Panjaka Aroe Mifan̈oesa An̈atiny Vanimpotoan̈any Farany
Faminanian̈a sasany amy tablô io miaraka tanteraka an̈atiny fotoan̈a araiky. Iro jiaby io samby mankamarin̈y tsarabe fa atsika iziô efa miain̈y amy “vanimpotoan̈any farany.”—Dan. 12:4.
Andininteny: Apok. 11:7; 12:13, 17; 13:1-8, 12
Faminanian̈a: “Biby dy” io hanjaka an̈atiny andrivony taon̈o maro. Amy vanimpotoan̈any farany, hisy fotoan̈a haratra mare loha fahafitony biby io fa izio baka io hahivan̈a ke ‘olo jiaby’ han̈araka izy. Biby io hampiasainy Satana ‘hiady amy lambiny taranakany man̈angy in̈y.’
Fomba nampatanteraka izy: Tafarany Safodrano, fanjakan̈anolombelon̈o nanohitry Jehovah. Taonjato maro tafara tatỳ, niboaka fanjakan̈any Grande-Bretagne. Nahery be izio, kanefa nihen̈y mare angovonany taminy Ady Lehibe I. Nanjary natanjaka ndraiky izy koa fa niaraka taminy Etazonỳ. Izioty, Satana mifen̈y mare mampiasa fanjakan̈a jiaby amy donia ty han̈enjiky ndreky hampijaly vahoakany Jehovah.
Andininteny: Dan. 11:25-45
Faminanian̈a: Amy vanimpotoan̈any farany, hifan̈oesa mare panjakany avaratra ndreky panjakany atsimo.
Fomba nampatanteraka izy: Allemagne niady tamy Grande-Bretagne ndreky Etazonỳ. Taminy 1945, Firaisan̈a Sovietiky ndreky iro firenena panohan̈a izy nanjary panjakany avaratra. Ravan̈a tampoko Firaisan̈a Sovietiky io taminy 1991. Koa fa nandeha fotoan̈a, nanjary Russie ndreky panohan̈a izy panjakany avaratra.
Andininteny: Isaia 61:1; Mal. 3:1; Lioka 4:18
Faminanian̈a: Jehovah handefa “iraka hikarakara lalan̈a”, alohany Fanjakan̈any Mesia io miorin̈y. Iro iraka aby io hanomboko “han̈ambara vaovao tsara aminolo pandefitry.”
Fomba nampatanteraka izy: Komansy taminy 1870 tio, nifen̈y Russell ndreky fanamany aby io nan̈azava ino marin̈y raha ten̈a ampianariny Baiboly. Kadiriny taminy 1881, namafisindro fa olo manompo Zan̈ahary zen̈y tsy maintsy mitory. Nan̈aboaka lahatsoratra momba zen̈y iro, ohatra, “Mitady Pitory 1 000” ndreky “Voahosotro Hitory.”
Andininteny: Mat. 13:24-30, 36-43
Faminanian̈a: Nisy lelahy araiky namafy vary tamy tanimbary, fa nisy fahavalo ndraiky namafy tsiparifary. Vary ndreky tsiparifary io nambela niaraka naniry. Lera fijinjan̈a, nisarahin̈y vary ndreky tsiparifary.
Fomba nampatanteraka izy: Nanomboko taminy 1870, nanjary niavaka azovy ten̈a Kristianiny avio azovy Kristianin̈y sandoko. Amy vanimpotoan̈any farany, iro Kristianin̈y sandoko aby io avory baka io sarahin̈y aminolo ten̈a Kristianin̈y.
Andininteny: Dan. 2:31-33, 41-43
Faminanian̈a: Vity vy miaro tanimanga amy sarivongana namboarin̈y tamy metaly isankarazany.
Fomba nampatanteraka izy: Tanimanga io manondro vahoaka fiheziny fanjakan̈a Angiley-Amerikain, kanefa iro baka io manohitry fitondrasan̈a. Fanjakan̈a Angiley-Amerikain io tsy fatatra ambaka vy, fotony vahoakanany mierin̈y fahifan̈anany.
Andininteny: Mat. 13:30; 24:14, 45; 28:19, 20
Faminanian̈a: “Vary” koa fa matoe havory an̈aty “riha”, ke “panompo atokisan̈a ndreky mahadiniky raha” navoatendry hikarakara “piasa antran̈o.” Komansy nitorian̈a erantany misy olo “vaovao tsara momba Fanjakan̈a io.”
Fomba nampatanteraka izy: Taminy 1919, panompo atokisan̈a navoatendry hikarakara vahoakany Zan̈ahary. Komansy tamy zen̈y, nahainifen̈y fo iro Pianatra Baiboly aby io nitory vaovao tsara. Amy zioty, Vavolombelon̈o Jehovah mitory amy tany mandilatra 200, avio man̈aboaka boky ndreky gazety amy volan̈a mandilatra 1 000.
Andininteny: Dan. 12:11; Apok. 13:11, 14, 15
Faminanian̈a: Misy biby dy manan̈a tandroko aroe man̈iraka olo han̈ano “sariny biby dy.” Sary io baka io amiany biby dy io “fahin̈ana.”
Fomba nampatanteraka izy: Angiley-Amerikain nitaon̈o firenena maro namoron̈o Fikambanampirenena. Niditry an̈isany Fikambanan̈a io koa panjakany avaratra, tan̈elan̈elan̈any taon̈o 1926 firaka taminy 1933. Maro olo nan̈anten̈a fa hahavita hampisy filaminan̈a erantany Fikambanan̈a io, kanefa Fanjakan̈any Zan̈ahary zaraiky fo mahavita zen̈y. Matoky mare koa olo avahizo fa hahavita zen̈y Firenena Mikamban̈a (ONU).
Andininteny: Dan. 8:23, 24
Faminanian̈a: Hisy panjaka araiky masiaka saora ‘handravan̈a raha jiaby.’
Fomba nampatanteraka izy: Namono olo maro sady nandravan̈a raha marobe Angiley-Amerikain io. Ohatra iziô taminy Ady Lehibe II, Etazonỳ nandatsaka bomby atomìky aroe aby tamy firenena araiky an̈isany fahavalondro roeny Grande-Bretagne tamy zen̈y. Bomby aroe io bomby ten̈a nahafaty olo maro letrizay.
Andininteny: Dan. 11:31; Apok. 17:3, 7-11
Faminanian̈a: Hiboaka baka amy lavaka tsy hita farany biby dy “mena dà” misy tandroko folo ndreky panjakanany faha-8. Panjaka io ampiran̈iny bokiny Daniela amy raha “mampangaroharo haviany fandripahan̈a.”
Fomba nampatanteraka izy: Tsy niasa foeky Fikambanampirenena io taminy Ady Lehibe II. Koa fa vita lagera io, “natsangana” ONU na Firenena Mikamban̈a. Karaha tamy Fikambanampirenena in̈y, nanjary ONU ndraiky ny ten̈a namianolo hasin̈y fa tsy Fanjakan̈any Zan̈ahary. ONU io hanafiky fivavahan̈a.
Andininteny: 1 Tes. 5:3; Apok. 17:16
Faminanian̈a: Iro firenena aby io hivolan̈a fa nahavita nampisy “fandriampahaleman̈a ndreky filaminan̈a.” Ke “tandroko folo” ndreky “biby dy” in̈y hanafiky “makorely” in̈y ndreky handripaka izy. Afaranizen̈y, ho ravan̈a aby firenena jiaby.
Fomba hampatanteraka izy: Iro firenena aby io hiaboko ho nahavita nampisy fandriampahaleman̈a ndreky filaminan̈a amy tany jiaby. Hiravan̈iny firenena an̈isany ONU koa karazan̈a fivavahan̈a diso jiaby erantany, ke komansy fahorian̈a be. Hifaran̈a fahorian̈a be io lera Jesosy handravan̈a lambiny tavela amy donia ratsiny Satana ty, aminy Aramagedona.
Andininteny: Ezek. 38:11, 14-17; Mat. 24:31
Faminanian̈a: Goga hanafiky tany misy vahoakany Zan̈ahary. Iro anjely aby io ndraiky hamory lan̈iany ‘olo navoafidy.’
Fomba hampatanteraka izy: Panjakany avaratra ndreky fitondrasan̈a jiaby amy donia ty hanafiky vahoakany Zan̈ahary. Tsy ela afaraniro hanafiky io, havory handeha andan̈itry an̈y lambiny voahosotro mbala ambony tany eto.
Andininteny: Ezek. 38:18-23; Dan. 2:34, 35, 44, 45; Apok. 6:2; 16:14, 16; 17:14; 19:20
Faminanian̈a: Hiravan̈iny “araiky mipetraka” an̈abony “sevaly fotsy” in̈y Goga ndreky tafikinany jiaby. “Biby dy” in̈y ‘hatsipy an̈aty matsabory motro’, baka io sarivongana maventy be in̈y hitorotoroen̈a.
Fomba hampatanteraka izy: Jesosy, Panjakany Fanjakan̈any Zan̈ahary, ho avy han̈avotro vahoakany Zan̈ahary. Ke izy ndreky iro 144 000 miaraka manjaka aminany aby io ndreky iro anjely marobe an̈isany tafikinany, handravan̈a firenena jiaby ambony tany. Ho ravan̈a tsy ho hisy tavela doniany Satana.