Mety Aminaka ma Mampiasa Raha Baka amy Taharo Fôtotron’ny Lio Ndreky Man̈ano Fitahan̈a Ampiasan̈a Lionaka? — FIKAJIAN̈A BOKIN'NY Vavolombelon̈on'i Jehovah

Ajarisa

Mety Aminaka ma Mampiasa Raha Baka amy Taharo Fôtotron’ny Lio Ndreky Man̈ano Fitahan̈a Ampiasan̈a Lionaka?

Baiboly mandidy Kristianin̈y ‘hifady lio.’ (Asa. 15:20) Zen̈y mahavy Vavolombelon̈on’i Jehovah tsy man̈eky ampidiran̈a lio na araiky amindrô raha efatra mahafôron̈o lio, tsy ino zen̈y fa liomena, liofotsy, plakety aviô plasma. Tsy man̈amia lio koa irô salakady tsy man̈ajary liondrô tômpiny baka ampidirin̈y amindrô ndraiky.—Lev. 17:13, 14; Asa. 15:28, 29.

Nan̈ino anjaran’ny Kristianin̈y tsiaraikiaraiky manapa-kevitry han̈eky ampiasa na tsy ampiasa raha baka amy taharo fôtotron’ny lio?

Taharo fôtotron’ny lio tsiaraikiaraiky mety rasarasain̈y baka azahoan̈a raha ampiasain̈y amy fitahan̈a. Ohatra, plasma iziô araiky amindrô raha efatra mahafôron̈o lio. Ty aby raha an̈atin’ny plasma: Rano (kadiriny 91 isan-jato), prôteiny karaha ataon’ny albiminy, globuline, fibrinogène (kadiriny 7 isan-jato), aviô ranon-draha hafa (kadiriny 1,5 isan-jato) karaha ataon’ny raha mahavelon̈o, hormony, gazy, vitaminy, loto, aviô raha simiky.

Irô raha azo baka amy taharo fôtotron’ny lio aby io ma mba tôkony hifadianan̈a karaha ataon’ny lio fo? Tsy afaka man̈amia valiny mazava amin’izen̈y zahay. Fôtony Baiboly tsy man̈amia toromariky voafaritry tsarabe momba irô raha azo baka amy taharo fôtotron’ny lio.a Maro aody na fitahan̈a ampiasan̈a irô raha azo baka amy taharo fôtotron’ny lio aby io. Kristianin̈y tsiaraikaraiky manapa-kevitry, arakaraka feon’ny fieritriretan̈anany, na izy han̈eky na tsy han̈eky hampiasa raha azo baka amy taharo fôtotron’ny lio amy fitahan̈a izy.

Ke alohany anao hanapa-kevitry, diniha antsendriky ty: Izikoa anao tsy man̈eky raha jiaby azo baka amy taharo fôtotron’ny lio, dikan’izen̈y anao tsy man̈eky aody sasany hiadivan̈a amin’ny aretin̈y mahafaty na aody mampandry lio. Izikoa ndraiky anao man̈eky raha araiky na maromaro baka amy taharo fôtotron’ny lio, mila hainao man̈azava zen̈y amy dokoteranao.

Fa man̈ino kila olo tôkony hanapa-kevitry amy raha sasany ampiasan̈a lionany?

Mazava fa Kristianin̈y tsy man̈amia na mikajy lio baka izio ampidirin̈y aminany ndraiky. Fa ndray zen̈y, misy raha sasany ambaka ataon’ ny fitahan̈a ndreky analizy atao amy lio, tsy volan̈iny Baiboly mivantan̈a. Ke kila olo manapa-kevitry mifan̈aran̈a amin’ny eritreritrinany, han̈eky na tsy han̈eky fitahan̈a na raha hafa ampiasan̈a lionany.

Anao koa fa hanapa-kevitry, aleva onon̈o ty: “Izikoa lionaka avily hiala amy vatan̈anaka ke mety hijanon̈o hely fandihanany, asa ikeny eritreritrinaka fa mbala ain̈inaka fo izio, ke tsy voatery ‘haidin̈y amy tany’? (Deot. 12:23, 24) Izikoa lionaka avily lalan̈a aviô idin̈ana aody baka iô ampody amy vatan̈aka ndraiky, asa man̈eky zen̈y eritreritrinaka efa nampiofan̈iny han̈araka toro lalan̈an’ny Baiboly? Mazava aminaka tsara ma fa izikoa tsy ikeko fitahan̈a jiaby ampiasan̈a lionaka, dikan’izen̈y tsy mety aminaka koa fitahan̈a sasany karaha ataon’ny dializy ndreky fampiasan̈a fitaovan̈a solon’ny fô na havokavoko (poumons)? Zaho ma efa nivavaka tsarabe tamy Jehovah momba raha zen̈y?b

Ino fanapahan-kevitry hataoko?

Zahava irô tablô aroe amy pazy man̈araka. Tablô 1 ahitan̈a raha sasany baka amy taharo fôtotron’ny lio, ndreky fomba matetiky ampiasan̈a irô io. Anao afaka mifidy lay ikenao ndraiky tsy ikenao amy raha aby ao. Tablô 2 ndraiky misy listiny fitahan̈a sasany ampiasan̈a lionao. Anao afaka mifidy lay ikenao ndraiky tsy ikenao amy raha aby ao. Taratasy misy tablô aby io tsy taratasy ara-panjakan̈a, fa zisty natao han̈ampian̈a anao lera anao mameno karty FMF (Fanomezan-dalana Momba ny Fitsaboana) fo.

Anjaranao zaraiky fo manapa-kevitry, tsisy olo tôkony hanapa-kevitry amy pilasinao. Aviô atsika tsy tôkony hikiritìky fanapahan-kevitrin’ny mpiaramanompo hafa, fôtony “samy hitondra entan̈anany aby olo tsiaraikiaraiky.”—Gal. 6:4, 5.

[Lamariky amy pazy ambany]

a Misy fan̈azavan̈a afaka man̈ampy anao momba zen̈y amy Tilikambo Fiambenana 15 Ziain 2004.

b Misy fan̈azavan̈a afaka man̈ampy anao momba zen̈y amy Tilikambo Fiambenana 15 Oktobra 2000, ndreky amy DVD Solon’ny Fampidiran-dra: Fanadihadiana Samihafa.

TABLÔ 1

TSY METY AMY KRISTIANIN̈Y

FANAPAHAN-KEVITRINAO MANAOKAN̈A

LIO

RAHA BAKA AMY TAHARO FÔTOTRO

Safidy Tsy Maintsy Ataonao

PLASMA

ALBIMINY: MANDILATRAN’NY 4 ISAN-JATON’NY PLASMA

Prôteiny baka amy plasma. Misy karazan̈a albiminy koa amy raha maniry, amin’ny hanin̈y karaha ataony ronono, antody aviô nonon-dreny. Albiminy baka amy lio iziô an̈amboaran̈a aody mampitombo lio ndreky aody hitahan̈a olo may. Aody karaha zen̈y iziô mety misy albiminy mandilatran’ny 25 isan-jato. Misy albiminy hely koa amin’ny aody maro hafa, an̈isan’izen̈y érythropoïétine sasantsasany (EPO).

____ Ikeko albiminy

____ Tsy ikeko albiminy

IMMUNOGLOBULINE: MANDILATRAN’NY 3 ISAN-JATON’NY PLASMA

Prôteiny baka amy plasma io mety ampiasain̈y amin’ny aody sasany natao hiadivan̈a amy virisy ndreky aretin̈y karaha ataon’ny diphtérie, tetanôsy, hépatite baka amy virisy, aviô haromaotan̈a. Ampiasain̈y koa izio amin’ny aody natao hiadivan̈a amin’ny aretin̈y sasany avozoan̈a hahafaty tsaiky mbala an̈atin’ny kibo, na hitahan̈a olo voakekitrin’ny bibilava na hala.

____ Ikeko immunoglobuline

____ Tsy ikeko immunoglobuline

PRÔTEINY MAMPANDRY LIO: IZIO TSY AMPY 1 ISAN-JATON’NY PLASMA

Maro karazan̈a prôteiny mampandry lio, ke mampihen̈y lio very. Sasany amindrô io ampiasain̈y itahan̈a olo mora mandeha lio. Misy koa ampiasain̈y amodian̈a bay ndreky mampijanon̈o lio very afaran’ny fandidian̈a. An̈isan’izen̈y aody araiky kahian̈a cryoprécipité. Fan̈amarihan̈a: Zioty efa misy aody mampandry lio tsy namboarin̈y baka tamy lio.

____ Ikeko prôteiny mampandry lio nalain̈y baka tamy lio

____ Tsy ikeko prôteiny mampandry lio nalain̈y baka tamy lio

LIOMENA

HEMOGLOBINY: 33 ISAN-JATON’NY LIOMENA

Prôteiny mitondra oksizeny amin’ny ain̈y jiaby sady mitondra gazy karboniky mandeha amin’ny havokavoko. Misy aody vita amin’ny hemoglobiny nalain̈y tamin’olo na tamy biby, natao hitahan̈a olo tsy ampy lio mare na very lio be.

____ Ikeko hemoglobiny

____ Tsy ikeko hemoglobiny

HÉMINE: TSY AMPY 2 ISAN-JATON’NY LIOMENA

Raha baka amin’ny hemoglobiny ampiasain̈y itahan̈a aretin̈in’ny lio kahian̈a porphyrie. Izio aretin̈y manaranaka sady mandrobaka raha jiaby miaraka miasa mandevon̈o hanin̈y, système nerveux, fô, aviô lalan-dio. Vitsy fo olo avoaniny aretin̈y io.

____ Ikeko hémine

____ Tsy ikeko hémine

LIOFOTSY

INTERFÉRONS: HELY FO IZIO AN̈ATINY LIOFOTSY

Prôteiny miady amy kansera sasany ndreky aretin̈y sasany baka amy virisy. Tsy baka amy lio ankamarozany interferons. Fa sasany amin’izio ndraiky nalain̈a baka tamy liofotsin’olombelon̈o.

____ Ikeko interferons nalain̈a baka tamy lio

____ Tsy ikeko interferons nalain̈a baka tamy lio

PLAKETY

Firaka izioty, mbala tsiary nisy aody namboarin̈y baka tamy plakety.

TABLÔ 2

FANAPAHAN-KEVITRINAO MANAOKAN̈A
FITAHAN̈A AMPIASAN̈A LIONAO TÔMPINY
AN̈ARAN̈AN’NY FITAHAN̈A	INO ASAN’IZIO?	Safidy tsy maintsy ataonao (Tsara anao mikoran̈a amy dokoteranao antsendriky alohany anao han̈eky na tsy han̈eky fomba fitahan̈a aby io.)
RÉCUPÉRATION DU SANG ÉPANCHÉ (CELL-SAVER)	Mampihen̈y lio very. Tantesin̈y lan̈iany lio very amy bay na lera mandidy. Izin̈y baka iô diovin̈y na tavanin̈y, aviô iô ny iô fo, na afarahelin’ny fandidian̈a, ampody amin’olo marary io lionany.	____ Ikeko ____ Mbala hidinihikoc ____ Tsy ikeko
*HÉMODILUTION*	Mampihen̈y lio very. An̈atiny mandidy in̈y, avily an̈atin’ny raha araiky lion’olo marary io. Olo io baka iô ampidiran̈a aody mampitombo lio, tsy namboarin̈y tamy lio. Lôso matsatso lion’olo io fôtony vitsy hely liomena amy lionany. Mbala an̈atiny mandidy fo na afara helin’ ny fandidian̈a, ampody aminany ndraiky lionany navily lalan̈a in̈y.	____ Ikeko ____ Mbala hidinihikod ____ Tsy ikeko
CEC: CIRCULATION EXTRA-CORPORELLE	Mampitohy fandihanan’ny lio amy lalan-dio. Avily an̈atiny masìny araiky lion’olo marary io baka hasian̈a oksizainy, aviô direkty ampody amin’olo io ndraiky.	____ Ikeko ____ Mbala hidinihikoe ____ Tsy ikeko
DIALIZY	*Man̈ano asan’ny rein.* Lion’olo marary io ampandalôvin̈y an̈atin’ny masiny manokan̈a. Ao izy tavanin̈y ndreky diovin̈y, aviô direkty ampody amin’olo io.	____ Ikeko ____ Mbala hidinihikof ____ Tsy ikeko
**BLOOD PATCH (PANSEMENT SANGUIN) PÉRIDURAL**	Mampijanon̈o ranon-draha mitete baka amy taolan-tahezan̈a. Ampidiran̈a lio hely amin’ny hoditry matify mifon̈o tsokany taolan-tahezan̈a, ke lionany tômpiny fo ampiasain̈y. Izio natao anampenan̈a loaka hely amy taolan-tahezan̈a man̈ary ranon-draha.	____ Ikeko ____ Mbala hidinihikog ____ Tsy ikeko
*PLASMAPHÉRÈSE*	Natao itahan̈a. Alain̈a lion’olo marary tavanin̈y baka han̈adosoan̈a plasma amy lio io, baka iô lio io asian̈a aody mahasolo plasma aviô ampody amy marary io ndraiky. Fa ndraikindraiky, tsy aody mahasolo plasma ampiasain’ny dokotera fa plasma baka aminolo hafa. Araiky zen̈y ndraiky tsy mety amy Kristianin̈y.	____ Ikeko ____ Mbala hidinihikoh ____ Tsy ikeko
**MIXAGE NA MARQUAGE**	Natao hizahavan̈a aretin̈y na koa itahan̈a. Angalan̈a hely lion’olo marary io baka iô asian̈a aody, aviô lio io ampody aminany ndraiky. Mety tsy hitovy halavasan̈any fotoan̈a hijanonany lio nalain̈a io ambelan̈a vatan̈a.	____ Ikeko ____ Mbala hidinihikoi ____ Tsy ikeko
GEL DE PLAQUETTE (AMBOARIN̈Y BAKA AMY LIONAO TÔMPINY)	Natao hampifody bay ndreky mampihen̈y lio very. An̈adosoan̈a hely lion’olo marary io aviô asian̈a aody be plakety ndreky liofotsy. Izin̈y amizay isôrin̈y amy tany nididian̈a na amy bainany. Fan̈amarihan̈a: Prôteiny mampandry lio baka amy lion’aomby ataondro amin’izio ndraikindraiky.	____ Ikeko ____ Mbala hidinihikoj ____ Tsy ikeko

c d e f g h i j Fan̈amarihan̈a: Samby hafa fomba an̈anaovan’ny dokotera fitahan̈a aby io. Ke an̈ontania dokoteranao tsipiriany jiaby momba fitahan̈a asainy ataonao io baka ho azonao antoko tsarabe fa mifan̈araka amy toro lalan̈an’ny Baiboly ndreky ikeny eritrertrinao fitahan̈a hatao aminao.