FOMBA FIAIN̈ANA KRISTIANIN̈Y
Akory Hahavy Anao Hazoto Hianatra Soratra Masin̈y?
Tianao ma tsy hivadiky mira Daniela izikoa fa tojy fitsapan̈a? Izy farandraha nazoto nianatra Volan̈a Zan̈ahary, an̈isanizen̈y faminanian̈a lalin̈y. (Da 9:2) Hahavita tsy hivadiky koa anao, izikoa mazoto mianatra Baiboly. Nan̈ino? Fotony zen̈y han̈ampy anao hino tsarabe fa hitantirahiny Jehovah raha nampan̈antinainy. (Js 23:14) Hahay hitombo koa fitiavanao Jehovah, ke zen̈y handrisiky anao han̈ano ny tsara. (Sl 97:10) Ke akory hatao? Diniha sosokevitry aby ty:
Raha mety hianaran̈a: Zatra mianatra olo araiky izikoa izy zatra man̈oman̈a fivorian̈a. Maro hatsaran̈a ho azonao amy vaky Baiboly isankerin̈iandra, izikoa anao mikaroko hevitry andininy tsy azonao. Misy koa mifidy hianatra tsarabe raha momba faminanian̈a aby amy Baiboly ao, iro vokatrany fan̈ahiny Zan̈ahary, dia misonera nataony apostoly Paoly, na raha niforon̈iny Jehovah. Izikoa fa misy fan̈ontanian̈a mikasiky Baiboly tafandalo aminy eritreritrinao, sorata raha zen̈y. Anao mety mikaroko valinizio lera anao mianatra amy man̈araka.
Tany ahitan̈a fan̈azavan̈a: Zahava video Fitaovan̈a Fikarohan̈a Harian̈a Arapan̈ahy. Hahita sosokevitry vitsivitsy anao ao. Baka ahitanao karakory fahaizanao mampiasa fitaovan̈a io, anao mety mikaroko azovy aby firenena matanjaka mifan̈itsy amy bibidỳ koran̈iny Daniela toko faha-7.
Fotoan̈a atokana hianaran̈a: Ten̈a ilain̈y mianatra tsy tapaka izikoa tian̈a hanan̈a finoan̈a matanjaka. Mety atao fohifohiky antsendriky fianaran̈a amy voanalohany, izikoa ilain̈y, avio ampitombosa tsihelihely. Karaha mangady harian̈a an̈aty fotaka mianatra Baiboly. Anao mahay tihangady fo, arakaraka hahitanao raha misy valera. (Oh 2:3-6) Hitombo fan̈irian̈anao hianatra Volan̈a Zan̈ahary, baka io ho zatra mianatra Baiboly koa anao.—1Pe 2:2.
MIFAN̈ITSY AMINJOVY BIBIDỲ ABY KORAN̈INY DANIELA TOKO 7?
Da 7:4
Da 7:5
Da 7:6
Da 7:7
SOSOKO FAN̈ONTANIAN̈A:
Karakory nahatanteraka Daniela 7:8, 24?
HIANARAKO AMY MAN̈ARAKA:
Mifan̈itsy aminjovy bibidỳ aby koran̈iny Apokalypsy toko 13?