolo?
4 Nikeny Jesosy fa vadian̈a io baka amy Zan̈ahary, avio izio natao hahadin̈y ela. Zan̈ahary tsiary ndraiky nivolan̈a taminy Adama ndreky Eva fa iro afaka misaraka zen̈y. Vady araiky fo namezany i Adama, ke tiany iro ho fivadiany mandrakizay.
FIVOANDRAHA AMY VADIAN̈A KANEFA TSY HAHADIN̈Y ELA
5. Ino vokany, izikoa araikiaraiky aminolo fivadiany maty?
5 Adama koa fa nanota, naro raha niova amy vadian̈a. Ohatra, nanjary mety maty araiky aminolo fivadiany, ke raha zen̈y misy vokany mare amy vadian̈a. Apostoly Paoly nan̈azava fa izikoa naty araiky aminolo fivadiany, ravan̈a vadian̈andro, ke araiky mbala velon̈o io afaka manambady ndraiky koa.—Rom. 7:1-3.
6. Izikoa Lalàn̈any Mosesy zahan̈a, akory fahitany Jehovah vadian̈a io?
6 Jehovah nan̈amia Lalàn̈a iro Israelita aby io. Aminizio ahitan̈a raha tsiaraikiaraiky momba vadian̈a. Fa iro tamy zen̈y mbala nambelany Zan̈ahary hanan̈a vady maro. Na izy man̈ano zen̈y, nisy fitsipiky napetrakany Zan̈ahary tamindro olo nanan̈a vady maro aby io, baka iro tsy nampijaly vadindro ndreky zanakandro. Ohatra, izikoa nisy Israelita araiky nanambady panompo, kanefa mbala nangala vady hafa koa, tsy mahazo ahen̈iny hanin̈y famezany vadiny voanalohany io ndreky lambanany ndreky adidy amimbady tokony hataony aminany. Nirahiny Jehovah narovan̈a ndreky nikarakarain̈y tsara koa izy. (Eks. 21:9, 10) Nata atsika izioty efa tsy ambany Lalàn̈any Mosesy eky, hitantsika baka amizio fa raha ten̈a valera amy Jehovah vadian̈a io. Tsy mahay hahavy anao hahaihan̈aja vadian̈a fo edy raha zen̈y?
7, 8. a) Ino ma raha koran̈iny Lalàn̈a amy Deoteronomia 24:1? b) Akory fahitavany Jehovah fisarahan̈a?
7 Fa ino fo basy raha koran̈iny Baiboly momba fisarahan̈a? Mbala tsy niova fahitavany Jehovah vadian̈a. Fa kanefa iro Israelita aby io nambelany nisaraka, nata tsy zen̈y fikasan̈andro. (Vakia Deoteronomia 24:1.) Izikoa nisy lelahy israelita araiky nahita “raha manafintohin̈y” tamy vadiny, nahazo nisaraka izy. Fa kanefa nata tsy nifaritany Lalàn̈a raha manafintohin̈y io, izio tsy hadisovan̈a madinidiniky fa ten̈a raha ratsy na raha nangala baraka foeky. (Deot. 23:14) Fa ny raha mampalahelo, naro Jiosy nisarabadian̈a tamy raha tsisy dikany, tamy Jesosy tambony tany teto. (Mat. 19:3) Tsy tokony han̈ano karaha zen̈y foeky atsika!
8 Taminy andrany paminan̈y Mika koa, naro lelahy nisaraka tamy vadindro, fotony iro man̈angy aby io efa matoe. Fa iro baka tio nandeha nanambady man̈angy mbala tanora sady panompo sampy foeky. Karakory fahitavany Jehovah raha nataondro zen̈y? Karaha ty ho izy: “Halako fisarahan̈a io.” (Mal. 2:14-16) Mbala karaha tamy voanalohany fo fiheverany Zan̈ahary vadian̈a io fa tsiary niova. Mbala tokony “hitambatra amy vadiny” fo lelahy, ary “mbala hanjary nofotro araiky fo” iro. (Gen. 2:24) Karaha hevitriny Babany zen̈y koa hevitriny Jesosy. Nivolan̈iny Jesosy: “Olo koa fa natambatra Zan̈ahary lazioga araiky, tsy tokony hisarahinolo eky.”—Mat. 19:6.
ANTONY ARAIKY AZO ISARAHAN̈A
9. Ino ma raha tiany Jesosy koran̈iny amy Marka 10:11, 12?
9 Mety ho karaha ty raha avy an̈atiny jerinolo: ‘Ke tsy mety foeky zen̈y misaraka, avio tsy mety ma manambady ndraiky koa?’ Karaha ty ho Jesosy: “Lan̈iany olo misaraka amy vadiny, ke manambady olo hafa, mandiadia vady izy. Karaha zen̈y koa man̈angy araiky izikoa nisaraka amy vadiny, fa loso manambady olo hafa, mandiadia vady koa izy. (Mar. 10:11, 12; Lioka 16:18) Hita baka amy zen̈y fa Jesosy ten̈a nan̈aja vadian̈a, ke tiany han̈ano karaha zen̈y koa olo jiaby. Raha tiany koran̈iny, izikoa lelahy araiky na man̈angy araiky misaraka amy vadiny ke manambady olo hafa, kanefa tsy fijangajangan̈a antony nisarahany, mandiadia vady izy amy zen̈y. Mbala fivadiany fo baka izy ndreky vadiny nisarahany io, ke tsy foan̈a vadian̈andro. Mbala “nofotro araiky fo” iro amy Zan̈ahary. Nivolan̈a koa Jesosy fa izikoa misaraka amy vadiny lelahy araiky kanefa tsy nijangajanga man̈angy io, mety hahavy man̈angy io handiadia vady koa raha zen̈y. Fotony nan̈ino? Fotony baka tamy zen̈y, man̈angy io mety hieritreritry fa izy mila olo hamelon̈o izy ndreky hikarakara izy, ke tokony hanambady olo hafa izy. Fa kanefa izy koa nan̈ano zen̈y, mbala nandiadia vady fo izy.
10. Ino ma antony mety hisarahany Kristianin̈y araiky manambady, ke ahafahany manambady olo hafa?
10 Lera karakory fo basy vadian̈a io vo azo foan̈ana? Jesosy nivolan̈a karaha ty: “Ty raha ambarako anaro: Lan̈iany lelahy misarabadian̈a, ke manambady olo hafa, izy mandiadia vady, izikoa tsy raha baka amy fijangajangan̈a zaraiky fo antony hisarahany.” (Mat. 19:9) Efa karaha zen̈y koa raha nivolan̈iny tamy Toriteny Tan̈abony Bongo in̈y. (Mat. 5:31, 32) Tamy fotoan̈a aby io, fijangajangan̈a fo raha nikoran̈iny. Izio baka amy volan̈a griky pôrneia. Izio ivolan̈ana karazan̈a firaisan̈a jiaby ataonolo tsy fivadiany. Tafiditry an̈atinizio olo mandiadia vady, mivaroten̈a, olo tsy vita mariazy man̈ano firaisan̈a, lelahy samy lelahy mifanambady na man̈angy samy man̈angy mifanambady, ndreky olo manambady biby. Ke izikoa misy lelahy araiky mijangajanga, man̈angy io afaka mifidy, na izy hisaraka na izy tsy hisaraka. Fa izikoa izy misaraka amy lelahy io, dikanizen̈y foan̈a vadian̈andro manoloan̈a Zan̈ahary.
11. Nan̈ino ma misy olo manapakevitry tsy hisaraka, nata vadiny nijangajanga?
11 Fa Jesosy iô tsy nivolan̈a fa tsy maintsy misarabadian̈a olo izikoa fa nisy araiky amindro nijangajanga. Ohatra, man̈angy araiky afaka mifidy ny tsy hisaraka. Mety mbala tiany baka vadiny io, ke izy von̈ono hamela helokonany. Von̈ono koa izy hankatsara fifandraisan̈andro. Avio, izy koa baka hisaraka, kanefa izy tsisy vady, mety ho sahiran̈a izy. Anisany raha mety hanahiran̈a izy izioty ohatra, azovy olo hamelon̈o izy? Ho vitany ma hifehy fan̈irian̈anany han̈ano firaisan̈a? Akory hataony izikoa izy mahatsiaro latsatokana? Avio han̈ano akory koa iry zanany? Tsy hahaisarotro aminany fo hitaiza iro amy fahamarin̈ana? (1 Kor. 7:14) Mety ho maro problemo ho tojy izy, izikoa izy misarabadian̈a.
12, 13. a) Ino ma raha nisy tamy tokantran̈ony Hosea? b) Nan̈ino ma Hosea nan̈ampody Gomera, avio ino raha ianarantsika baka amy zen̈y?
12 Afaka hangalantsika fianaran̈a koa raha niain̈any paminan̈y Hosea. Nirahiny Jehovah nangala vady i Gomera izy, ke “niteraka lelahy” iro. Kanefa Jehovah efa nivolan̈a taminy Hosea fa “hijangajanga” Gomera, avio ‘hahazo zanaka baka amy fijangajangan̈anany io.’ (Hosea 1:2, 3) Ke izikoa fa nandeha fotoan̈a, niteraka aroe mianadahy tamy lelahy hafa ankitin̈y Gomera. Fa Hosea tsy nisaraka taminany foeky, ndray Gomera mbala tsy voly nijangajanga. Gomera edy ny niala taminany tamy farany, avio nanjary andevo. Mbala nivangainy Hosea ndreky nampodiny ndraiky fo Gomera. (Hosea 3:1, 2) Tamy zen̈y Jehovah nampiasa Hosea, baka han̈aboahan̈a fa namela helokondro Israelita aby io fo izy, nata iro nanompo sampy, ke efa nira nandiadia izy in̈y. Fa ino raha ianarantsika baka amy zen̈y?
13 Izikoa misy Kristianin̈y araiky nalatsakany vadiny taminolo hafa, misy fanapahankevitry tsy maintsy raisiny araiky tsy diso io. Jesosy nivolan̈a fa manan̈a antony ahafahany misaraka amy vadiny izy, ke afaka manambady olo hafa. Fa kanefa, mety mifidy hamela heloko koa izy, fotony tsy diso izy koa man̈ano zen̈y. Karaha nataony Hosea in̈y, nan̈eky nifan̈ampody tamy Gomera fo izy. Fa Gomera tafaranizen̈y efa tsy nahazo nan̈ano firaisan̈a tamy lelahy hafa eky, avio Hosea koa efa tsy nan̈ano firaisan̈a taminany antsendriky. (Hosea 3:3) Fa tafaranizen̈y ndraiky, izy efa nan̈ano firaisan̈a taminany. Tsisy ny hafa amy zen̈y koa raha nataony Jehovah tamy vahoakanany. Jehovah von̈ono hamela helokondro ndreky von̈ono hifandray tamindro ndraiky koa. (Hosea 1:11; 3:3-5) Ino ma raha ianarantsika baka amy zen̈y? Mety misy Kristianin̈y araiky nanapakevitry tsy hisaraka, nata nandiadia izy vadiny. Fa izy koa fa man̈eky han̈anaovany vadiny firaisan̈a tafaranizin̈y, zen̈y mivolan̈a fa izy efa namela heloko vadiny io. (1 Kor. 7:3, 5) Izikoa zen̈y raha miboaka, tsy mitombin̈y antony arakany Soratra masin̈y, ahafahany misarabadian̈a. Fa tokony hifan̈ampy fo iro afaranizen̈y, baka han̈aja vadian̈a, karaha ataony Jehovah.
HAJÀ FO VADIAN̈A IO NATA MISY PROBLEMO
14. Izikoa 1 Korintianina 7:10, 11 zahan̈a, ino problemo mety hisy an̈atiny vadian̈a?
14 Tokony hifen̈y fo Kristianin̈y jiaby han̈aja vadian̈a, karaha ataony Jehovah ndreky Jesosy. Fa mety tsy hahavita zen̈y olombelon̈o, fotony mbala tsy lavorary. (Rom. 7:18-23) Ke tsy tokony ho lany fan̈ahy atsika, izikoa nanan̈a problemo karaha zen̈y iro Kristianin̈y tamy taonjato voanalohany. Apostoly Paoly nivolan̈a fa “man̈angy tsy tokony hiala vadiny”, fa kanefa mbala nisy sasany fo niala vadiny.—Vakia 1 Korintianina 7:10, 11.
Akory mety han̈avotan̈a tokantran̈o tsy milamin̈y? (Zahava fehintsoratra 15)
15, 16. a) Ndray misy problemo amy vadian̈a, ino tokony ho tanjon̈ondro, avio ino antony? b) Akory hampiharan̈a zen̈y izikoa olo araiky man̈ambady tsy pino?
15 Paoly tsy nivolan̈a antony nahavy olo sasany hiala na hisintaka amy vadiny. Fa izy ndraiky mazava fa tsy nohony fijangajangan̈a. Fotony baka izikoa fijangajangan̈a izio, izy afaka nisarabadian̈a, ke nanambady olo hafa. Paoly nivolan̈a fa izikoa nisy man̈angy araiky nisintaka, izy tsy tokony hanambady fa tokony “hody amy vadiny.” Amy Zan̈ahary baka iro roeny vadiny io mbala fivadiany. Ke tihivolan̈a Paoly fa na ino na ino raha miboaka an̈atiny tokantran̈o, tsy tokony hisaraka olo fivadiany fa handamin̈y problemondro fo. Fijangajangan̈a zaraiky fo antony mety hisarahan̈a. Fa iro mety mangataka fan̈ampian̈a aminy antipan̈ahy, izikoa misy problemo an̈atiny tokantran̈ondro. Iro antipan̈ahy aby io tsy hilan̈y aminy araiky amindro fivadiany misy problemo io fa man̈amia torohevitry iro baka amy Soratra Masin̈y fo.
16 Mety tsy ho mora koa raha misy, izikoa araiky amindro fivadiany fo manompo Jehovah ndreky mifen̈y man̈araka fitsipikinany. Vahaolan̈a edy ma fisintahan̈a zen̈y, koa fa misy problemo? Efa hitantsika tio fa mety misarabadian̈a izikoa nisy araiky taminolo fivadiany nijangajanga. Fa Baiboly ndraiky tsy mikoran̈a antony ahafahan̈a misintaka. Karaha ty raha nisoratiny Paoly: “Izikoa misy man̈angy manambady tsy pino, ke man̈eky hidoko aminany fo vadiny, izy tsy tokony hiala vadiny.” (1 Kor. 7:12, 13) Mbala zen̈y fo koa arehantsika amy zioty.
17, 18. Nan̈ino ma Kristianin̈y sasany nifidy tsy hisintaka, nata mare jaly mahazo izy amy tokantran̈onany?
17 Ndraikindraiky, karaha ty raha mety ho hisy. Lelahy io tsy pino, kanefa hita amy raha ataony fa izy karaha tsy ‘man̈eky hidoko amy vadiny.’ Mety kafiry mare izy, ke mety atahoran̈a handratra na hamono vadiny io foeky. Avio izy mety tsy nahefa hamelon̈o vadiny ndreky zanany, na koa misakan̈a vadiny io tsy hanompo Jehovah foeky. Ke misy Kristianin̈y sasany nanapakevitry hisintaka, fotony hita amy raha ataony lelahy io fa izy tsy ‘man̈eky hidoko amy vadiny’, nata izy man̈ano mivolan̈a fa tia vady. Fa misy koa Kristianin̈y mifidy hijanon̈o miaraka amy vadiny fo, nata karaha nikoran̈intsika tan̈abo tio in̈y raha mahazo izy. Nifidy hiaritry ndreky hankatsara fiarahan̈andro fivadiany fo izy. Fotony nan̈ino?
18 Amy raha momba fisintahan̈a tio in̈y, mbala fivadiany fo baka olo, ndray misy araiky amindro misintaka. Avio mbala mety hahita problemo fo koa iro, karaha efa nikoran̈intsika in̈y. Fa misy antony hafa koa mahatsara olo araiky izikoa izy manapakevitry tsy hisintaka. Karaha ty ho Paoly: “Lelahy tsy pino io hankamasin̈iny nohony amy vadiny, karaha zen̈y koa man̈angy tsy pino ankamasin̈iny nohony amy rahalahy pino. Fa izikoa tsy zen̈y, tsy madio edy zanakanaro, kanera iro izio masin̈y.” (1 Kor. 7:14) Maro Kristianin̈y nifidy ny tsy hisintaka, nata mare jaly mahazo izy amy tokantran̈onany ao. Fa iro tsy nanen̈iny, fotony nanjary panompony Jehovah fo vadindro, izikoa fa nandeha fotoan̈a.—Vakia 1 Korintianina 7:16; 1 Pet. 3:1, 2.
19. Nan̈ino ma maro olo fivadiany manan̈a tokantran̈o sambatra, amy fandaminan̈any Jehovah ao?
19 Apostoly Paoly nan̈amia torohevitry momba fisintahan̈a, fa Jesosy nikoran̈a momba fisarahan̈a. Fa na Paoly na Jesosy, samby nandrisiky panompony Jehovah han̈aja vadian̈a. Karaha ataony amy fiangonan̈any Vavolombelon̈o Jehovah erantany, maro olo fivadiany manan̈a tokantran̈o sambatra. Mety karaha zen̈y koa iro Vavolombelon̈o Jehovah amy tany misy anao an̈y. Ao ahitanao lelahy ten̈a tia vady ndreky man̈angy ten̈a tia ndreky man̈aja vady. Dikanizen̈y, raha azo atao tsara man̈aja vadian̈a io. Ke ravoravo atsika, fotony olo fivadiany mandeha antapitrisany man̈aboaka fa afaka arehan̈a tsara volan̈a Zan̈ahary ty: “Zen̈y mahavy lelahy hiala babany ndreky reniny, baka io hitambatra amy vadiny, ke iroroe hanjary nofotro araiky fo.”—Efes. 5:31.