Tsao Anao mba Afaka Man̈ampy Olo Hanjary Pianatrany Kristy?

1. Ino raha nataony Jehovah taminao?

KARAKORY nahavy anao nanjary Vavolombelon̈o Jehovah? Voanalohany, tsy maintsy nisy olo fo nan̈ambara “vaovao tsara” taminao. Mety ho olobenao izio, na olo fiasan̈a araiky taminao, na olo lekoly araiky taminao, na olo nitory isaka tran̈o. (Mar. 13:10) Faharoe, be fotoan̈a ndreky angovo laninolo nampianaran̈a anao Baiboly. Anao koa fa nianatra Baiboly, hainao fa Jehovah ten̈a tia anao, ke nanjary tia izy anao. Jehovah nitaon̈o anao han̈araka fahamarin̈ana. Iziô anao man̈anten̈a hiain̈y mandrakizay, fotony anao man̈aradia Jesosy Kristy. (Jaona 6:44) Hay be fa mankasitraka Jehovah anao, fotony izy nampiasa olo nampianatra anao ny marin̈y, avio anao nikeny hanjary panomponany.

2. Ino raha hidinihintsika ato?

² Anao iziô efa mahay ny marin̈y, ke anao manan̈a tombontsoa han̈ampy olo handeha amy lalan̈a mengo amy fiain̈ana, miaraka amintsika. Mety tsy sarotro aminao donko mitory aminolo. Kanefa mety tsy ho mora aminao ndraiky hitaon̈o olo hianatra Baiboly, na hitariky fampianaran̈a Baiboly. Izikoa zen̈y, mety han̈ampy anao sosokevitry vitsivitsy amy lahatsoratra ty ato. Ho hitantsika ato akory hahavy atsika han̈iry hampianatra olo. Hidinihintsika ato koa ino raha han̈ampy atsika tsy hisalasala hitariky fampianaran̈a Baiboly. Fa alô antsendriky hizahavantsika antony mahavy atsika mivolan̈a fa atsika tsy raha pitory vaovao tsara fo fa papianatra koa.

JESOSY NAN̈IRAKA ATSIKA HITORY NDREKY HAMPIANATRA

3. Nan̈ino atsika mitory?

³ Tamy Jesosy tambony tany teto, misy asa karazany aroe nan̈irahany pianatranany. Voanalohany, nirahiny hitory vaovao tsara momba Fanjakan̈any Zan̈ahary iro, baka io naboakany iro fomba han̈anaovan̈a zen̈y. (Mat. 10:7; Lioka 8:1) Ohatra iziô, nampianariny Jesosy iro raha tokony hatao, lera olo itoriandro mandray na tsy mandray hafatra toriandro. (Lioka 9:2-5) Jesosy koa efa nivolan̈a fa handroso mare asa fitorian̈a io, ke hitory amy “firenena jiaby” pianatranany. (Mat. 24:14; Asa. 1:8) Ke na mandray olo na tsy mandray, pan̈aradia Jesosy tokony hitory momba Fanjakan̈any Zan̈ahary ndreky raha handeha hataonizio fo.

4. Eraka raha koran̈iny Matio 28:18-20, ino koa raha mila ataontsika ankoatrany mitory?

⁴ Faharoe, Jesosy nan̈iraka pianatranany hampianatra olo hitandrin̈y raha jiaby nan̈irahany iro. Tsy iro tamy taonjato voanalohany tan̈y fo nirahiny Jesosy hitory ndreky hampianatra, fa atsika izioty koa. Nataony Jesosy mazava tsarabe fa asa matomboko io tsy maintsy ankifain̈a “firaka amy farany donia ty.” (Vakia Matio 28:18-20.) Mety tamy Jesosy niboaka tamy pianatranany mandilatra 500 in̈y donko izy nan̈amia beko io. (1 Kor. 15:6) Sady izikoa dinihin̈y fahitan̈a hitany apostoly Jaona, hita tsarabe fa tiany Jesosy han̈ampy olo hianatra raha momba Jehovah aby pan̈aradia izy jiaby.​—Apok. 22:17.

5. Koa zahan̈a 1 Korintianina 3:6-9, akory nan̈aboahany apostoly Paoly fa misy ifandraisany asa fitorian̈a ndreky fampianaran̈a io?

⁵ Nampifandraisiny apostoly Paoly taminy asa fambolian̈a asa fampianaran̈a ataontsika io. Tsy mamafy voandraha fo raha atao koa fa mambôly, fa misy asa fan̈ampiny koa. Zen̈y nahavy izy nampatsiaro iro Kristianin̈y ta Korinto karaha ty: ‘Zaho nambôly, Apolosy nandrôzy, ... anaro vilony Zan̈ahary.’ (Vakia 1 Korintianina 3:6-9.) Atsika pambôly amy ‘vilony Zan̈ahary.’ Mambôly atsika lera mitory, fa mandrôzy ndraiky atsika lera mampianatra. (Jaona 4:35) Ndray izy man̈ano zen̈y, Zan̈ahary fo mampitombo raha natsabo io, fotony izy mitaon̈o olo han̈aton̈o izy.

6. Mila ampiantsika han̈ino ma olo ampianarintsika?

⁶ Atsika mitsakaraka olo ‘manan̈a toetsain̈y tsara, hazahoan̈a fiain̈ana mandrakizay.’ (Asa. 13:48) Akory han̈ampiantsika olo karaha zen̈y hanjary pan̈aradia Kristy? Mila ampiantsika izy 1) baka hazava aminany tsarabe raha ianarany amy Baiboly, 2) baka izy han̈eky izio, avio 3) hampihatra izio. (Jaona 17:3; Kol. 2:6, 7; 1 Tes. 2:13) Afaka man̈ampy pianatra io hanjary pan̈aradia Jesosy aby olo jiaby an̈ivony fiangonan̈a, izikoa samby miezaka man̈aboaka fitiavan̈a, ndreky mandray tsara iro vaovao aby io, lera iro avy mivory. (Jaona 13:35) Papianatra Baiboly io koa mila man̈ampy olo ampianariny hiala amy raha inoany tsy mifan̈araka amy Baiboly, ndreky hiala amy raha ratsy efa nahazatra izy rango ela. Mitaky fotoan̈a be ndreky angovo raha zen̈y. (2 Kor. 10:4, 5) Mety ho afaka fanjava maromaro pianatra araiky vo hahavita hiova ke hahafeno fepetra hatao batisa. Fa ezaka jiaby ataontsika zen̈y tsy ho very bôriny.

FITIAVAN̈A MANDRISIKY ATSIKA HAMPIANATRA

7. Nan̈ino ma atsika mitory ndreky mampianatra?

⁷ Nan̈ino ma atsika mitory ndreky mampianatra? Voanalohany, fotony atsika tia Jehovah. Man̈araka bekony Jesosy anao izikoa man̈ano erakany farany tsara vitanao koa fa mitory ndreky mampianatra. Zen̈y ahitan̈a fa anao ten̈a tia Zan̈ahary. (1 Jaona 5:3) Diniha baka ty: Fitiavanao Jehovah nahavy anao nahasaky mitory isaka tran̈o. Kanefa tsy voatery ho mora raha zen̈y. Mety nitotoko mare fônao taminy anao vo sambany nitory. Kanefa anao nitory fo, fotony hainao fa zen̈y raha nan̈irahany Jesosy anao. Izikoa fa nandeha fotoan̈a, mety nanjary mora taminao mitory. Akory fo fampianaran̈a Baiboly? Mavozo ma anao koa fa mieritreritry hitariky fampianaran̈a Baiboly? Izikoa zen̈y, mivavaha baka Jehovah han̈ampy anao handresy tahotronao zen̈y. Iangavia izy han̈ano raha hahavy anao han̈iry hitariky fampianaran̈a Baiboly ndreky hahavita izio.

8. Izikoa zahan̈a Marka 6:34, ino koa antony hafa mahavy atsika mampianatra olo raha momba Zan̈ahary?

⁸ Faharoe, baka amy fitiavantsika olo koa mahavy atsika mampianatra ny marin̈y. Karaha zen̈y Jesosy ndreky iro apostolinany aby io. Kajo mare iro tandraraiky, koa fa baka nitory tamy tany maromaro. Nitady tany mangingin̈y iro hangalan̈a kajo, kanefa nisy vahoaka marobe navy. Nahinakinaka Jesosy nahita iro, ke nanomboko nampianatra iro “raha maro” izy. (Vakia Marka 6:34.) Niasa mare izy ndray fa kajo. Nan̈ano zen̈y i Jesosy fotony izy nahay nipetraka tamy plasinolo aby io. Tihan̈ampy iro izy fotony hainy fa mijaly mare iro, sady mila fan̈antinan̈a. Karaha zen̈y koa raha mahazo olo avahizo. Iro zahan̈a karaha sambatra ndreky afapô amy fiain̈ana. Fa ny marin̈y aminany, iro io misy problemo ndreky mila fan̈antinan̈a. Iro io miran̈a ondrikondriky very sady tsisy piambin̈y. Koran̈iny apostoly Paoly fa tsy mahay Zan̈ahary foeky iro olo aby io, sady tsisy raha antinain̈y. (Efes. 2:12) Iro io efa amy “lalan̈a mandeha amy fandripahan̈a.” (Mat. 7:13) Ke miniminia firy aminolo amy faritanintsika mila mahay raha momba Zan̈ahary. Izikoa tsy iô fitiavan̈a ndreky hinakinaka, tsy ho vitantsika han̈ampy iro olo aby io. Ary fomba araiky ten̈a tsara han̈ampiantsika iro, efa amy fitahaomantsika iro hianatra Baiboly edy.

9. Koa Filipianina 2:13 io dinihin̈y, akory mety han̈ampiany Jehovah anao?

⁹ Mety misalasala donko anao hitaon̈o olo hianatra Baiboly, fotony mitaky fotoan̈a be man̈oman̈a ndreky mitariky fampianaran̈a Baiboly zen̈y. Izikoa zen̈y tsapanao, koràn̈a amy Jehovah. Angataha izy han̈ampy anao han̈iry hitady olo von̈ono hianatra ndreky hahavita hampianatra izy. (Vakia Filipianina 2:13.) Nan̈amia toky atsika apostoly Jaona fa Jehovah hamaly vavakantsika, fotony raha zen̈y mifan̈araka amy Sitrapônany. (1 Jaona 5:14, 15) Matokisa fa Jehovah han̈ampy anao han̈iry hanan̈a pianatra Baiboly.

FOMBA HAMAHAN̈A PROBLEMO HAFA

10-11. Ino raha mety hahavy atsika hisalasala hitariky fampianaran̈a Baiboly?

¹⁰ Ten̈a raha matomboko amintsika asa fampianaran̈a Baiboly. Kanefa ndray tihifen̈y mare atsika han̈ano izio, mety ho hisy fo raha sarotro tsy hahavitantsika zen̈y erakany itiavantsika izy. Ke atsika iziô hizaha ino aby sasany amy problemo aby zen̈y ndreky raha azontsika atao hamahan̈a izio.

¹¹ Mety ho voafetra raha mety ho vitantsika nohony raha mahazo atsika. Misy pitory sasany iziô efa matoe na marary matetiky. Asa anao mba karaha zen̈y? Diniha hely baka raha araiky nianarantsika, tan̈atiny fotoan̈any valan̈aretin̈y COVID-19. Nanjary mahavita mampianatra Baiboly baka amy telefaony na baka amy fitaovan̈a elektroniky hafa atsika, ary raha zen̈y ten̈a mahômby. Sady amy zen̈y, baka antran̈o fo anao efa afaka mampianatra! Misy antony hafa koa mahatsara atsika mampiasa telefaony, koa fa manompo. Misy iziô olo tihianatra Baiboly fa iro tsiary fanôjy pitory. Kanefa, mety malalaka izy koa fa alin̈y na maraindrain̈y be. Ke akory izikoa olo karaha zen̈y azonao, lera anao mitory amy telefaony? Von̈ono anao hampianatra izy amy fotoan̈a mety aminany? Zen̈y tsarabe raha nataony Jesosy taminizy nampianatra i Nikodemosy, fotony alin̈y fo lera tiany Nikodemosy nianaran̈a.​—Jaona 3:1, 2.

12. Nan̈ino ma anao afaka matoky fa ho vitanao hitariky fampianaran̈a Baiboly?

¹² Mety midaon̈o donko atsika tsao tsy hahay hampianatra. Mety hieritreritry baka atsika fa mila mahay raha maro atsika vo hahavita hampianatra. Asa zen̈y raha tsapanao? Izikoa zen̈y, misy raha telo ty han̈ampy anao ho resy lahatra fa vitanao hampianatra Baiboly: Voanalohany, hainy Jehovah fa raha zen̈y vitanao. (2 Kor. 3:5) Faharoe, Jesosy man̈iraka anao hampianatra, ary izy manan̈a “fahifan̈a jiaby andan̈itry an̈y ndreky ambony tany eto.” (Mat. 28:18) Fahatelo, anao mety mangataka fan̈ampian̈a amy Jehovah ndreky amy piaramanompo. Karaha zen̈y nataony Jesosy. Zay raha nambarany Jehovah izy fo nampianariny olo. Ke zen̈y koa raha mety hataonao. (Jaona 8:28; 12:49) Fan̈ampinizen̈y, anao mety mangataka fan̈ampian̈a amy piandraikitriny andiampitorinaro, na amy pisava lalan̈a ndreky pitory zadraharaha. Angataha iro han̈ampy anao hitariky fampianaran̈a Baiboly. Tsara izikoa anao mba miaraka matetiky amindro, lera iro mampianatra Baiboly, fotony han̈ampy anao hatoky ten̈a raha zen̈y.

13. Nan̈ino ma atsika mila von̈ono han̈ova fomba fampianarantsika Baiboly?

¹³ Mety ho sarotro amintsika han̈araka fomba fiasa vaovao ndreky hampiasa iro fitaovan̈a vaovao aby io. Amy zioty, niova fomba fampianarantsika Baiboly. Boky Mankafiza Fiain̈ana Tsisy Farany! iziô ten̈a ampiasaintsika koa fa mampianatra. Hafa foeky fomba fan̈omanan̈a boky io, avio tsy miran̈a amy taloha koa fomba fampianaran̈a amizio. Somary vitsivitsy fehintsoratra vakian̈a aminany io, ke mila ampirisihintsika hikoran̈a tsarabe pianatrantsika. Mahaimaro fo koa video ndreky lahatsoratra baka amy jw.org ndreky amy JW Library^® ampiasaintsika koa fa mampianatra Baiboly. Izikoa anao mbala tsy zatra mampiasa fitaovan̈a aby io, mangataha fan̈ampian̈a baka hisy olo han̈ampy anao. Sarotro miala amy mahazatra. Ke mety tsy ho mora amintsika han̈araka fomba fampianaran̈a vaovao io. Kanefa, matokisa fa von̈ono han̈ampy anao Jehovah ndreky piaramanompo, ke tsy ho sarotro aminao aby hampianatra, sady ho ten̈a tianao izio. Misy pisava lalan̈a nivolan̈a fa “samby mahita haravoan̈a baka amy fomba fampianaran̈a vaovao io aby, na papianatra Baiboly na olo ampianarin̈y.”

14. Izikoa tsy mandray hafatra toriantsika olo amy faritanintsika, ino raha tsy tokony hadin̈antsika? Nan̈ino mampahery atsika raha koran̈iny 1 Korintianina 3:6, 7?

¹⁴ Mety sarotro koa donko mahita fampianaran̈a Baiboly amy tany misy anaro. Misy olo tsy taitry foeky lera atsika mitory amindro. Sasany ndraiky manohitry. Ino raha han̈ampy atsika tsy ho kivy? Aleva onon̈o fa mety hiova fiain̈ananolo, intsaka eky amy donia efa mialamboetry ty. Pôsibla, niany olo io tsy mandray, fa amy man̈araka izy mety ho tontohitry fa mila Zan̈ahary. (Mat. 5:3) Olo sasany koa taloha tsy nan̈eky nangala bokintsika. Kanefa izikoa fa nandeha fotoan̈a, iro nan̈eky hianatra Baiboly. Haintsika koa fa Jehovah Tômpiny vokatra. (Mat. 9:38) Tiany Jehovah hambôly ndreky handrôzy atsika, fa anjaranany ndraiky mampitombo. (1 Kor. 3:6, 7) Marin̈y ndraiky fa mety mbala tsy mitariky fampianaran̈a Baiboly anao izioty. Fa ny raha ten̈a mampahery sady tsy mila adin̈antsika, tsy baka aminy hamarozany boky nirasaintsika na olo nampianarintsika mahavy Jehovah han̈amia atsika hatsaran̈a, fa baka aminy ezaka ataontsika.b

HO RAVORAVO ANAO IZIKOA MAMPIANATRA BAIBOLY!

15. Ino raha tsapany Jehovah, izy koa fa mahita olo man̈eky hianatra Baiboly ndreky mampihatra raha ianarany?

¹⁵ Ravoravo Jehovah izikoa fa misy olo man̈eky fahamarin̈ana ndreky mikoran̈a izio aminolo. (Ohab. 23:15, 16) Ravoravo mare koa Jehovah mahita panomponany mazoto mitory ndreky mampianatra! Ohatra iziô, ndray tio fisiany valan̈aretin̈y tamy taompanompoan̈a 2020 in̈y, nisy olo 7 705 765 nampianarintsika Baiboly, avio olo 241 994 nanokanten̈a tamy Jehovah ndreky natao batisa ke nanjary pan̈aradia Kristy. Nifen̈y mare koa iro vaovao aby io mitariky fampianaran̈a Baiboly ndreky man̈ampy olo hafa hanjary pianatrany Kristy. (Lioka 6:40) Hay be fa ravoravo mare fôny Jehovah mahita atsika man̈ampy olo hanjary pan̈aradia Kristy.

16. Ino ma raha tsara ataontsika tanjon̈o?

¹⁶ Tsy mora man̈ampy olo hanjary pan̈aradia Kristy. Kanefa, ho vitantsika fo han̈ampy iro olo vaovao aby io ho tia Babantsika andan̈itry an̈y, fotony Jehovah man̈ampy atsika. Ohatra, tsara atsika mba man̈ano tanjon̈o hitariky fampianaran̈a Baiboly araiky farany hely. Asa anao efa mba nieritreritry han̈ano zen̈y? Tsy ho ampoizintsika foeky ny raha ho hisy izikoa atsika man̈araraotro fomba jiaby hitahaoman̈a olo hianatra Baiboly. Azo antoko fa Jehovah hitahy ezakantsika.

17. Ino raha ho tsapantsika izikoa atsika mampianatra Baiboly?

¹⁷ Ten̈a tombontsoa mitory ndreky mampianatra olo hahay ny marin̈y, fotony izio ten̈a ahitantsika haravoan̈a. Zen̈y iziô raha tsapany apostoly Paoly, izy koa fa nan̈ampy olo ta Tesalonika hanjary pianatrany Jesosy. Karaha ty ho izy: “Ino ma fan̈antinan̈anay na haravoan̈anay na satroboninahitry iravoravoanay man̈oloan̈a Jesosy Tompontsika an̈atiny fan̈atrehany, izikoa tsy anaro? Anaro voninahitrinay ndreky haravoan̈anay.” (1 Tes. 2:19, 20; Asa. 17:1-4) Maro koa piaramanompo mahatsapa zen̈y, an̈isanizen̈y Stéphanie. Nahavita nan̈ampy olo maro hahafeno fepetra amy batisa iro roeny vadiny. Volan̈iny: “Tsisy raha mamparavoravo mandilatra man̈ampy olo hanokanten̈a amy Jehovah.”