FOMBA FIAIN̈ANA KRISTIANIN̈Y
Fitorian̈a amy Faritany Misy Olo Samby Isany Fivolan̈ana
Mahaivon̈ono hitandren̈y hafatra momba Fanjakan̈a io fo olo araiky, izikoa amy fivolan̈ananany hikoran̈ana izio aminany. Ke tamy pantekoty taon̈o 33, nataony Jehovah raha hahavy iro ‘Jiosy tsy nivadiky baka tamy firenena jiaby tambaniny lan̈itry’ haharen̈y vaovao tsara io tamy ‘volan̈a nahatombo iro’, kanefa tamy zen̈y volan̈a hebreo ndreky griky fo fampiasaindro koa fa nikoran̈a andavanandra. (As 2:5, 8) Amy zioty koa, misy olo samby isany tany favian̈a mipetraka amy faritany araiky, ke fiangonan̈a maromaro mampiasa volan̈a isakarazany miasa amy faritany io. Karakory ataondro miaraka miasa baka iro tsy lany angovo boriny na han̈ano raha hampaempaka olo itorian̈a?
Mifampikoran̈a (Oh 15:22): Piandraikitry fanompoan̈a amy fiangonan̈a aby io mila mifampikoran̈a tsara, mandamin̈y fomba hitorian̈a amy faritany io. Mety ho tiandro amy fiangonan̈a mampiasa teny vahiny izikoa dikaviny pitory amy fiangonan̈anaro zay tran̈o misy olo mampiasa volan̈a io. Fa izikoa tsy arakandro miasa amy faritany io fotony lavitry be, iro mety hangataka fan̈ampian̈a. Mety hiasa amy faritany io fo anaro fa izikoa misy olo mampiasa teny vahiny man̈eky tsidihin̈y, koran̈iny amindro. (od 93 § 37) Na koa mety hirahindro hitady olo mampiasa teny vahiny amy faritaninaro fiangonan̈anaro, ke alain̈a adiresy jiaby, baka io alefa amindro an̈y. (km 7/12 5, efajoro) Aleva onon̈o fa, ndray olo tran̈o araiky mety samy amy volan̈a fampiasainy. Hajà tsarabe fo lalàn̈a momba fampiasan̈a fan̈azavan̈a momba olo koa fa miasa amy faritany io, fotony fanjakan̈a mitaky zen̈y.
Miaraka miasa (Ef 4:16): Areha tsarabe toromariky jiaby amiany piandraikitry fanompoan̈a. Anao ma misy pianatra Baiboly mampiasa volan̈a tsy ampiasainy fiangonan̈anaro? Mety handroso malaky pianatra io izikoa hafindranao amy fiangonan̈a na antokopitory mampiasa volan̈a io.
Man̈oman̈a (Oh 15:28; 16:1): Izikoa lera anao mitory fanojy olo mampiasa teny vahiny, ataova zay raha vitanao hitorian̈a aminany vaovao tsara io. Iritrireta tsialohaloha ino aby volan̈a fampiasainolo amy faritaninaro, ke sakavy ampidira an̈aty telefoninao na tabletinao ao Baiboly ndreky video mety ilainao. Mety mampiasa JW Language koa anao hianaran̈a fomba fan̈anaovan̈a mbalatsara amy volan̈a aby io.