Akôry Ahitan̈a Olo Mety Atao Vady?

1-2. a) Ino aby raha mila dinihin’ny Kristianin̈y tsy manambady, alohan’izy hanomboko hiaraka amin’olo araiky? b) Ino ma dikan’ny “fiarasan̈a alohan’ny vadian̈a” zen̈y? (Zahava “Fan̈azavan̈a.”)

ANAO ma mba man̈iry hanambady? Marin̈y ankitin̈y fa tsy miankin̈y amin’ny atsika manambady atsika vo ten̈a ho sambatra. Fa kanefa, maro Kristianin̈y tsy manambady na tanora na matoe, mba man̈iry hanan̈a vady. Ndray zen̈y, alohan’ny anao hanomboko hiaraka amin’olo araiky, anao tôkony ho efa tsara fifandraisan̈a amy Jehovah, ndreky efa mahay tsarabe toetrinao, baka iô anao efa tôkony ho vôn̈ono tsara amin’ny andraikitry misy ifandraisany amy vadian̈a io, karaha ataon’ny amy resaka vola.a (1 Kor. 7:36) Ke izikoa anao fa man̈ano karaha zen̈y, mety ho sambatra vadian̈anao.

² Fa ndray zen̈y, tsy mora mahita vady tsara zen̈y. (Ohab. 31:10) Baka iô ndray anao efa mahita olo parpare amianao, mety tsy ho mora koa hanomboko fiarasan̈a alohan’ny vadian̈a zen̈y. Ke amy lahatsoratra ty atsika handiniky ino raha han̈ampy Kristianin̈y tsy manambady hahita olo tsara hatao vady ndreky karakôry hanombohan̈a fiarasan̈a alohan’ny vadian̈a.b Atsika koa hianatra akôry han̈ampian’ny fiangonan̈a irô olo man̈iry hanambady aby io.

FITADIAVAN̈A OLO METY HO VADY TSARA

3. Ino aby raha mila dinihin’ny Kristianin̈y tsy manambady, izikoa izy fa mitady olo hatao vady?

³ Izikoa anao man̈iry hanambady, alohan’ny anao hanomboko hiaraka amin’olo araiky, tsara izikoa fa sakavy dinihinao tsara ino aby toetry tianao hanan̈an’olo handeha hataonao vady. Fan̈anaovanao raha zen̈y han̈ampy anao hahita asa fandanja aminao izy sa tsy fandanja aminao.c Kanefa, tôkony ho olo efa batisa olo iritriretinao io. (1 Kor. 7:39) Fa ndray zen̈y, tsy kila olo vita batisa zay mety ho vady tsara aby. Ke man̈ontania ten̈a karaha ty: ‘Ino aby ma tanjon̈onaka amy fiain̈ana? Ino aby ma toetry tiako hanan̈an’olo hataoko vady io? Tsao mitady raha maro loatra zaho amin’olo hataoko vady?’

4. Ino aby raha sasany ampidirin’olo amy vavaka, irô koa fa mitady vady?

⁴ Izikoa anao tihanambady, azo antoko fa anao efa nivavaka momba raha zen̈y. (Fil. 4:6) Marin̈y ndraiky fa Jehovah tsy mampan̈anten̈a han̈amia olo vady. Fa ndray zen̈y, izy mikarakara raha ilainao ndreky fihetseham-pônao. Baka iô, izy koa afaka man̈ampy anao amy fitadiavan̈a vady zen̈y. Ke aza vôly mikoran̈a aminany fan̈irian̈anao ndreky fihetseham-pônao io. (Sal. 62:8) Mivavaha koa baka anao hanan̈a faharetan̈a ndreky fahendrena. (Jak. 1:5) John,d rahalahy araiky selibatera mipetraka an Etazonỳ an̈y, man̈azava ino aby raha ampidiriny amy vavaka ataony: “Koran̈iko amy Jehovah ino aby toetry tiako hanan̈an’olo handeha hataoko vady io. Ke zaho mivavaka baka izy han̈ampy zaho hahita olo karaha zen̈y. Aviô, zaho koa mivavaka amy Jehovah baka izy han̈ampy zaho hanan̈a toetry hahavy zaho ho vady tsara.” Tanya, ranabavy araiky baka a Sri Lanka an̈y, nivolan̈a karaha ty: “Tamy zaho nitady vady, zaho nivavaka tamy Jehovah baka han̈ampy zaho hahavita tsy hivadiky, hifantoko amy lafy tsaran-draha baka iô ho sambatra.” Fa ndray anao tsy mahita olo fandanja aminao, matokisa fa Jehovah mampan̈anten̈a fa izy mbala tia anao ndreky tsy vôly mikarakara anao fo.​—Sal. 55:22.

5. Amy fotoan̈a karakôry Kristianin̈y tsy manambady mety ho tôjy Kristianin̈y tsy manambady tia Jehovah karaha izy koa? (1 Korintianina 15:58) (Zahava koa sary.)

⁵ Baiboly mandrisiky atsika ho “maro raha atao amin’ny asan’ny Tompo.” (Vakia 1 Korintianina 15:58.) Izikoa anao maro raha atao amy fanompoan̈a Jehovah, ndreky mandany fotoan̈a man̈ano raha ara-pan̈ahy miaraka amindrô rahalahy ndreky ranabavy isan-karazany, manambady na tsy manambady, tanora ndreky matoe, anao sady hahazo fankahirezan̈a, aviô anao koa mety ho fanôjy rahalahy ndreky ranabavy tsy manambady karaha ataonao sady mifantoko amy fanompoan̈a Jehovah. Baka iô, izikoa anao ten̈a mifen̈y fo hamparavoravo Jehovah, anao hahita ny ten̈a hasambaran̈a.

6. Izikoa misy Kristianin̈y tsy manambady mitady vady, ino raha tsy mila adin̈any?

⁶ Fa ty misy fampitandreman̈a: Mitandrema tsao fitadiavan̈a vady io lôso raha ten̈a maventy amy fiain̈ananao. (Fil. 1:10) Ten̈a hasambaran̈a zen̈y tsy miankin̈y aminao manambady ndreky tsy manambady fa miankin̈y amy fifandraisanao amy Jehovah. (Mat. 5:3) Baka iô, amin’ny anao tsy manambady io, anao ten̈a afaka mampitombo fanompoanao Jehovah. (1 Kor. 7:32, 33) Ke ampiasà tsara fotoan̈a zen̈y. Jessica, ranabavy baka a Etazonỳ, ndreky nanambady tamin’izy efa ho 40 taon̈o nivolan̈a karaha ty: “Tamy zaho mbala tsy nanambady, zaho nifen̈y ho maro raha natao tamy fanompoan̈a, ke raha zen̈y nan̈ampy zaho ho ravoravo fo ndray zaho mbala tsendriky nahita vady.”

MANGALÀ FOTOAN̈A HANDINIHAN̈A TSARA

7. Nan̈ino hendry anao izikoa mangala fotoan̈a antsendriky handinihan̈a olo araiky, alohan’ny anao hikoran̈a aminany raha an̈atin’ny fônao? (Ohabolana 13:16)

⁷ Akôry izikoa anao mieritreritry fa efa misy olo hitanao mifandanja tsara aminao? Anao ma direkty efa tôkony hivolan̈a aminany raha tsapanao? Baiboly mivolan̈a fa olo hendry mifen̈y mandiniky tsara raha misy, vo man̈ano raha. (Vakia Ohabolana 13:16.) Ke hendry anao izikoa mandiniky tsara olo io, alohan’ny anao hivolan̈a aminany raha an̈atin’ny fônao. Karaha ty nivolan̈in’i Aschwin, rahalahy araiky baka a Holandy: “Fihetseham-pô io mora avy, baka iô mora ravan̈a. Fa izikoa anao mangala fotoan̈a handinihan̈a tsara antsendriky momba olo araiky, vo miaraka aminany, anao tsy hanomboko hiaraka amin’olo io nohon’ny anao taitaitry aminany fo.” Arakaraka handinihanao izy tsarabe, mety ho hitanao fa tsy ten̈a olo mifandanja aminao aby izy.

8. Akôry mety hataon’ny Kristianin̈y araiky tsy manambady handiniky olo araiky tiany hatao vady? (Zahava koa sary.)

⁸ Akôry hahavitanao handiniky olo araiky niritriretinao, ndray anao mbala tsendriky nivolan̈a aminany fa anao tia izy? Amy fivorian̈a na koa lera misv fiarahan̈a, anao efa afaka mandiniky momba olo io. Ohatra, karakôry ara-pan̈ahinany, toetrinany, ndreky fitondran-ten̈anany. Mety dinihinao koa azôvy namany, aviô ino ten̈a ventin’ny koran̈anany. (Lioka 6:45) Tanjon̈onany ma mifan̈araka amy ninao? Anao koa mety man̈ontany anti-pan̈ahy amy fiangonan̈a na olo hafa matotro mahay izy tsarabe. (Ohab. 20:18) Ohatra, mety han̈ontanianao karakôry lazanany ndreky toetrinany. (Rota 2:11) Baka iô, anao koa fa mandiniky izy, aza atao raha hahavy izy hahatsiaro ho men̈atra. Hajà fihetseham-pônany, sekirenany, baka iô aza mitsôfotro amy fiain̈ananany manokan̈a.

9. Alohan’ny anao han̈aton̈o olo araiky tianao hatao vady, tôkony ho efa resy lahatra amin’ino anao?

⁹ Firaka ombian̈a ma anao handiniky olo io fo, alohan’ny anao hivolan̈a aminany raha an̈atin’ny fônao? Izikoa anao malaky loatra mivolan̈a aminany, izy mety hieritreritry fa anao tsy nandiniky talohan’ny nanapa-kevitry. (Ohab. 29:20) Fa izikoa ndraiky anao tara loatra vo mivolan̈a, izy mety hieritreritry fa anao misalasala loatra ke tsy masaky manapa-kevitry, intsaka eky izikoa efa hainy fa anao manan̈a eritreritry aminany. (Mpito. 11:4) Aleva onon̈o ty: Alohan’ny anao han̈aton̈o olo araiky, anao tsy mila mieritreritry fa olo io tsy maintsy hanjary vadinao, fa anao ndraiky tôkony ho resy lahatra fa anao efa vôn̈ono amy vadian̈a, baka iô olo iritriretinao io ten̈a ho vady mety tsara aminao.

10. Akôry tôkony hataonao, izikoa misy olo manan̈a eritreritry aminao, kanefa anao tsisy eritreritry aminany?

¹⁰ Ino raha tôkony hataonao, izikoa misy olo tihahay tsarabe anao? Izikoa anao tsy vôn̈ono hiaraka aminany, ataova mazava tsarabe amy raha volan̈inao ndreky raha ataonao fa anao ten̈a tsy tihiaraka aminany. Tsy mety izikoa anao han̈ano raha hahavy izy hieritreritry fa anao tihiaraka aminany, kanefa anao tsy mieritreritry zen̈y.​—1 Kor. 10:24; Efes. 4:25.

11. Amy tany sasany olo hafa mitady olo hatambatra hatao fivadiany. Izikoa zen̈y, ino raha mila halain̈a onon̈o tsarabe?

¹¹ Amy tany sasany, raimandreny na olo hafa efa be fo mifidy olo hatao vadin’ny havandrô. Amy tany hafa ndraiky, havan̈a na naman̈a mitady olo hatambatra hanjary fivadiany. Fa anjarandrô olo aroe io ndraiky manapa-kevitry na irô hiaraka na tsy hiaraka. Ke izikoa anao hangatahin̈y han̈amboatra vadian̈an’olo, diniha tsara ino raha tian’ny lelahy io ndreky tian’ny man̈angy io, aviô raha ilaindrô. Ke izikoa anao mahita olo mety ho vadin’ny havanao na kamaradinao io, ataova tsara raha hahavy anao hahay olo io. Diniha toetrinany, baka iô raha momba ara-pan̈ahinany, fôtony io raha ten̈a maventy fa tsy vola, fianaran̈a, na toeran̈a amy fiaraha-monin̈y. Aleva onon̈o koa fa anjarandrô roe tsy manambady io manapa-kevitry farany, han̈ano fivadiany irô sa tsy han̈ano.​—Gal. 6:5.

AKÔRY HANOMBOHAN̈A FIARASAN̈A ALOHAN’NY VADIAN̈A?

12. Izikoa anao tihanomboko hiaraka amin’olo araiky, akôry mety hivolan̈anao zen̈y aminany?

¹² Izikoa anao tihanomboko fiarasan̈a amin’olo araiky, akôry mety hivolan̈anao raha zen̈y aminany?e Azonao atao mikoran̈a amin’olo io amy tany misy olo maro, na amy telefony. Volàn̈a mazava tsarabe aminany fa anao tia izy ke anao tihifankahay aminany tsarabe. (1 Kor. 14:9) Ameza fotoan̈a olo io handiniky antsendriky, zay izy vo mamaly. (Ohab. 15:28) Fa izikoa ndraiky olo io tsy tihiaraka aminao ke tsy tihifampizaha toetry aminao, hajà fanapahan-kevitrinany zen̈y.

13. Ino raha mety hataonao, izikoa misy olo man̈aton̈o anao mivolan̈a fa izy tia anao? (Kolosianina 4:6)

¹³ Akôry izikoa misy olo mikoran̈a aminao fa anao tiany, ke izy man̈iry tihiaraka aminao? Mety ho sarotro taminany mare handeha han̈aton̈o anao hivolan̈a zen̈y. Ke mifen̈a ho tsara fan̈ahy ndreky han̈aja izy. (Vakia Kolosianina 4:6.) Ke izikoa anao mbala mila fotoan̈a hieritreretan̈a tsarabe anarô hiaraka sa tsy hiaraka, ambarà izy raha zen̈y. Fa ndray izy man̈ano zen̈y, aza ambela ela anao vo mamaly. (Ohab. 13:12) Ke izikoa anao tsy manan̈a eritreritry aminany, ambarà izy mazava tsarabe raha zen̈y, ndreky ataova an-katsaram-pan̈ahy. Diniha baka raha nataon’i Hans, rahalahy araiky baka a Ôtrisy, izikoa fa nisy ranabavy araiky nan̈aton̈o izy. Ho izy: “Tsara fan̈ahy fo zaho nan̈ambara valiny taminany, baka iô nataoko mazava tsarabe fivolan̈ako izy. Direkty nambarako izy ny marin̈y, fôtony zaho tsy tihandiso fan̈antinan̈a izy. Nohon’ny antony zen̈y koa nahavy zaho tafaran’izin̈y nitandrin̈y fo tamy raha nivolan̈iko ndreky tamy raha nataoko, tsao hahavy izy hieritreritry fa zaho efa niova hevitry.” Fa izikoa ndraiky anao mba tihifankahay amin’olo io, koràn̈a aminany zen̈y. Koràn̈a aminany ino aby raha tianarô hatao, an̈atin’ny anarô miaraka io. Fa ndraikindraiky raha tianao hatao mety tsy ho miran̈a amy ninany, arakaraka fombanarô na raha hafa koa.

AKÔRY METY HAN̈AMPIAN̈A IRÔ KRISTIANIN̈Y TSY MANAMBADY ABY IO?

14. Akôry mety hankahirezantsika irô Kristianin̈y tsy manambady aby io amy raha volan̈intsika amindrô?

¹⁴ Akôry hankahirezantsika ndreky han̈ampiantsika irô Kristianin̈y man̈iry hanambady aby io? Fomba araiky amy zen̈y, atsika mila mitandrin̈y amy raha volan̈intsika. (Efes. 4:29) Tsara atsika koa man̈ontany ten̈a: ‘Zaho ma man̈ano sangisangy zary ten̈any amindrô olo tsy manambady aby io? Izikoa zaho mahita rahalahy tsy manambady ndreky ranabavy tsy manambady mikoran̈a, zaho ma direkty mieritreritry fa irô mifankatia?’ (1 Tim. 5:13) Atsika koa tsy tôkony hivolan̈a fa irô Kristianin̈y tsy manambady aby io misy raha tsy ampy, izikoa irô tsy manambady. Ty raha nivolan̈in’i Hans, rahalahy nikoran̈intsika taloha tiô in̈y: “Misy rahalahy sasany mivolan̈a: ‘Nan̈ino anao tsy manambady? Anao kony tsy ho tanora karaha io fo ay!’ Volan̈a karaha zen̈y mety hahavy irô Kristianin̈y tsy manambady aby io hahatsiaro tsisy dikany, ndreky hahavy irô ho setry tihanambady.” Tsaratsara aminany atsika mifen̈y midera irô rahalahy ndreky ranabavintsika tsy manambady aby io!​—1 Tes. 5:11.

15. a) Izikoa zahan̈a torolalan̈a amy Romanina 15:2, ino raha tôkony hidinihintsika, alohan’ny atsika han̈ampy olo hitady vady? (Zahava koa sary.) b) Ino aby raha nianaranao baka tamy video io?

¹⁵ Akôry izikoa anao mieritreritry fa misy rahalahy araiky ndreky ranabavy araiky mifandanja tsara? Baiboly mivolan̈a fa atsika tôkony hahay handiniky fihetseham-pôn’olo. (Vakia Romanina 15:2.) Maro olo tsy manambady tsy tia izikoa olo hafa mitady olo hatao vadindrô, ke atsika tôkony han̈aja safidindrô zen̈y. (2 Tes. 3:11) Fa olo sasany ndraiky tia izikoa misy olo hafa man̈ampy izy amy zen̈y. Fa kanefa atsika tsy tôkony han̈ano zen̈y, izikoa tsy izy nan̈iraka.f (Ohab. 3:27) Fa Kristianin̈y sasany ndraiky tsy tia izikoa atao mivantan̈a be irô ampifanojoan̈a. Karaha ty nivolan̈in’i Lydia, ranabavy araiky tsy manambady an Allemagne an̈y: “Anao mety man̈ano raha hampifanojoan̈a rahalahy ndreky ranabavy araiky, fa izy fo tsy irô roe fo fa mba miaraka amin’olo maromaro. Ambilà irô roe man̈ano ny tohiny aviô.”

16. Ino raha tôkony halain’ny Kristianin̈y tsy manambady onon̈o?

¹⁶ Atsika jiaby samy mety hanan̈a fiain̈ana sambatra ndreky afa-pô aby, na manambady atsika na tsy manambady! (Sal. 128:1) Ke izikoa anao man̈iry hanan̈a vady, kanefa mbala tsendriky mahita olo fandanja aminao, mifen̈a fo amy fanompoan̈a Jehovah. Karaha ty nivolan̈in’i Sin Yi, ranabavy araiky baka a Macao: “Izikoa ampiran̈inao amy fotoan̈a iarahanao amy vadinao amy Paradisa an̈y fotoan̈a mampaselibatera anao iziôty, ten̈a fôhiky fotoan̈a maha selibatera anao amy ziôty io. Ke ankafiza fotoan̈a fôhiky io, aviô ampiasà tsara.” Fa akôry izikoa anao efa nahita olo hataonao vady, ke efa manomboko man̈ano fiarasan̈a alohan’ny vadian̈a anarô? Amy lahatsoratra fan̈araka ty, atsika handiniky akôry tôkony hataonao, baka fiarasan̈a alohan’ny vadian̈a io hahavy anao hahay hangala fanapahan-kevitry tsara.