Akory Hazahoan̈a Hatsaran̈a Lera Mamaky Baiboly?

1. Akory ahitan̈a fa raha maventy tamy Jesosy Soratra Masin̈y?

IRITRIRETA hely baka anao iziô mitandren̈y Jesosy mampianatra. Matetiky izy nanon̈ono andininy amy Soratra Masin̈y efa hainy tsianjery. Ahitan̈a zen̈y, raha nivolan̈iny tsy ela hely tafarany batisanany ndreky tamy volan̈anany sasany, talohanizy hofoaty.b (Deot. 8:3; Sal. 31:5; Lioka 4:4; 23:46) Baka io tan̈atiny telo taon̈o sy tapany tan̈elan̈elan̈any zen̈y, matetiky izy nampiasa Soratra Masin̈y lera tan̈ivonolo maro. Izy namaky na nanon̈ono andininy baka tao, avio nan̈azava andininy aby io.​—Mat. 5:17, 18, 21, 22, 27, 28; Lioka 4:16-20.

2. Jesosy koa fa nahaibe, ino raha nan̈ampy izy hahay Soratra Masin̈y tsarabe? (Zahava sary amy fon̈ony gazety ty.)

² Taon̈o maro talohany nan̈anaovany fanompoan̈anany, Jesosy efa matetiky namaky ndreky naharen̈y Volan̈a Zan̈ahary. Azo antoko fa izy naharen̈y Maria ndreky Josefa nan̈ampody andininy baka tamy Soratra Masin̈y, tantran̈ondro tao lera iro nikoran̈a andavanandra.c (Deot. 6:6, 7) Hay be koa fa izy ndreky lafaminany tsy maintsy nandeha tamy synagoga, isaka Sabata. (Lioka 4:16) Azo antoko fa izy tan̈y nitandren̈y tsarabe lera nisy namaky andininy tamy Soratra Masin̈y. Koa fa nandeha fotoan̈a, Jesosy foeky nianatra namaky Soratra Masin̈y. Ke vokany, izy nanjary nahay Soratra Masin̈y tsarabe. Loso tiany mare koa izio, ke nambelany nisy vokany tamy raha nataony. Asa azonao onon̈o tamy Jesosy nandeha tamy tempoly, taminizy 12 taon̈o in̈y? Nahay Lalàn̈any Mosesy tsarabe papianatra aby tao. Iro ‘lany fan̈ahy tamy fahaizan̈anany [Jesosy] ndreky tamy valinteninany.’​—Lioka 2:46, 47, 52.

3. Ino raha hianarantsika amy lahatsoratra ty?

³ Hahay ndreky ho tia Volan̈a Zan̈ahary koa atsika izikoa mamaky izio tsy tapaka. Fa akory hahavy atsika hahazo hatsaran̈a tsarabe koa fa mamaky izio? Atsika mila mangala fianaran̈a baka tamy raha nivolan̈iny Jesosy taminolo nahay Lalàn̈a tamy zen̈y. An̈isanizen̈y iro panoratra lalàn̈a, Fariseo, avio iro Sadoseo aby io. Iro io samby pitondra fivavahan̈a, ke iro matetiky namaky Soratra Masin̈y. Fa izy fo, iro tsy nahazo hatsaran̈a baka tamy raha nivakindro. Jesosy nivolan̈a fa nisy raha telo tsy nataondro lelahy aby io, ke nahavy iro tsy nahazo hatsaran̈a koa fa namaky Soratra Masin̈y. Raha nikoran̈iny tamindro io han̈ampy atsika 1) hahazo tsara raha vakintsika, 2) hahita valera arapan̈ahy, avio 3) han̈ambela Volan̈a Zan̈ahary han̈itsy atsika.

MIFEN̈A HAHAZO RAHA VAKINAO

4. Ino raha ianarantsika baka amy Lioka 10:25-29 koa fa mamaky Volan̈a Zan̈ahary?

⁴ Tiantsika ho hay dikany raha vakintsika amy Volan̈a Zan̈ahary, baka atsika hahazo hatsaran̈a baka amizio. Diniha, ohatra, koran̈a nataony Jesosy tamy ‘lelahy araiky nahay Lalàn̈a.’ (Vakia Lioka 10:25-29.) Lelahy io nan̈ontany Jesoy raha tokony hataony baka izy hahazo fiain̈ana mandrakizay. Nampiany Jesosy izy hahita valiny fan̈ontanian̈anany tamy Volan̈a Zan̈ahary. Ke Jesosy nan̈ontany izy karaha ty: “Ino ma raha voasoratra amy Lalàn̈a ao? Akory fazahoanao izy?” Hainy lelahy io tsarabe namaly fan̈ontanian̈a aby io. Izy nanon̈ono andininteny mikoran̈a momba fitiavan̈a Zan̈ahary ndreky fitiavan̈a naman̈a. (Lev. 19:18; Deot. 6:5) Fa aleva onon̈o hely raha nivolan̈iny baka tio. Hoizy: ‘Azovy marin̈y ma namako?’ Hita baka tamy fan̈ontanian̈anany zen̈y fa tsy ten̈a azony dikany raha nivakiny. Ke tsy hainy akory han̈arehan̈a raha volan̈iny andininy aby io tamy fiain̈ananany.

5. Nan̈ino vavaka ndreky famakian̈a miadan̈a man̈ampy atsika hahazo tsarabe dikany raha vakintsika?

⁵ Hahaihazava amintsika raha vakintsika an̈aty Volan̈a Zan̈ahary, izikoa atsika mifen̈y hanan̈a fahazaran̈a tsara lera mamaky teny. Ty misy sosokevitry vitsivitsy mety han̈ampy anao amy zen̈y: Mivavaha alohany anao hamaky izio. Mila fan̈ampiany Jehovah atsika baka hazava amintsika raha tiany Soratra Masin̈y koran̈iny. Ke mangataha fan̈ahy masin̈y aminany baka anao hahavita hifantoko amy raha vakinao. Avio vakia miadan̈a fa aza atao mekimeky. Zen̈y han̈ampy anao hahazo dikany raha vakinao. Mety han̈ampy anao koa mamaky mare, na mitandren̈y vaky Baiboly nalain̈a feo salakady man̈araka izio amy Baiboly. Nan̈ino? Fotony izikoa anao maharen̈y salakady mahita raha vakinao, ho moramora aminao hahazo dikany ndreky hangala onon̈o izio, ke anao hahavita hianatra raha maro baka amy Volan̈a Zan̈ahary. (Jos. 1:8) Izikoa fa vita vaky Baibolinao, mivavaha ndraiky. Ataova mersy Jehovah nan̈amia Volan̈anany, avio angataha izy han̈ampy anao han̈araka raha nivakinao amy fiain̈ananao.

6. Nan̈ino man̈apetraka fan̈ontanian̈a aminy ain̈inao ndreky mangala naoty hely han̈ampy anao koa fa mamaky Baiboly? (Zahava koa sary.)

⁶ Misy sosokevitry aroe hafa han̈ampy anao hahazo tsarabe raha vakinao amy Baiboly. Man̈apitraha fan̈ontanian̈a aminy ain̈inao momba raha vakinao. Ohatra iziô, anao koa fa mamaky tantara araiky, man̈ontania ten̈a karaha ty: ‘Azovy ma ten̈a koran̈iny aminany ty? Azovy ma mivolan̈a eto? Mandeha aminjovy ma koran̈a ty, avio nan̈ino? Taia avio ombian̈a nisiany tantara ty?’ Fan̈ontanian̈a karaha zen̈y han̈ampy anao handiniky ndreky hahita hevitry maventy amy raha vakinao. Ankoatranizen̈y, mangalà naoty hely. Anao koa manoratra, anao loso mandiniky tsarabe raha vakinao, ke izio hanjary hazava tsara aminao. Zen̈y koa han̈ampy anao hahazo onon̈o raha vakinao. Ino aby ma raha mety soratin̈y? Sorata fan̈ontanian̈anao, raha hitanao tamy fikarohan̈a nataonao, famintin̈ana hevitry maventy, fomba mety hampiasainao raha nivakinao, na koa zay raha tsapanao tamy raha nivakinao io. Anao koa mangala naoty, ho tsapanao fa Volan̈a Zan̈ahary io ten̈a hafatra handeha aminao!

7. Ino toetry ilaintsika lera mamaky Baiboly, avio nan̈ino? (Matio 24:15)

⁷ Misy toetry araiky matomboko nivolan̈iny Jesosy fa ilaintsika izikoa tiantsika hahazo raha vakintsika amy Volan̈a Zan̈ahary. Tsy ino izio fa fahaizan̈a mandiniky. (Vakia Matio 24:15.) Karakory ma zen̈y? Mahay mandiniky olo araiky izikoa mahay ino ifandraisany hevitry samihafa ndreky mahay man̈avaka raha tsy mampitovy hevitry aby io, avio mahazo tsara hevitry raha araiky ndray izio tsy ambara mivantan̈a. Sosoko zen̈y koa, naboakany Jesosy fa atsika mila mahay mandiniky baka atsika mahay ino amy raha mandalo aby io man̈atanteraka faminanian̈a amy Baiboly. Mila toetry io koa atsika baka hahazo hatsaran̈a tsarabe amy raha jiaby vakintsika amy Baiboly.

8. Ino raha han̈ampy atsika hahay handiniky koa fa mamaky Baiboly?

⁸ Jehovah man̈ampy panomponany hahay handiniky. Ke mivavaha aminany, avio angataha izy han̈ampy anao hahay handiniky. (Ohab. 2:6) Akory hahavy anao han̈ano raha mifan̈araka amy vavaka ataonao? Diniha tsara raha vakinao, avio aleva onon̈o ino ifandraisanizio aminy hevitry hafa efa hainao. Han̈ampy anao han̈ano zen̈y, ampiasà iro boky fianaran̈a Baiboly aby io, an̈isanizen̈y Fitaovana Fikarohana ho An’ny Vavolombelon’i Jehovah. Iro fitaovan̈a aby io han̈ampy anao hahay raha tiany andininteny koran̈iny ndreky hahita fomba mety han̈arehanao raha volan̈inizio amy fiain̈ananao. (Heb. 5:14) Anao koa mandiniky tsara raha vakinao, hahaihazava aminao raha koran̈iny Soratra Masin̈y.

MITADIAVA VALERA ARAPAN̈AHY

9. Ino fampianaran̈a matomboko an̈atiny Volan̈a Zan̈ahary tsy nikendro Sadoseo aby io?

⁹ Iro Sadoseo aby io efa nahay tsara raha koran̈iny boky dimy voanalohany amy Soratra Hebreo, fa iro tsy nan̈eky iro fahamarin̈ana matomboko an̈atiny boky aby io. Ohatra iziô, Sadoseo aby io koa fa nan̈ontany Jesosy momba fananganan̈a amy maty, hoizy tamindro: ‘Mbala tsy nivakinaro tamy bokiny Mosesy, tamy fitantaran̈a momba kakazo bifatsiky in̈y ma fa Zan̈ahary nivolan̈a taminany karaha ty: “Zaho Zan̈ahariny Abrahama ndreky Zan̈ahariny Isaka, avio Zan̈ahariny Jakoba”?’ (Mar. 12:18, 26) Efa matetiky iro Sadoseo aby io namaky andininy io, fa fan̈ontanian̈any Jesosy io nan̈aboaka tsarabe fa nisy fahamarin̈ana matomboko tsy haindro. Tsy ino zen̈y fa fampianaran̈a momba fananganan̈a amy maty.​—Mar. 12:27; Lioka 20:38.d

10. Ino raha mila alaintsika onon̈o koa atsika fa mamaky Baiboly?

¹⁰ Ino raha ianarantsika baka amy zen̈y? Atsika koa fa mamaky Baiboly, atsika mila mangala onon̈o raha jiaby tafiditry aminy andininy na tantara araiky vakintsika. Ke tsy fampianaran̈a fototro fo tiantsika ho hita, fa mifen̈y koa atsika mitady fahamarin̈ana ndreky toro lalan̈a lalin̈y misitriky an̈atinizio ao.

11. Akory ampiasanao 2 Timoty 3:16, 17, hitadiavan̈a valera arapan̈ahy?

¹¹ Akory ahitanao valera arapan̈ahy lera mamaky Baiboly? Aleva onon̈o raha koran̈iny 2 Timoty 3:16, 17. (Vakia.) Andininy io mivolan̈a fa “ilain̈y Soratra Masin̈y jiaby” fotony natao 1) hampianaran̈a, 2) han̈anaran̈a, 3) han̈itsian̈a raha tsy mety, avio 4) hamalavalan̈a. Firaka amy boky aby tsy matetiky vakinao amy Baiboly ao, afaka man̈ampy anao hahazo hatsaran̈a efatra aby zen̈y. Amy fomba akory? Diniha tsara tantara vakinao. Zahava ino raha ampianarinizio anao momba Jehovah, momba fikasan̈anany, na momba toro lalan̈any Zan̈ahary. Aleva onon̈o amy karakory izio man̈anatra anao. Diniha akory an̈ampianizio anao hahita fahazaran̈a na toetry ratsy anan̈anao, avio akory atao miady amindro io. Diniha koa akory an̈ampiany andininteny aby io anao tsy hivadiky. Tsy zen̈y fo, diniha koa akory mety ampiasanao andininy aby io han̈itsian̈a eritreritry diso. Ohatra amy zen̈y, hevitry diso nikoran̈inolo tamy fanompoan̈a. Zahava koa akory mety hamalavalany andininy io anao, baka anao hitovy fomba fihevitry amy Jehovah. Izikoa alainao onon̈o fo raha efatra aby zen̈y, hahita valera arapan̈ahy edy anao lera mamaky Baiboly. Ke ho maro hatsaran̈a ho azonao.

AMBILÀ HAN̈ITSY ANAO RAHA NIVAKINAO

12. Nan̈ino ma Jesosy nan̈ontany Fariseo aby io: ‘Mbala tsy nivakinaro ma?’

¹² Nan̈ontany iro Fariseo aby io karaha ty koa Jesosy: ‘Mbala tsy nivakinaro ma?’ (Mat. 12:1-7)e Tiany Jesosy aboaka fa tsy tsara toetsain̈indro koa fa namaky Soratra Masin̈y. Tamy fotoan̈a io baka, iro Fariseo aby io nivolan̈a fa tsy nan̈aja Sabata zen̈y pianatra Jesosy. Ke nisy ohatra aroe baka tamy Soratra Masin̈y nikoran̈iny Jesosy tamindro. Avio izy nanon̈ono andininy baka tamy bokiny Hosea, han̈aboahan̈a fa tsy ten̈a haindro Fariseo aby io antony nan̈anaovan̈a lalàn̈a momba Sabata. Tiany Jesosy aboaka koa fa Fariseo aby io tsy nahay namindra fô. Tsisy vokany tamindro foeky raha nivakiandro tamy Volan̈a Zan̈ahary. Nan̈ino? Fotony iro nizaha raha hivolan̈ana olo fo sady tsy nanetry ten̈a. Ke baka tamy toetsain̈indro nahavy raha vakindro loso tsy nazava tamindro.​—Mat. 23:23; Jaona 5:39, 40.

13. Tokony karakory toetsain̈intsika lera mamaky Baiboly, avio nan̈ino?

¹³ Ino leson azontsika baka amy volan̈a Jesosy in̈y? Mila tsara toetsain̈intsika lera mamaky Baiboly. Atsika mila manetry ten̈a ndreky von̈ono hianatra, fa tsy han̈ano karaha Fariseo aby io. Mila ‘malemy fan̈ahy’ atsika ke ‘man̈eky volan̈a aby natsabony Zan̈ahary an̈aty fontsika ao.’ (Jak. 1:21) Izikoa atsika malemy fan̈ahy, atsika man̈ambela Volan̈a Zan̈ahary han̈ova toetrintsika. Ke izikoa atsika tsy man̈ambony ten̈a avio tsy mitady raha hitifiran̈a naman̈a, hanjary hisy vokany amintsika raha ampianariny Baiboly momba famindrampo, hinakinaka, avio fitiavan̈a.

14. Akory ahaizantsika fa atsika man̈ambela Baiboly han̈itsy atsika? (Zahava koa sary.)

¹⁴ Hita amy fomba itondrasantsika olo, izikoa Volan̈a Zan̈ahary ambelantsika han̈itsy atsika. Ahitan̈a zen̈y, raha nataondro Fariseo aby io. Tsy nambelandro han̈ova toetsain̈indro Volan̈a Zan̈ahary, ke zen̈y nahavy iro nanjary ‘nan̈ameloko olo tsy diso.’ (Mat. 12:7) Ke diniha akory fomba itondrasanao olo ndreky raha iritriretinao momba iro. Mandiniha ten̈a karaha ty: ‘Raha tsara momba olo sa raha tsy mety ataondro fo ny ten̈a matetiky koran̈iko? Zaho ma tia mamindra fô ndreky von̈ono hamela heloko, sa zaho tia man̈amia tsin̈y olo ndreky mitana heloko ampô?’ Tsara mandiniten̈a karaha zen̈y, fotony zen̈y ahitanao izikoa raha vakinao ambelanao hiasa an̈aty jerinao ndreky fonao, avio amy raha ataonao.​—1 Tim. 4:12, 15; Heb. 4:12.

HO SAMBATRA ANAO KOA MAMAKY BAIBOLY

15. Karakory fiheverany Jesosy Soratra Masin̈y?

¹⁵ Jesosy ten̈a tia Soratra Masin̈y. Efa koran̈iny Salamo 40:8 tsialohaloha fa valera tamy Jesosy Volan̈a Zan̈ahary. Hoizy ao: “Tiako man̈ano sitraponao, Zan̈aharinaka e, sady lalàn̈anao efa tafiditry lalin̈y an̈atinaka ato.” Ke vokatranizen̈y, izy nanjary sambatra avio nahavita tsy nivadiky tamy Jehovah. Afaka ho sambatra ndreky hahomby koa atsika izikoa mamaky Baiboly ndreky mifen̈y ho tia izio.​—Sal. 1:1-3.

16. Ino raha mila ataonao koa tianao hahazo hatsaran̈a tsarabe lera mamaky Baiboly? (Zahava efajoro “Volan̈a Jesosy Afaka Man̈ampy Anao Hahazo Tsara Raha Vakinao.”)

¹⁶ Ke eraka raha nivolan̈iny Jesosy ndreky modelinany, irarian̈a atsika hankatsara fomba famakiantsika Baiboly. Hahaihazava amintsika raha vakintsika izikoa atsika mivavaka, mamaky miadankadan̈a, man̈apetraka fan̈ontanian̈a, avio mangala naoty hely. Mila mahay mandiniky koa atsika ke mangala onon̈o tsarabe raha vakintsika. Han̈ampy atsika amy zen̈y iro boky ndreky gazetintsika aby io. Ho haintsika hampiasa Baiboly, firaka aminy andininteny tsy dia mahazatra atsika, izikoa atsika mitsakaraka valera arapan̈ahy an̈aty tantara aby ao. Man̈ambela Volan̈a Zan̈ahary han̈itsy atsika koa atsika izikoa mifen̈y manan̈a toetsain̈y tsara lera mamaky izio. Izikoa atsika mifen̈y man̈ano raha aby zen̈y, atsika hahazo hatsaran̈a maro lera mamaky Baiboly. Tsy zen̈y fo, hahaiharikitry Jehovah fo koa atsika.​—Sal. 119:17, 18; Jak. 4:8.